Read gen Toto jo 19 Bible Online

Toto jo 19 - gen bible

Toto jo 19

¹Ekè wo to lè Ejiptè, wètri ètɔ̃ yomè tututua, Izràɛlviwo va ɖo Sinaì be zògbè a ji.

²Wo jo lè Refidìm, eye wo va yì ɖo Sinaì be zògbè a ji, eye wo do àsàɖa ɖo zògbè a ji. Izràɛl do àsàɖa lè tèpe kèa, kpãŋùkɔ̀ ètoa.

³Mosè yaa lia ètoa, yì Mawu gbɔ. Tɔhonɔ̀ yɔ ɛ̀ lè ètoa ji, eye be gblɔ̃ na ɛ̀ be: “'Wo la gblɔ̃ ènyà kèa na Yakɔb be àxuea, eye wò la sɔ ènufiɔàmè kèa do àsi na Izràɛlviwo:

⁴'Mìawo ŋutɔ, mì kpɔ ènu kè mù wɔ̀ ku Ejiptè a; mì kpɔ àlekè mù kɔ mì, sìgbè àlekè èhɔ̃ kɔna èvia ɖo àwàda jia nène, eye mù kplɔ̀ mì va ɖo kaka gbɔ nyè.

⁵Eye fifìa, ne mì sè ègbè na mù, eye mì le zòɖùɖu nyèa ɖo àsia, mì la nyi nyè ŋutɔ tɔ̀ nyè, lè dùkɔ̃wo keŋu dòmè, ɖoa, tɔ̀ nyè ye nyi ànyigbã a kpata.

⁶Eye mì la nyi hũbonɔwo be fìɔdu ɖe na mù, ku dùkɔ̃ kɔ̀kɔ̀ɛ ɖe na mù.' Ènyà kèawo ye wò la gblɔ̃ na Izràɛlviwo.”

⁷Mosè gbɔ̀ va, eye be yɔ dùkɔ̃a be àmèsĩsĩwo, eye be ɖè ènyà kèawo keŋu, ku ènu kèwo Tɔhonɔ̀ do àsi na ɛ̀a, na wo.

⁸Dùkɔ̃a keŋu ɖo e ŋuti ku ègbè ɖèka be: “'Mi la wɔ̀ ènu kèwo keŋu Tɔhonɔ̀ gblɔ̃a.” Eye Mosè trɔ sɔ dùkɔ̃a be ègbèa yì na Tɔhonɔ̀.

⁹Tɔhonɔ̀ gblɔ̃ na Mosè be: “'Kpɔɖa, mù la va kaka gbɔ wò, lè lilikpo bablaa be tìtri mè, ne dùkɔ̃a bèa sè, wàlɛbɛ kè mù la pò nupo ku wòa, eye bèa dojì ɖo wò cã ŋuti wò, kaka sɔ yì.” Eye Mosè gbà trɔ sɔ dùkɔ̃a be ègbè do àsi na Tɔhonɔ̀.

¹⁰Tɔhonɔ̀ gblɔ̃ na Mosè be: “'Yì dùkɔ̃a gbɔ, eye wòa kɔ̀ e ŋuti egbè ku èsɔ̀. Wo ne nyà woabe àwùwo.

¹¹Wo ne sɔ̀gbè na ŋùkèkè ètɔ̃gɔ̃a, ɖoa, ŋùkèkè ètɔ̃gɔ̃a gbè ye Tɔhonɔ̀ la ɖì va Sinaì be ètoa ji, lè dùkɔ̃a kpata be ŋùmè.

¹²Na lipò dùkɔ̃a trɔdo gòdò, eye gblɔ̃ na wo be: 'Mì mu gbà lia ètoa ji ò, eye mì mu gbà tɔ àsi e ŋuti ò.' Àmè ɖekpekpe àmè kè la tɔ àsi ètoa ŋutia, la ku!

¹³Àlɔ̀ ɖekpe mu la tɔ àmè kè jèagɔ̀a ŋuti ò: wo la pò èkpe è wù, àlo, wo la trɔ̃ ɛ̀ ènu. Àgbètɔ, àlo, èlã kè la jè leke be àgɔ̀a, mu ɖo la ci àgbè ò. Ne wo ku èzèa, àmè ɖewo la yì ètoa ji.”

¹⁴Mosè ɖì so ètoa ji, va dùkɔ̃a gbɔ. E kɔ̀ dùkɔ̃a ŋuti, eye wo nyà woabe àwùwo.

¹⁵Eye e gblɔ̃ na dùkɔ̃a be: “'Lè ŋùkèkè ètɔ̃ mèa, mìa sɔ̀gbè. Àmè ɖekpe mu la gogo nyɔ̃nù ò!”

¹⁶Eye, lè ŋùkèkè ètɔ̃gɔ̃a gbèa, kè ŋùdekɛ̃nyɛ mè ɖoa, ègbèwo ɖì, bìɖàwo ze, lilikpo babla ɖe cɔ̃ ètoa ji, eye èzè sɛ̃ŋu ɖe be ègbè ɖì. Àmè sia àmè pò tìtìtì, lè àsàɖaa mè.

¹⁷Mosè na dùkɔ̃a to lè àsàɖaa mè, ne bèa yì dogò Mawu, eye wo yì nɔ̀ kaka ètoa gɔ̃mè.

¹⁸Àzìzɔ bla Sinaì be ètoa keŋu-keŋu, ɖoa, Tɔhonɔ̀ ɖì va e ji, lè èzò mè; yebe àzìzɔa le yì èji, sìgbè èkpo be àzìzɔ nène, eye ètoa kpata le hũhũ sɛ̃sɛ̃ɖe.

¹⁹Èzèa be ègbè gbà le ɖì sɛ̃sɛ̃ɖe kpe è: Mosè le pò nupo, eye Mawu le ɖo e ŋuti na ɛ̀ ku ègbè kè sɛ̃ŋu sìgbè èji be ègbèɖèɖe nène.

²⁰Tɔhonɔ̀ ɖì va Sinaì be ètoa ji, lè ètoa tamè, eye Tɔhonɔ̀ yɔ Mosè yì ètoa tamè. Mosè yì ètoa ji.

²¹Tɔhonɔ̀ gblɔ̃ na Mosè be: “Ɖì yì, sìa dùkɔ̃a be mu gbà ciji tùtà Tɔhonɔ̀ gbɔ, ne bèa kpɔ ɛ̀ ò! Ɖo woa dòmètɔ sùgbɔ la va crɔ̃.

²²Eye hũbonɔ kèwo la gogo Tɔhonɔ̀a ŋutɔ cã, wo ne lè woa ɖokoewo ɖì, ne mu nyi nène òa, Tɔhonɔ̀ la crɔ̃ wo.”

²³Mosè gblɔ̃ na Tɔhonɔ̀ be: “'Dùkɔ̃a mu la teŋu lia Sinaì be ètoa ji ò, ɖoa, wò ŋutɔ, wò sìa mi be: Ɖo lipò lè ètoa ŋuti na wo, eye wòa wɔ̀ ɛ̀ kɔ̀kɔ̀ɛ!”

²⁴Tɔhonɔ̀ gblɔ̃ na ɛ̀ be: “Ɖì yì, eye wò ku Arɔ̀n mìa va. Vɔ̀a, hũbonɔwo ku dùkɔ̃a mu gbà ciji, va Tɔhonɔ̀ gbɔ ò; ne mu nyi nène ò a, Tɔhonɔ̀ la crɔ̃ wo!”

²⁵Mosè ɖì va dùkɔ̃a gbɔ, eye be pò nupo na ɛ̀.