Read gen Toto jo 15 Bible Online

Toto jo 15 - gen bible

Toto jo 15

¹Eye Mosè ku Izràɛlviwo jì èhà kèa na Tɔhonɔ̀. Wo ji èhà be:[3]. “Mù la ji èhà, sɔ kafu Tɔhonɔ̀, ɖoa, e wɔ̀ ènu jɔ̀ àsu. Èsɔ ku èsɔdotɔa, e crɔ̃ wo ɖo àpù mè.

²Tɔhonɔ̀ ye nyi àpe ŋusɛ̃[4]. E ye nyi hlùɛ̃gã nyè; mù la kafu ì, ɖoa, E ye nyi Mawu nyè, mù la lòlò è, ètɔ nyè be Mawu ye be nyi!

³Tɔhonɔ̀ nyi àhùawɔ̀tɔ, Tɔhonɔ̀ ye nyi yebe nyikɔ.

⁴Faraɔ̀n be àhùakèkewo ku àhùakɔ̃wo a, e crɔ̃ woa kpata ɖo àpù mè. Èsɔdotɔ kèwo sɛ̃ŋu wua, e nyrɔ̃ wo ɖo plãŋùpòfɛ̃wo be àpùa mè.

⁵Àvlìmè cɔ̃ woa ji, eye wo ɖo ègũa mè, sìgbè èkpe nène.

⁶Tɔhonɔ̀, ɖùsi-lɔ wòa le klɛ̃ ku ŋusɛ̃, Tɔhonɔ̀, ɖùsi-lɔ wòa gbã kɛ̃tɔa hãnyà hãnyà!

⁷Àpo ègãnyinyi ɖo kpɛ̃kpɛ̃ mè. E ye pò kɛ̃tɔ wòwo pu ànyi! Wò le bì ku àdɔ̀mèze ɖe kè le fiɔ̃ wo, sìgbè èbè nène.

⁸Àpo ŋɔ̀ti mè be gbɔ̃gbɔ̃, na èsìawo bɔ̀ ɖodu, eye èsìkɔ̃awo ɖo, sìgbè èglìwo nène, àvlìmè nɔ̀tè kpoo, lè àpùa dòmè.

⁹Kɛ̃tɔa le gblɔ̃ be: “Mù la tĩ woa yomè, mù la xe wo. Mù la ma àmɔ̀nyɔ̀nuawo, mù la ɖù, la ɖɔpò; mù la ɖè èwui nyè a to, eye àlɔ̀ nyè la crɔ̃ wo.”

¹⁰Wò na àya wòa pò, eye àpùa cɔ̃ woa ji. Wo nyrɔ̃ sìgbè suŋubui nène, ɖo èsì ɖìnyiawo mè.

¹¹Àmè kɛ ye lè sìgbè èwò nène, lè ènusɛ̃sɛ̃wo dòmè ò? Àmè kɛ ye lè sìgbè èwò nène, le klɛ̃ ku kɔ̀kɔ̀ɛ ò? Ekè be ènu jɔ̀ àsu wɔ̀wɔwo ɖo vɔ̃vɔ̃, ekè wɔ̀nà àmlìmànuwo ò?

¹²Wò vlũ àpo ɖùsi-lɔa, eye ànyigbã mì wo.

¹³Wò sɔ àpo màje kplɔ̀ dùkɔ̃ kè wò joa. Wò sɔ àpo ŋusɛ̃ kplɔ̀ ɛ̀ va àpo Nɔ̀pe Kɔ̀kɔ̀ɛ.

¹⁴Dùkɔ̃wo sè è, eye wo hũhũ, Filistì be èdùmèviwo ci jojojoe.

¹⁵Vɔ̃vɔ̃ jè Edɔ̀m be èfìɔwo ji, Mòab be èfìɔviwo le pò tìtìtì, Kanàn be èdùmèviwo keŋu, bu woabe èjìdodo.

