Read gen Toto jo 22 Bible Online

Toto jo 22 - gen bible

Toto jo 22

¹Ne wo kè ɖo fĩafìtɔ ŋuti, èzã mè, wàlɛbɛ kè be le ŋɔ èkpa, eye wo pò è wùa, wo mu la biɔ èhlɔ̃ na yebe èhũ ò.

²Ne èwè lè èji gbɔ̀xue wo wù ìa, wo la biɔ èhlɔ̃ na yebe èhũ. 'Fìãfìtɔ ɖo la tu yebe èfĩa be èfɛ̃.' Ne ènu ɖekpe mu lè e si ò a, wo la sɔ ye ŋutɔ sà, la sɔ tu èfɛ̃a.

³Ne wo kpɔ èlã kè be fĩa: ènyì, èsɔ-àkɛtɛ, àlo, àlɛ̃a, lè àgbè, lè e sia, fìãfĩa la tu yebe èfɛ̃ tèpe èvè.

⁴Ne àmè ɖe na yebe èlãha yì ɖùnu lè àmè bu be àgblè mè, àlo, vɛ̃-gble mèa, e la ɖo e tèpe ku yebe àgblèmè-nuku nyuɛ̃tɔwo, àlo, yebe vɛ̃gblèmè-nuku nyuɛ̃tɔwo.

⁵Ne wo tɔ èzò àŋùja eye èzòa bì, kãkã va le èlù be àvà, va le èlù ɖìɖi, àlo èlùgblè ŋutɔ cã a, àmè kè tɔ èzòa, ɖo la ɖo àmè bu be ènu kè fiɔ̃a tèpe.

⁶Ne àmè ɖe sɔ èci, àlo, ènu buwo dà ɖo yebe èhavi gbɔ, eye wo fĩ ènu kèawo, lè àmè kè gbɔ be dà wo ɖoa be àxomè a, ne wo le fìãfĩ a, e la ɖo e tèpe zè èvè.

⁷Ne wo mu kpɔ fìãfĩtɔa ò a, àmè kè gbɔ wo sɔ ènuawo dà ɖoa, la dɔ̃ gogo Mawu, eye be la kã àtãŋu lè Mawu be ŋùmè be yè mu miɔ̃ àlɔ̀ ɖo àmè bu be ènu ji ò.

⁸Ne èfĩ be ènyà ɖe kù ɖo ènyì, èsɔ-àkɛtɛ, àlɛ̃, àwù àlo, ènu ɖekpe kè bua ŋuti, eye wo gblɔ̃ be: 'Àmè kèa tututu ye sɔ ɛ̀a', wo la kplɔ̀ àmè kè be ènu bua ku àmè kè wo susu be e sɔ ɛ̀a cã, va Mawu be ŋùmè. Àmè kè Mawu la ɖè fiɔ be e ye sɔ ènua, la ɖo e tèpe na yebe èhavi, zè èvè.

⁹Ne àmè ɖe sɔ yebe èsɔ-àkɛtɛ, yebe ènyì, yebe àlɛ̃, àlo, yebe èlã ɖekpekpe ɖo yebe èhavi gbɔ, be ne kpɔ e ji na yè, eye èlã kèa, ku, jè àfɔ̀ku, àlo, èdù bu mètɔwo va fĩ ì jo, eye àmè ɖe mu kpɔ ɛ̀ ò a,

¹⁰àmè èvèawo la kã àtãŋu lè Tɔhonɔ̀ be ŋùmè be yèwo dòmètɔ ɖèka mu miɔ̃ àlɔ̀ ɖo àmè bu be ènu ji ò! Àmè kè tɔ̀ ye nyi èlãa, la lɔ̃ ɖo e ji, eye àmè èvègɔ̃a mu la na ènu ɖo e tèpe ò.

¹¹Vɔ̀a, ne wo fĩ èlãa, lè e gbɔa, e la na ènu àmè kè be èlã wo fĩa ɖo e tèpe.

¹²Ne ègbemèlã ɖe ye vũvũ èlãa, àmè kè gbɔ wɔ sɔ ɛ̀ ɖoa la sɔ èlãa be kuku va ɖù ɖase. Mu la na ènu ɖekpe ɖo èlã kè wo vũvũa tèpe ò.

