Read gen Toto jo 18 Bible Online

Toto jo 18 - gen bible

Toto jo 18

¹Yetrò, Madìan be hũbonɔ, kè le nyi Mosè be ètoa, sè ènu kèwo keŋu Tɔhonɔ̀ wɔ̀ na Mosè ku Izràɛl kè le nyi yebe dùkɔ̃a: Tɔhonɔ̀ ɖè Izràɛl to lè Ejiptè!

²Yetrò, Mosè be ètoa, kplɔ̀ Sìporà, Mosè be èsrɔ̃a, ekè wo ɖo è ɖoɖa àxue yomè a,

³ku èvia ŋusùvi èvèawo: wo yɔna ɖèka be Gɛrsɔ̀m, kè gɔ̃mè ye nyi: àmè ke hũ va funua, ɖoa Mosè gblɔ̃ be: “'Mù trɔ zũ àmèjro lè àmèjro-nyigbã ji.”

⁴Èvègɔ̃a, wo yɔna ɛ̀ be Eliezɛr. Nyikɔa gɔ̃mè ye nyi: Mawu nyè ye nyi hlùɛ̃tɔ, ɖoa, Mosè gblɔ̃ be: “Ètɔ nyè be Mawu ye va hlùɛ̃ mù gã, eye be ɖè mù lè Faraɔ̀n be èwui nu.”

⁵Mosè be èto, Yetrò, èviawo ku èsrɔ̃a, yì Mosè gbɔ lè zògbè kè ji be do àsàɖa ɖoa, lè Mawu be ètoa ji.

⁶E na wo gblɔ̃ na Mosè be: “Ènyè Yetrò, kè nyi èto wòa, ye gbãnà gbɔ wò ku èsrɔ̃ wò kudo èvia ŋusù èvè kèwo ye kplɔ̀ ɛ̀ do a.”

⁷Mosè to va dogò ètoa, e do èta gũ na ɛ̀, eye be kpla àsi èkɔ̀ na ɛ̀; wo do ègbè na woa nɔ̀nɔwo eye wo ɖo gòxɔa gɔ̃mè.

⁸Mosè gblɔ̃ ènu kèwo keŋu Tɔhonɔ̀ wɔ̀ na Faraɔ̀n ku Ejiptè ɖo Izràɛl ŋutia na ètoa; e gbà gblɔ̃ tùkaɖa kèwo keŋu kpe wo lè zògbè a ji, eye ekèwo mè Tɔhonɔ̀ ɖè wo to lèa na ɛ̀.

⁹Yetrò kpɔ jìjɔɛ so ènyuɛ̃ kè kpata Tɔhonɔ̀ wɔ̀ na Izràɛl, wàlɛbɛ kè be hlùɛ̃ ɛ̀, Ejiptètɔwo sia.

¹⁰Eye Yetrò gblɔ̃ be: “'Sìtu na Tɔhonɔ̀ kè hlùɛ̃ mì gã so Ejiptètɔwo ku Faraɔ̀n si, àmè kè ɖè dùkɔ̃a so Ejiptètɔwo sia!

¹¹Mù kpɔ ɛ̀ jèsi fifìa be Tɔhonɔ̀ wu gã ènu sɛ̃sɛ̃wo kpata, ne woawo yaa, wo lè àdã ji, ɖo Tɔhonɔ̀ be àmèwo ŋuti ŋutɔ cã a.”

¹²Mosè be èto, Yetrò kpɔ gomè lè ènu mème vɔsa ku vɔsa buwo mè na Mawu. Arɔ̀n ku Izràɛl be àmèsĩsĩwo va ɖùnu ku Yetrò, Mosè be ètoa, lè Mawu be ŋùmè.

¹³Eye ekè èŋù kèa, Mosè nɔ̀ ànyi, ne bèa ɖo kòjo na dùkɔ̃a, eye dùkɔ̃a nɔ̀ Mosè be ŋùkɔ̀, so ŋùdekɛ̃nyɛ kaka va na fìɛ̃si.

