Read gen Toto jo 14 Bible Online

Toto jo 14 - gen bible

Toto jo 14

¹Tɔhonɔ̀ gblɔ̃ na Mosè be:

²“Gblɔ̃ na Izràɛlviwo be wo ne trɔ va do àsàɖa ɖo Pi-Hamrɔ̀t be ŋùkɔ̀, lè Migdɔ̀l ku àpùa be dòdòmè; Bàhal-Sefɔ̃ be ŋùkɔ̀ tututu ye mì la do àsàɖa ɖo, lè àpùa to.

³Eye Faraɔ̀n la gblɔ̃ so Izràɛlviwo ŋuti be: “Woawo ye le dã ku vɔ̃vɔ̃ lè ànyigbãa ji ŋua! Zògbè a do wo ègà keŋu!”

⁴Mù la na Faraɔ̀n be ètamè la sɛ̃ŋu, eye be la tĩ woa yomè. Vɔ̀a, mù la ɖè gogo nyè fiɔ, ɖo Faraɔ̀n ku yebe àhùakɔ̃awo keŋu ŋuti, eye Ejiptèviwo la nya be ènyè ye nyi Tɔhonɔ̀.” Wo Zɔ̃ ɖo ègbèɖèɖea ji.

⁵Àmèwo yì gblɔ̃ na Ejiptè be èfìɔa be dùkɔ̃a si jo. Faraɔ̀n ku yebe gɔ̃mènɔ̀tɔwo be èjì trɔ ɖo dùkɔ̃a ŋuti, eye wo gblɔ̃ be: “Nukɛ ye mi wɔ̀ ŋua ò? Mi ɖè àsi lè Izràɛlviwo ŋuti, eye wo mu gbà la sumɔ mi ke ò!”

⁶E na, wo jrà yebe àhùakèkevia ɖo, eye be kplɔ̀ yebe àhùakɔ̃wo ɖo ŋuti.

⁷E sɔ kãlìwo be àhùakèkevi àlɔ̀ àdɛ̃ ku Ejiptè be àhùakèkeviwo keŋu, ɖe sia ɖe ku yebe kãlìwo.

⁸Tɔhonɔ̀ na be Faraɔ̀n, Ejiptè be èfìɔa gbà sɛ̃ ètamè, eye Faraɔ̀n jè Izràɛlviwo yomè ku yebe àhùakɔ̃wo. E jè Izràɛlvi kèwo to so kluvi nyinyi mèawo yomè.

⁹Ejiptèviwo kplɔ̀ wo do ku Faraɔ̀n be àhùakèkeviwo, yebe èsɔdotɔwo ku yebe àhùakɔ̃wo, eye wo va yì xe wo, wàlɛbɛ kè Izràɛlviwo do àsàɖa ɖo àpùata, lè Pi-Haritɔ̀t gbɔ, jè ŋùkɔ̀ Bal-Sefɔ̃.

¹⁰Ekè Faraɔ̀n gogo woa, Izràɛlviwo kɔ èta yì ji eye, kpɔɖa, Ejiptè be dùkɔ̃a bliboa jè woa yomè! Izràɛlviwo vɔ̃ ŋutɔ, eye wo do àpa yɔ Tɔhonɔ̀.

¹¹Wo gblɔ̃ na Mosè be: “Kè èyɔ̀do mu sùgbɔ lè Ejiptè ò a, ŋuti ye wò kplɔ̀ mi va zògbè ji, ne mia kua? Nukɛ ŋuti wò wɔ̀ ekèa ku mi, eye wò kplɔ̀ mi jo lè Ejiptè ɖo ò?

¹²Mi mu gblɔ̃ ɛ̀ na wò sãa, lè Ejiptè be: 'Ɖè àsi lè mia ŋuti, ne mia sumɔ Ejiptèviwo! E nyɔ na mi, be mia sumɔ Ejiptèviwo, wu, ne mia ku lè zògbè ji.'”

¹³Mosè gblɔ̃ na dùkɔ̃a be: “Mì mu gbà vɔ̃ ò! Àgbɔ̃ ne jèpò na mì! Eye mì la kpɔ hlùɛ̃gã kè Tɔhonɔ̀ la na mì egbèa! Mì àmè kèwo kpɔ Ejiptèviwo egbèa, mì mu la gbà kpɔ wo gbèɖe ke ò.

¹⁴Tɔhonɔ̀ ye la wɔ̀ àvũ ɖo mìa ta. Mìawo yaa, mì nɔ̀ kpoo!”

¹⁵Tɔhonɔ̀ gblɔ̃ na Mosè be: “Nukɛ ŋuti wò le do àpa, le yɔ mù ɖo ò? Pò nupo na Izràɛlviwo, ne mìa so, jè èmɔ!”

¹⁶Èwò yaa, kɔ àtikplɔ wòa ɖo èji, vlũ àlɔ̀ ɖo àpùa ji, fɛ̃ ɛ̀ ɖo èvè, eye Izràɛlviwo ne zɔ̃, to àpùa be dòdòmè, lè ànyigbã pupuia ji.