¹³Ne àmè ɖe we èlã ɖe lè yebe èhavi si, eye èlã kèa jè àfɔ̀ku, àlo, e ku lè àmè kè tɔ̀ be nyia be ŋùgbedòmèa, àmè kè we èlãa la ɖo e tèpe.

¹⁴Ne e jɔ̀ lè àmè kè tɔ̀ be nyia be ŋùmè a, mu la ɖo e tèpe ò. Ne àmèa xaya èlãa ye à, e la tu èci kè be sɔ xaya èlãa.

¹⁵Ne ŋusù ɖe blè nyɔ̃nù lè ègbèji ɖe kè wo mu sɔ àgɔ̀ ò a, eye be dɔ̃ ku ìa, e la na àgbã, eye be la ɖè è.

¹⁶Ne nyɔ̃nùa be ètɔ gbe be yè mu la sɔ na ɛ̀ ò a, ŋusùa la tu èci kè la sù na nyɔ̃nù lè ègbèjiwo be àgbãa[21].

¹⁷Wò mu la ɖè àsi lè nyɔ̃nù kpajijewɔ̀tɔ ŋuti be la nɔ̀ àgbè ò[22].

¹⁸Ne àmè ɖe dɔ̃ èlã ɖe gbɔa, wo la wù ì[23].

¹⁹Àmè kè savɔ na vòduwo, ne mu nyi na Tɔhonɔ̀ ò, na ye ɖèka kpò ò a, wo la do bùsu do è eye wo la wù ì[24].

²⁰Wò mu la na àmèjro la wɔ̀ yàkà-dɔ ò, eye wò mu la tafu ì ò, ɖo mìawo cã, mì nyi àmèjro kpɔ, lè Ejiptè be ànyigbã ji.

²¹Mì mu la do àyà na àhòsì ɖekpe, àlo, cɔɛvi ɖekpe ò[25].

²²Ne wò do àyà na ɛ̀, eye be do àpa yɔ mù a, mù la ɖoto yebe àlenana.

²³Àpe àdɔ̀mèze la blù ɖo mìa ŋuti, eye mù la wù mì ku èwui, mìa srɔ̃wo la trɔ zũ àhòsìwo, eye mìabe èviwo la trɔ zũ cɔɛviwo.

²⁴Ne wò do ègà na dùkɔ̃mèvi nyè ɖe, na wɔ̀amènɔ̀ ɖe kè lè gbɔ wòa, mù gbà ɖo ègàjìgadotɔ be nɔ̀nɔmè ɖo e ŋuti ò; mì mu la ji àlè, so e gbɔ ò[26].

²⁵Ne wò xɔ̀ èhawòvi be àwù, àwòbaa, gbà trɔ ɛ̀ na ɛ̀, keŋu gbɔ̀xue èwè ne ɖo èxɔ̀,

²⁶ɖoa, eŋuã kpò ye nyi àwù na ɛ̀, àvɔ ɖèka kè cɔ̃na yebe ŋutilãa. Nukɛ ye be la cɔ̃, la sɔ mlɔ̃ ànyi ò? Ne e do àpa yɔ mù a, mù la ɖoto è, ɖoa, ènyè yaa, mù kuna ŋuzĩzĩ na àmè[27].

²⁷Wò mu la zũ Mawu gbèɖe ò; eye wò mu la sɛ̃kpɛ̃ na dùkɔ̃ wò be èdɔnunɔ̀tɔ ò[28].

²⁸Wò mu la sɔ nuku ɖìɖi wò, àmì wò ku àhà wò yì na vòduwo ò! Wò la sɔ ŋùkɔ̀gbevi wòa na mù.

²⁹Nène a ke be la nyi na àpo ènyì ku àlɛ̃ wòwo: e la nɔ̀ ènɔa ŋuti ŋùkèkè adrɛ̃, eye ŋùkèkè ènyigɔ̃a gbèa, wo la sɔ ɛ̀ na mù.

³⁰Mì la nyi àmè kɔ̀kɔ̀ɛwo na mù. Mì mu la ɖù èlã kè ègbemèlãwo vũvũa ò. Mì la sɔ ɛ̀ dãŋùgbe na àvũwo.