¹⁴Mosè be ètoa kpɔ ènu kèwo keŋu Mosè le wɔ̀ na dùkɔ̃a; e biɔ ɛ̀ be: “'Nukɛ ye nyi eŋuã kè wò le wɔ̀ na dùkɔ̃a ò? Nukɛ ŋuti wò ɖèka wò nɔ̀ ànyi, wàlɛbɛ kè dùkɔ̃a keŋu lè ètènu, so ŋùdekɛ̃nyɛ, kaka va na wètrɔ ɖo ò?”

¹⁵Mosè ɖo e ŋuti na ètoa be: “Ènu kè mù le wɔ̀a ye nyi be, dùkɔ̃a le va gbɔ nyè, ne bèa biɔ ènu gɔ̃mè sè Mawu.

¹⁶Ne ènyàa ɖe lè woa dòmèa, wo va kpɔna mù, mù sènà màsɔ̀-màsɔ kè lè woa dòmèa, eye mù nana wo nyana Mawu be ɖoɖoawo ku yebe èseawo.”

¹⁷Mosè be ètoa ɖo e ŋuti na ɛ̀ be: “'Àlekè wò le wɔ̀a, mu nyɔ ò!

¹⁸Ènu la tìkɔ̀ na wò ku dùkɔ̃ kè wo do àsi na wòa. Èdɔa sɛ̃ŋu na wò wu nu. Wò ɖèka, wò mu la teŋu wɔ̀ ɛ̀ ò.

¹⁹Fifìa, ɖo èto àpe ègbè! Mù le pòtoɖo na wò, eye Mawu ne nɔ̀ ku wò! Wò la nyi dùkɔ̃a be tèpenɔ̀tɔ lè Mawu be ŋùmè; èwò ye la nɔ sɔ woabe ènyàwo ɖo Mawu be ŋùkɔ̀.

²⁰Èwò ye la nɔ ɖè Mawu be ɖoɖoawo, ku yebe èseawo be ègbè na àmèawo. E wò ye la nɔ fiɔ wo, àfɔ̀ kè wo la nɔ ɖèa, ku nɔ̀nɔmè kè wo la nɔ ɖoa.

²¹Fifìa, wò la le ŋùkuvi ɖo ŋusù kèwo jè na bùbu, kèwo vɔ̃na Mawu, kèwo ŋuti wò teŋu dojì ɖoa, kèwo àmèwo mu teŋu flù ku ègà, àlo, ènu bu ò a, eye wò la sɔ wo ɖo dùkɔ̃a nu, sìgbè àmè èkà èwì vɔ àtɔ̃ (1000) be èga, àlo, àmè àlɔ̀ ɖèka (100) be èga, àlo, àmè èkà ci èwowo (50) be èga, ku àmè èwowo be èga nène.

²²Wo la nɔ ɖokòjo na dùkɔ̃a wè sia wè. Ènyà kèwo lè veveɖea ye wo la nɔ hɛ̃ va na wò; ekèwo mu lè veveɖe ò a, woa ŋutɔwo, wo la nɔ ɖo woabe kòjo. Nène a, wò la ɖè àgbã kpɔ̀tɔ̀ lè ɖokoe wò ji; wo ne dro è ku wò!

²³Ne wò wɔ̀ nènea, Mawu la nɔ na wò, yebe ègbèɖèɖewo; wò la teŋu kpe èdɔa ji, eye, sɔ wua, dùkɔ̃ kèa kpata la yì àxue lè ŋuti fàfa mè.”

²⁴Mosè ɖoto ètoa, eye be wɔ̀ ènu kèwo keŋu be gblɔ̃ na ɛ̀a.

²⁵Lè dùkɔ̃a keŋu mèa, Mosè cã ŋusù kèwo ɖo bùbua, eye be sɔ wo ɖo dùkɔ̃a nu: e ɖo wo àmè èkà èwì vɔ àtɔ̃wo (1000) be èga, àmè èkà èvè takpowo (100) be èga, ku àmè èkà ci èwo (50) ku àmè èwowo be èga.

²⁶Wo le ɖokòjo na dùkɔ̃a wè sia wè. Ènu kè sɛ̃ŋua, wo sɔna ɛ̀ va nana Mosè, vɔ̀a, ènu kè mu sɛ̃ŋu ò a, woawo ŋutɔ, wo ɖona yebe kòjo.

²⁷E yomè a, Mosè ɖè àsi lè ètoa ŋuti, eye be jo yì àxue.