Read gen Toto jo 17 Bible Online

Toto jo 17 - gen bible

Toto jo 17

¹Izràɛlviwo be àmèha a kpata jo lè Sin be zògbè a ji, eye wo le zɔ̃ èmɔ lè Tɔhonɔ̀ be ɖoɖo nu. Wo do àsàɖa ɖo Rèfidìm, vɔ̀a, èsì mu lè, ne dùkɔ̃a bèa nù ò.

²Dùkɔ̃a ɖè àjrè kpe na Mosè. Wo gblɔ̃ be: “'Mì na mi èsì ne mia nù.” Mosè gblɔ̃ na wo be: “'Nukɛ ŋuti mì le wɔ̀ àjrè ku mù ɖo ò? Nukɛ ŋuti mì le tè Tɔhonɔ̀ kpɔ ɖo ò?”

³Kè wo lè funua, sìkɔ tì wo; dùkɔ̃a pò nupo ɖo Mosè ŋuti be: “'Nukɛ ŋuti ye wò kplɔ̀ mi to lè Ejiptè ɖo ò? Ne sìkɔ bèa tì mia ku miabe èviwo kudo miabe èlãhawo, ne mia ku ŋuti ye à?”

⁴Mosè do àpa ɖoɖa Tɔhonɔ̀ be: “'Nukɛ ye mù la wɔ̀ na dùkɔ̃ kèa ò? Zãa ɖe fifìa, èkpe kpò wo la pò mù, wù.”

⁵Tɔhonɔ̀ ɖo e ŋuti na Mosè be: “'Jè ŋùkɔ̀ na dùkɔ̃a; kplɔ̀ Izràɛl be àmèsĩsĩ ɖewo ɖo àsi; sɔ àtikplɔ kè wò sɔ pò èsìa jia ɖo àsi, ne wòa jè èmɔ.

⁶Mù la nɔ̀ ŋùkɔ̀ na wò, yì funu, lè Horɛb be àkpãa tamè. Wò la pò àkpãa, èsì la to so e mè, eye dùkɔ̃a la nù ì.” Mosè wɔ̀ ekèa, lè Izràɛl be àmèsĩsĩwo be ŋùmè.

⁷E ɖo nyikɔ na tèpe kèa be Masà ku Meribà, Tètèkpɔ ku Àjrè, ɖoa, Izràɛlviwo ɖè àjrè kpe na ɛ̀, eye wo tè Tɔhonɔ̀ kpɔ, wàlɛbɛ kè wo gblɔ̃ be: “'Tɔhonɔ̀ lè mia dòmè loo, àlo mu lè ò?”

⁸Eye, Àmàlɛk va wɔ̀ àhùa ku Izràɛl lè Refidim.

⁹Mosè gblɔ̃ na Yosùa be: “Cã ŋusùwo, eye wòa yì wɔ̀ àhùa ku Àmàlɛk. Èsɔ̀a, mù la nɔ̀tè ɖo ètokɔ̃ɛa tamè, mù la le Mawu be àtikplɔa ɖo àsi.”

¹⁰Yosùa kpe àhùa ku Àmàlɛk, sìgbè àlekè Mosè gblɔ̃ na ɛ̀a nène. Wàlɛbɛ ŋua, Mosè, Arɔ̀n ku Xur lia ètokɔ̃ɛa ji.

¹¹Eye ne Mosè kɔ àlɔ̀ yì èjia, Izràɛl be ŋusɛ̃ zena, eye ne Mosè bɔ̀bɔ̀ àlɔ̀ a, Àmàlɛk be ŋusɛ̃a zena.

¹²Wàlɛbɛ kè àbɔ le ku Mosè a, wo sɔ èkpe ɖo Mosè gɔ̃mè, eye be bɔ̀bɔ̀ nɔ̀ ànyi ɖo e ji. Arɔ̀n ku Xur nɔ̀tè lè yebe àxàdawo mè, eye wo le yebe àbɔwo ɖo àsi. Nène a ye wo le yebe àlɔ̀wo ɖo tè, kaka na èwèa be èxɔ̀ ɖoɖo.

¹³Eye Yosùa be èwui ɖaɖaa, ɖù Àmàlɛk ku yebe dùkɔ̃a ji.

¹⁴Tɔhonɔ̀ gblɔ̃ na Mosè be: “Ŋlɔ̀ ènu kèa ɖo xoma a mè, ne wòa sɔ nɔ ɖo ŋùku e ji, eye wòa na, bèa ɖo Yosùa be ètowo mè: mù la crɔ̃ Àmàlɛk be nyikɔ lè jìjimèwo be susu mè; mù la tutu ì lè ànyigbã ji keŋu-keŋu[5]!”

¹⁵Mosè li vɔsakpe, eye be yɔ ɛ̀ be: “Tɔhonɔ̀, àplãŋuga nyè.”

¹⁶E gblɔ̃ be: “Ekè àmè ɖe ɖè àlɔ̀ ɖo Tɔhonɔ̀ be èfìɔzìkpe ŋutia, so egbè jia, àhùa ye la nɔ̀ Tɔhonɔ̀ ku Àmàlɛk dòmè!”