Read gen Toto jo 20 Bible Online

Toto jo 20 - gen bible

Toto jo 20

¹Eye Tɔhonɔ̀ gblɔ̃ ènyà kèawo keŋu be:

²“Ènyè ye nyi Tɔhonɔ̀, àpo Mawu, kè ɖè wo to so Ejiptè, lè kluvi nyinyi be àxomèa.

³Wò mu la gbà ɖo vòduwo, bɔ̀ ɖo ŋuti nyè ò.

⁴Wò mu la wɔ̀ legba, àlo, ènu bu kè la ɖo ènu kè lè jiŋùkusi, àlo, lè ànyigbã ji, àlo, lè èsì kè lè ànyigbã gɔ̃mèa mè, be nɔ̀nɔmè ò.

⁵Wò mu la do èta ègũ na vòdu ŋuawo ò, eye wò mu la sumɔ wo ò;[6] ɖoa, ènyè ye nyi Tɔhonɔ̀, àpo Mawu kè nyi Mawu ɖe kè hùãnàŋu, àmè kè jènà àjìtɔwo be èvuɛ̃ yomè, yì èviwo gbɔ, kaka na jìjimè ètɔ̃ ku ènè mè, ne wo crì mù a,

⁶vɔ̀a, ɖènà yebe ànùkua fiɔna jìjimè èkàwì vɔ àtɔ̃wo,[7] ne wo lɔ̃ mù, eye wo le èse nyèwo ɖo àsia.

⁷Wò mu la yɔ Tɔhonɔ̀, àpo Mawu be nyikɔ yàkà ò[8]ɖoa, Tɔhonɔ̀ mu la sɔ kè àmè kè yɔna yebe nyikɔ yàkàa àgɔ̀màje ò.

⁸Le ŋùku ɖo jɛ̃gbɔ̃zãa ŋuti, eye mìa kɔ̀ e ŋuti.

⁹Ŋùkèkè àdɛ̃ ye wò la wɔ̀ èdɔ, eye wò la wɔ̀ èdɔ wòwo keŋu.

¹⁰Vɔ̀a, ŋùkèkè adrɛ̃gɔ̃ a, Tɔhonɔ̀, àpo Mawu be jɛ̃gbɔ̃zã gbè ye be nyi. Wò mu la wɔ̀ èdɔ ɖekpe lè e ji ò; èwò ŋutɔ loo, èvi wò ŋusù loo, àlo, èvi wò nyɔ̃nù; ne nyi sumɔ̃vi wò ŋusù loo, sumɔ̃vi wò nyɔ̃nù loo, àlo, ne nyi àpo èlã wòwo, àlo, àmèjro kè lè àpo àgbowo mèa.

¹¹Ɖoa, ŋùkèkè àdɛ̃ mè ye Tɔhonɔ̀ wɔ̀ jiŋùkusi ku ànyigbã, àpù ku ènu kèwo keŋu lè woa mèawo; vɔ̀a e gbɔ̃jɛ̃ lè ŋùkèkè adrɛ̃gɔ̃ a gbè. Ekèa ŋuti ye Tɔhonɔ̀ tu sì na jɛ̃gbɔ̃zãa, eye be kɔ̀ e ŋuti ɖo[9].

¹²Bù ètɔ wò ku ènɔ̀ wò, ne àgbè nɔ̀-zã wòwo ne dìdì lè ànyigbã kè Tɔhonɔ̀ àpo Mawu na wòa ji[10].

¹³Mù gbà wù àmè ò[11].

¹⁴Mù gbà wɔ̀ àhasì ò[12].

¹⁵Mù gbà fìfĩ ò[13].

¹⁶Mù gbà ɖù àjè be ɖase ɖo èha wòvi ŋuti ò[14].

¹⁷Mù gbà bìaŋù ɖo èha wòvi be àxue ŋuti ò. Mù gbà bìaŋù ɖo èha wòvi be èsrɔ̃, yebe sumɔ̃vi ŋusù, yebe sumɔ̃vi nyɔ̃nù, yebe ènyì, àlo, yebe èsɔ-àkɛtɛ, àlo, ɖo ènu ɖekpe kè nyi èha wòvi tɔ̀a ŋuti ò[15].

¹⁸Dùkɔ̃a keŋu le sè ègbèawo, èkpɛ̃ be ɖìɖi, e le kpɔ bìɖàwo, èto kè le tù àzìzɔa. Ekè dùkɔ̃a kpɔ ekèa, e pò tìtìtì, eye be nɔ̀ àzɔ̀ge.

¹⁹Wo gblɔ̃ na Mosè be: “'Wò ŋutɔ pò nupo na mi, eye mi la ɖo èto. Vɔ̀a, Mawu mu gbà pò nupo na mi ò. Ne mu nyi nène ò a, mi la va ku[16].”

²⁰Mosè gblɔ̃ na dùkɔ̃a be: “Mì mu gbà vɔ̃ ò! Ɖoa, Tɔhonɔ̀ va, ne bèa sɔ do mì kpɔ ye; e wɔ̀ ekèa, ne yebe vɔ̃vɔ̃ ne nɔ̀ mìa mè, àleke be mì mu gbà wɔ̀ èvuɛ̃ ò.”

²¹Eye dùkɔ̃a nɔ àzɔ̀ge, vɔ̀a, Mosè dɔ̃ gogo lilikpo babla yìbɔ kè mè Mawu lèa.

²²Tɔhonɔ̀ gblɔ̃ na Mosè be: “Ènyà kèwo wò la gblɔ̃ na Izràɛlviwoa ye nyi ekèa: 'Mìa ŋutɔ, mì kpɔ be, so kaka èji hũi ke, mù pò nupo ma mì so.

²³Mì mu la wɔ̀ klòsalò, àlo, sìka be vòdu ɖe, kpe ɖo ŋuti nyè ò; mì mu la wɔ̀ nène be ènu ɖe be nɔ̀nɔmè na mìa ɖokoe ò.

²⁴Wò la sɔ ànyikɔ li vɔsakpe na mù, eye wò la nɔ tɔzò ènumème vɔsa wòwo, la nɔ wɔ̀ ŋuti fàfa vɔsa wòwo lè e ji; àlɛ̃ ku ègbɔ, ku ènyì wòawo mè, wò la nɔ sɔ lè, nɔ savɔ na mù. Àfi ɖekpekpe kè, mù la na wò la ɖoŋùku nyikɔ nyè ji lèa, mù la va gbɔ wò, eye mù la tu sì na wò.

²⁵Vɔ̀a, ne wò be yè la sɔ èkpe ɖo vɔsakpe na mù a, wò mu la wɔ̀ ɛ̀ ku èkpe kèwo lòlòa ò. Ɖoa, ne wò sɔ èkpe-kpànu ɖo èkpeawo ŋutia, wò la gble woabe èkɔ̀do.

²⁶Wò mu la lia àcrɔkpe sɔ yì vɔsakpe nyèa ji, ne àpo àma bèa va ze ò!'”