¹⁷Ènyè yaa, mù la na Ejiptèviwo be ètamè la sɛ̃ŋu, ne woa kplɔ̀ Izràɛlviwo do, to àpùa be dòdòmè, eye mù la ɖè gogo nyè fiɔ, ɖo Faraɔ̀n ku yebe àhùakɔ̃wo keŋu ŋuti, ɖo yebe àhùakèkewo ku yebe èsɔdotɔwo ŋuti.

¹⁸Nène a ye Ejiptèviwo la nya be ènyè ye nyi Tɔhonɔ̀, wàlɛbɛ kè mù la ɖè gogo nyè fiɔ, ɖo Faraɔ̀n ku yebe àhùakèkewo ŋuti kudo yebe èsɔdotɔwo ŋuti.

¹⁹Mawu be àtikplɔtɔ kè xɔ̀ ŋùkɔ̀ na Izràɛlviwo be àhùakɔ̃a, jo va nɔ̀ ŋùgbedòmè na wo.

²⁰E va sò Ejiptèviwo ku Izràɛlviwo be àhùakɔ̃awo dòmè. Lilikpo bablaa le kɔ̀ àkpa ɖèka, vɔ̀a vìvìti lè àkpa èvègɔ̃a, eye lilikpoa kɔ̀nà èzã mè. Àhùakɔ̃ ɖekpekpe mu dɔ̃ gogo èvègɔ̃a gbɔ, èzãa mè ò.

²¹Mosè vlũ àlɔ̀ ɖo àpùa ji. Tɔhonɔ̀ na èwèzɛ̃pe be àya sɛ̃sɛ̃ ɖe pò lè èzãa kpata mè, eye be dɔ̃ àpùa yì. Èsìa mè fɛ̃ ɖo èvè.

²²Eye Izràɛlviwo zɔ̃ ɖo àpùa be dòdòmè, to ànyigbã pupuia ji; èsìawo wɔ̀ èkpa ɖo èmìɔ̃ mè ku ɖùsi mè na wo.

²³Ejiptèviwo, Faraɔ̀n be èsɔwo keŋu, yebe àhùakèkeawo keŋu ku yebe èsɔdotɔwo kpata kplɔ̀ Izràɛlviwo do kaka yì ɖo àpùa be dòdòmè.

²⁴Vɔ̀a, wàlɛbɛ kè èzãa le vɔ̀a, Tɔhonɔ̀ nɔ lilikpo ku èzò bablaa mè, le ŋùku ɖo Ejiptèviwo be àhùakɔ̃awo ŋuti, eye be titɔ wɔ̀nawo keŋu lè Ejiptèviwo dòmè.

²⁵E jã àhùakèkeawo be àfɔ̀wo, eye wo mu gbà teŋu le yì ŋùkɔ̀ ò. Eye Ejiptètɔwo gblɔ̃ be: “Mi si jo boo lè Izràɛlviwo gbɔ, ɖoa, Tɔhonɔ̀ ye le wɔ̀ àhùaa na wo!”

²⁶Tɔhonɔ̀ gblɔ̃ na Mosè be: “Vlũ àlɔ̀ ɖo àpùa ji: Èsìa ne trɔ va Ejiptèviwo ku woabe àhùakèkewo kudo woabe èsɔdotɔwo ji!”

²⁷Mosè vlũ àlɔ̀ ɖo àpùa ji. Ekè ŋùdekɛ̃nyɛ gogoa, àpùa gbà trɔ va yebe tèpe xoxoa, eye wàlɛbɛ kè Ejiptèviwo gbìgbɔ̀ trɔ, ne woa si yì ŋùgbea, wo dogò èsìa. Eye Tɔhonɔ̀ crɔ̃ Ejiptèviwo lè àpùa dòmè.

²⁸Èsìawo trɔ va cɔ̃ àhùakèkeawo ku èsɔdotɔawo. Faraɔ̀n be àhùakɔ̃ kèwo kpata ɖo àpùa mè, lè Izràɛlviwo yomè a be àmè ɖekpe mu kpɔ̀tɔ̀ ò.

²⁹Vɔ̀a Izràɛlviwo zɔ̃ ànyigbã pupui ji lè àpùa dòmè, wàlɛbɛ kè èsìawo wɔ̀ èkpa ɖo ɖùsi mè ku èmìɔ̃ mè na woa.

³⁰Gbè ŋua gbè, Tɔhonɔ̀ hlùɛ̃ Izràɛl gã, lè Ejiptè simè, eye Izràɛlviwo kpɔ Ejiptèviwo ku, lè àpùa ta.

³¹Izràɛl kpɔ àlɔ̀ sɛ̃sɛ̃ kè Tɔhonɔ̀ zã, ɖo Ejiptè ŋutia. Dùkɔ̃a vɔ̃ Tɔhonɔ̀, eye be xɔ̀sè ɖo Tɔhonɔ̀ ku Mosè, Tɔhonɔ̀ be sumɔ̃via ji.