¹⁶Àdìka le sò wo eye àvìvɔfu le wo. Àpo àlɔ̀ sɛ̃sɛ̃a na be wo zĩ toto. Eye wo ci hui, sìgbè èkpe nène, wàlɛbɛ kè dùkɔ̃ wòa va le yìa, Tɔhonɔ̀ wàlɛbɛ kè dùkɔ̃ kè wò cã a, va le yìa.

¹⁷Wò kplɔ̀ wo yì, eye wò li wo ɖo ètoa ji, ɖo tèpe kè wò jràɖo na àpo nɔ̀pea, Tɔhonɔ̀, wò jrà nɔ̀pe ɖo, tèpe kè wò la nɔ̀a. Tɔhonɔ̀, àlɔ̀ wòwo tù kɔ̀kɔ̀ɛpe.

¹⁸Tɔhonɔ̀ le ɖùfìɔ tɛ̀gbɛ̀-tɛ̀gbɛ̀!

¹⁹Faraɔ̀n be èsɔa ɖo àpùa mè ku yebe àhùakèkeawo, kudo yebe èsɔdotɔawo, eye Tɔhonɔ̀ na àpùa be èsìawo trɔ va cɔ̃ woa ji: vɔ̀a, Izràɛlviwo yaa, wo zɔ̃ ànyigbã pupui ji, lè àpùa dòmè.

²⁰Mawu be gblɔ̃ɖɛtɔ nyɔ̃nù kè wo yɔna be Mirìam, Arɔ̀n be nɔ̀viaa, sɔ àsihũvi; nyɔ̃nùwo keŋu to jè e yomè; wo le pò àsihũvia, eye wo le ɖuwè.

²¹Eye Mirìam to èhà ɖoɖa be: “Mì jì èhà kafu Tɔhonɔ̀, E wɔ̀ ènu jɔ̀ àsu. Èsɔ ku èsɔdotɔa, e sɔ wo dãŋùgbe ɖo àpù mè!”

²²Mosè kplɔ̀ Izràɛlviwo jo lè plãŋùpòfɛ̃ be àpùa to, eye wo va yì jè Sur be zògbè a ji lɔ̀ge. Wo zɔ̃ lè zògbè a ji ŋùkèkè ètɔ̃, kè wo mu kè ɖo èsì ŋuti ò a.

²³Wo va ɖo Marà, vɔ̀a, wo mu teŋu nù Marà be èsìa ò, ɖo, e vejè kpàa, àfi kèa ye wo kpɔ 'Marà' be nyikɔa so.

²⁴Dùkɔ̃a ɖù àɖuklui so Mosè ŋuti be: “Nukɛ ye mi la nù ò?”

²⁵Mosè do àpa ɖoɖa Tɔhonɔ̀, eye Tɔhonɔ̀ sɔ àti ɖe ŋùkumè fiɔ Mosè. E kã yebe èɖe, dà ɖo èsìa mè; èsìa trɔ, eye be vivi. Tèpe kèa ye Tɔhonɔ̀ sɔ kɔ̀nu ku èse ɖewo do àsi na wo lè. Tèpe kèa ye be do wo kpɔ lè.

²⁶E gblɔ̃ be: “Ne wò ɖo èto Tɔhonɔ̀ kè nyi àpo Mawu a be ègbè nyuɛ̃ ɖe a, ne wò wɔ̀ ènu kè jè ŋùmè na ɛ̀a, ne wò ɖo èto yebe èsewo, ne wò le yebe ɖoɖowo ɖo àsia, nyè mu la sɔ èdɔ̀ kèwo mù sɔ dɔ̃ èto na Ejiptè a, dòmètɔ ɖekpe dɔ̃ èto na wò ò, ɖoa, ènyè Tɔhonɔ̀ ye dànà èdɔ̀ na wò.”

²⁷Wo va ɖo Elìm. Èsìdo woèvè ku ède vivi be àti kàtakpo ci-èwo lè funua. Wo do àsàɖa ɖo èsìa to.