Read gen Toto jo 21 Bible Online

Toto jo 21 - gen bible

Toto jo 21

¹Ɖoɖo kèwo wò la sɔ fiɔ woa ye nyi ekèawo:

²Ne wò plè kluvi ɖe kè nyi Hebrùvia, e la wɔ̀ èdɔ na wò, èpè àdɛ̃. Èpè adrɛ̃gɔ̃ a, e la teŋu jo fàa, la vò.

³Ne ye ɖèka ye ɖo èdɔ mè na wòa, ye ɖèka ke ye la jo. Ne èsrɔ̃ lè e si, keŋu gbɔ̀xue be vaa, ye ku èsrɔ̃a ye la jo.

⁴Ne àpetɔa ye na ɛ̀ nyɔ̃nù, eye nyɔ̃nùa jì ŋusùvi ku nyɔ̃nùviwo na ɛ̀a, nyɔ̃nùa ku èviawo la nyi yebe àpetɔa tɔ̀, eye ye ŋutɔ ɖèka kpò ye la jo.

⁵Vɔ̀a, ne kluvia gblɔ̃ be: 'Mù lɔ̃ àpetɔ nyè, eye mù lɔ̃ èsrɔ̃ nyè ku èvi nyèwo; nyè mu ji la jo ò'.

⁶Àpetɔa la kplɔ̀ ɛ̀ gogo Mawu, è la kplɔ̀ ɛ̀ va èxɔ̀a mɔnu, àlo, hɔ̃trutiawo gbɔ, eye àpetɔa la ŋɔ èto na ɛ̀; so wàlɛbɛ ŋua, e teŋu sumɔ ɛ̀ kaka sɔ yì.

⁷Eye, ne ŋusù ɖe sà èvia nyɔ̃nù, sìgbè kòsì nènea, nyɔ̃nùvia mu la jo, sìgbè lekè kluvi ŋusùwo jonaa nène ò.

⁸Ne mu gbà jɔ̀jì na àpetɔa, ne bèa ɖè è òa, àpetɔa la na, wo la gbìgbɔ̀ xɔ̀ ɛ̀ plè. Mu kpɔ èmɔ̃, la sà ɛ̀ do dùkɔ̃ bu mètɔ ɖe ò. Eŋuã la nyi be e jo flù ì, vɔ̀a gbe be yè mu la ɖè è ò.

⁹Ne e sɔ ɛ̀ na ye ŋutɔ èvia ŋusùa, e ɖo la zɔ̃ ɖo ɖoɖo kèwo lè na èvi nyɔ̃nùwo be èsrɔ̃ɖèɖea ji.

¹⁰Ne e gbà sɔ nyɔ̃nùvi bu la ɖèa, mu la ɖè yebe ènu ɖùɖu ji, àlo, yebe àwùdodo, àlo, yebe dɔ̃pe ji kpɔ̀tɔ̀ ò.

¹¹Eye, ne àpetɔa, mu le na ènu ètɔ̃ kèawo le sù nyɔ̃nùvi kèa si ò a, eŋuã, e teŋu jo, èfɛ̃ ɖekpe màtu.

¹²Ne àmè ɖe pò àmè wùa, eŋuã, wo ɖo la wù ye cã[17].

¹³Gãkea, ne àmè ɖe mu ɖo è, gbɔ̀xue wù àmè ò, eye, Mawu ŋutɔ ye to e ji, sɔ xɔ̀ àmè ɖe be àgbèa, mù la fiɔ wò tèpe ɖe kè nènemea la teŋu si yì bè ɖoa[18].

¹⁴Vɔ̀a, ne àmè ɖe do àdɔ̀mèze ɖo yebe èhavi ŋuti, kaka sɔ àyè wù ìa, ne e bè ɖo vɔsakpe nyè mè ŋutɔ cã a, wo la ɖè è to, ne bèa ku.

¹⁵Eye àmè ɖekpekpe àmè kè pò ètɔa, àlo, ènɔa, wo la wù ì.

¹⁶Eye, ne àmè ɖe fĩ àgbètɔ, ne e sà àmèa, àlo, wo kpɔ ɛ̀, lè e simèa wo la wù ì[19].

¹⁷Ne àmè ɖe zũ ètɔa, àlo, ènɔa, wo la wù ì[20].

¹⁸Ne àmèwo le wɔ̀ àjrè, eye woa dòmètɔ ɖèka pò èkpe, àlo, tù èkɔ̃ nɔ̀via, ne àmè kèa mu ku ò, vɔ̀ ci àba jia,

¹⁹ne e la teŋu sitè, la yì xixenu ku èkpòa, wo mu la wɔ̀ ènu ɖe na àmè kè pò àmèa ò. Ɖe kpò be la tu wàlɛbɛ kè àmè kè be pòa mu wɔ̀ èdɔ ɖe ò a be èfɛ̃ na ɛ̀. Eye be la dà èdɔ̀ na ɛ̀, kaka na gà kè mè lãmè la xaya na ɛ̀ keŋu-keŋu a.

