Read gen Toto jo 23 Bible Online

Toto jo 23 - gen bible

Toto jo 23

¹Wò mu la kãkã ènyà kè mu nyi nyàwo ò. Wò mu la ɖù àjè ɖase, la sɔ nɔ̀ àmè kè je àgɔ̀a yo mè ò[29].

²Wò mu la nɔ̀ èha kè lè ji la wɔ̀ ènu dakà a yomè ò, eye wò mu la dɔ̃ èha kè lè hɛ̃ ènyà gɔ̃glɔ̃a ji, lè kòjo mè ò.

³Wò mu la nɔ̀ àmè kè mu sɛ̃ŋu ò a ji, lè kòjo mè ò[30].

⁴Ne wò dogò èkɛ̃tɔ wò be ènyì àlo, èsɔ-àkɛtɛ kè bu a, wò la kplɔ̀ ɛ̀ va na ɛ̀.

⁵Ne wò kpɔ àgbã le kpɛ̃ àmè kè le ji èvuɛ̃ na wò a be èsɔ-àkɛtɛ a, mù gbà to e ŋuti ò, bòhũa, wò la kpe ɖo e ŋuti, ne mì a jɔ̀ àgbã a[31].

⁶Mù gbà trɔ èta do ègũ na wɔ̀amènɔ̀ be ènyà lè kòjo mè ò.

⁷Ɖè ènu lè àjè be ènyàwo mè. Mù gbà wù èɖe mà-nyãtɔ àlo, àmè kè be ènyà jɔ̀ a ò, ɖoa nyè mu ɖènà kunù na àmè kè jè àgɔ̀a ò.

⁸Mù gbà xɔ̀ èzãnu ò, ɖoa, èzãnu nana gbãnà ŋùkuvi na àmè kèwo be wɔ̀nawo mè kɔ̀nàawo, eye be trɔna àmè jɔ̀jɔɛwo be ènyà[32].

⁹Wò mu la tɛ àmèjro ɖo ànyi ò, ɖoa, mìawo ŋutɔ, mì nya ènu kè nyi àmèjro be àgbè, eye mì nyi àmèjro lè Ejiptè be ànyigbã ji kpɔ[33].

¹⁰Wò la do ènu èpè àdɛ̃ sɔ̃ŋu, enu enu, ɖo ànyigbã wò ji, eye wò la yà yebe nukuawo.

¹¹Èpè adrɛ̃gɔ̃ a, wò la yà wo, eye wò la gble ànyigbãa ɖɛ, bèa gbɔ̃jɛ̃. Wɔ̀amènɔ̀ kèwo lè àpo dùkɔ̃ mèawo la ɖù, eye ènu kè la kpɔ̀tɔ̀a, ègbemèlãwo la ɖù ì. Nène a ke ye be la nyi na vɛ̃-gble wò ku àmìtigblè wò cã[34].

¹²Wò la wɔ̀ ènu kèwo lè ŋuti wòa keŋu, lè ŋùkèkè àdɛ̃ mè. Vɔ̀a, ŋùkèkè adrɛ̃gɔ̃ a gbèa, wò mu la wɔ̀ èdɔ ò, àleke be ènyì wò ku èsɔ-àkɛtɛ wòwo ne gbɔ̃jɛ̃, ne kluvi nyɔ̃nù wò be èvi ku àmèjro wò ne gbɔ̃ vi ɖe[35].

¹³“Eye mì la wɔ̀ ènu sia ènu, la sɔ zɔ̃ ɖo ènyà kèwo mù gblɔ̃ na mìa ji: mì mu la yɔ vòduwo, la sɛ̃ ò; àmè ɖe mu la sè woabe nyikɔ ŋutɔ cã lè ènu wò mè ò.”

¹⁴Wò la nɔ zɔ̃ èmɔ, la va nɔ ɖù àzã na mù zè ètɔ̃, le èpè ɖèka mè.

¹⁵Wò la nɔ ɖù kpɔ̃nɔ àkpiti be àzãa. Wò la ɖù kpɔ̃nɔ àkpiti ŋùkèkè adrɛ̃, lè hùenu kè mù ɖo, ɖo èlùtikpe be wètri mè, sìgbè lekè mù ɖo è na wòa nène, ɖoa, wàlɛbɛ ŋua ye wò to so Ejiptè. Eye àmè ɖe mu la va gbɔ nyè, àlɔ̀ gbalo ò.