²⁰Eye ne àmè ɖe sɔ kpòti pò yebe kluvi ŋusù, àlo, yebe kluvi nyɔ̃nù, eye be ku, lè e simèa, wo ɖo la biɔ yebe èhlɔ̃.

²¹Vɔ̀a, ne e ci àgbè ŋùkèkè ɖèka, àlo, èvèa, wo mu la biɔ yebe èhlɔ̃ ò, ɖoa, àpetɔa be ègà ye plè è.

²²Eye, ne ŋusùwo le wɔ̀ àvũ, eye wo lɔ èfunɔ̀ ɖe a, ne e jì ɖèvia, àzã màsù, eye àfɔ̀ku ɖe mu so e mè ò a, wo la kã èfɛ̃ na wo.

²³Vɔ̀a, ne èvuɛ̃ ɖe so e mèa, wò la tu yebe èfɛ̃, àgbè ɖo àgbè tèpe,

²⁴ŋùku ɖo ŋùku tèpe, àɖu ɖo àɖu tèpe, àlɔ̀ ɖo àlɔ̀ tèpe, àfɔ̀ ɖo àfɔ̀ tèpe,

²⁵èzò fiɔ̃ àmè ɖo èzò fiɔ̃ àmè tèpe, àbì ɖo àbì tèpe, lãmè-ve ɖo lãmè-ve tèpe.

²⁶Eye, ne àmè ɖe pò yebe kluvi ŋusù, àlo, kluvi nyɔ̃nù, eye ŋùkuvi gbã na ɛ̀a, e la ɖè àsi lè e ŋuti, be la jo, ɖo yebe ŋùkuvi gbãgbãa nu.

²⁷Eye, ne yebe kluvi ŋusù be àɖu, àlo, yebe kluvi nyɔ̃nù be àɖu ye be sũa, e la ɖè àsi lè e ŋuti, be la jo, ɖo yebe àɖua nu.

²⁸Eye, ne ènyì ɖe tù àzò ŋusù ɖe, àlo, nyɔ̃nù ɖe, eye be kua, wo la pò èkpe ènyìa wù, eye àmè ɖekpe mu la ɖù yebe èlã ò, eye àmè kè tɔ̀ ye ènyìa nyia, mu la na àjɔ̀ ò.

²⁹Vɔ̀a, ne ènyìa tùnà àzò àmè sãa, e ji e ji, eye wo gblɔ̃ na àmè kè tɔ̀ be nyia vɔ̀, mu sɔ èɖe lè e mè, ne bèa kpɔ ènyìa ji ò, eye ènyìa wù àmèa, wo la pò èkpe ènyìa wù, vɔ̀a, wo la wù àmè kè tɔ̀ be nyia cã.

³⁰Ne wo kã èfɛ̃ na ɛ̀, ne bèa tua, e la na ènu kè wo la kã na ɛ̀, ne bèa tua kpata, ne bèa sɔ plè yebe àgbè.

³¹Ne ènyìa wù àmè ɖe be èvi ŋusù, àlo, nyɔ̃nùa, ɖoɖo kèa ji ye wo la zɔ̃ ɖo, sɔ dɔ̃to na àmè kè tɔ̀ ènyìa nyia.

³²Ne ènyìa wu kluvi ŋusù, àlo, kluvi nyɔ̃nù ɖe a, wo la na klòsalò-ga ègbã, àmè kè be kluvi ènyìa wùa, eye wo la pò èkpe ènyìa wù.

³³Ne àmè ɖe gble èsìdo ɖo nùvò, àlo, e kù èsìdo, eye mu tu e nu ò a, ne ènyì àlo, èsɔ-àkɛtɛ ɖe gɛ̃ jè e mèa,

³⁴àmè kè tɔ̀ ye nyi èsìdoa, la na ènu ɖo e tèpe; e la tu èfɛ̃ ku èci, na àmè kè tɔ̀ ye nyi èlã kè kua, eye, èlã yaa, la trɔ zũ ye tɔ̀.

³⁵Eye, ne àmè ɖe be ènyì tù àzò àmè bu tɔ̀, eye be kua, wo la sà ènyì àgbè-àgbèa, eye wo àmè èvèawo la ma ècia; wo la ma èlã kè kua cã.

³⁶Ne e lè nyanyamè na àmè sia àmè be ènyì kèa, tùnà àzò ènyì buwo, vɔ̀, àmè kè tɔ̀ be nyia mu le ŋùkuvi ɖo e ŋuti ò a, e la sɔ ènyì bu ɖo e kè kua tèpe, eye be la sɔ ènyì kè kua.

³⁷Ne àmè ɖe fĩ ènyì, àlo, àlɛ̃ ɖèka, eye be wù ì, àlo, be sà ɛ̀a, àmè kèa la na ènyì àtɔ̃ ɖo ènyì ɖèkaa tèpe, eye be la na àlɛ̃ ènè ɖo àlɛ̃ ɖèka tèpe.