¹⁶Wò la nɔ ɖù nukuyàya be àzã, ekè la nyi àpo èdɔwɔ̀wɔ be nuku cucugbãa be àzã, e la nyi ènu kè wò do ɖo àgblè wò mè, ku ènuŋɛ̃ŋɛ̃ be àzã, lè èpèa be gɔ̃mèjèje, wàlɛbɛ kè wò la ŋɛ̃ èdɔwɔ̀wɔ wò be nukuwo lè àgblè wò mèa[36].

¹⁷Zè ètɔ̃, lè èpè ɖèka mèa, dùkɔ̃ wò be ŋusùwo keŋu la va kpɔ Àpetɔ, Tɔhonɔ̀ be ŋùmè.

¹⁸“Wò mu la sɔ mawɛ xuãxuã be kpɔ̃nɔ kpe ɖo èhũ-lã be vɔsaa ŋuti na mù ò. Mì mu la ɖè àsi lè vɔsa be àmì kè mì sɔ ɖù àzã na mù a ŋuti, èŋù la kè do è ò.

¹⁹Wò la sɔ àpo àgblèmènuku cucugbãwo kpata va Tɔhonɔ̀, àpo Mawu be àxomè. Wò mu la ɖà ègbɔvi lè ènɔa be ànɔsi mè ò[37].”

²⁰“Mù la ɖo àtikplɔtɔ ɖe ɖo ŋùkɔ̀ na wò, ne bèa nɔ̀ ŋuti wò, lè èmɔa ji, eye be la kplɔ̀ wò ɖo tèpe kè mù jràɖo ɖɛa.

²¹Ŋùkuvi wò ne nɔ̀ e ji, eye wòa ɖo èto yebe ègbè. Mù gbà do àdɔ̀mèze na ɛ̀ ò, ɖo, mu la lɔ̃ mìabe àglajèje ò. Ɖo, nyikɔ nyè mè be la wɔ̀ ènuwo keŋu lè.

²²Ne wò ɖo èto yebe ègbèa, eye wò zɔ̃ ɖo ènu kèwo keŋu mù gblɔ̃a jia, mù la nyi kɛ̃tɔ na kɛ̃tɔ wòwo, mù la crì àmè kèwo crì wòa.

²³Ne àtikplɔtɔ nyèa nɔ̀ ŋùkɔ̀ na wò, eye be kplɔ̀ wò ɖo Àmorìtɔwo, Hitìtɔwo, Perizìtɔwo ku Kanàntɔwo be èdù mèa, ne e kplɔ̀ wò ɖo Hivìtɔwo ku Yebusìtɔwo be èdù mè, eye mù crɔ̃ àmè kèawo keŋuã,

²⁴wò mu la do èta gũ na woabe vòduwo ò, eye wò mu la sumɔ wo ò. Wò mu la wɔ̀ ènu kèwo wo wɔ̀nà lè èdù ŋuawo mèa ò. Bòxũa, wò la gbã vòdu ŋuawo ku ènu kè ji wo li wo ɖoa.

²⁵Ne mì sumɔ Tɔhonɔ̀, mìabe Mawu a, eŋuã, e la tusì na àpo ènu ɖùɖu ku àpo èsìwo, eye mù la tètè èdɔ̀lelewo jo lè gbɔ wò.

²⁶Èfu mu la gɛ̃ na nyɔ̃nù ɖekpe, lè èdù wòa mè ò, eye nyɔ̃nù kònɔ̀ ɖekpe mu la nɔ̀ àpo ànyigbãa ji ò, àgbè nɔ̀-zã wòa la sùgbɔ.

²⁷Mù la do vɔ̃vɔ̃ ŋuti wò, eye mù la tùtù dùkɔ̃ ɖekpe kè be èdù mè wò la ɖoa, ɖo ŋùgbe, lè ŋùkɔ̀ na wò, eye ŋùgbedòmè kpò wò la kpɔ na kɛ̃tɔ wòwo.

²⁸Mù la dɔ̃ àdãgbã ɖo ŋùkɔ̀ na wò, ne bèa nyà Hivìtɔwo, Kanàntɔwo ku Hitìtɔwo.

²⁹Nyè mu la sɔ èpè ɖèka kpò nyà wo lè ŋùkɔ̀ na wò ò; ne mu nyi nène ò a, èdùa mè la va ci gbalo, sìgbè zògbè be èdù nène, eye ègbemèlãwo la va jì lè e mè, ɖo ŋuti wò.

³⁰Vi, vi ye mù la nɔ nyà wo lè ŋùkɔ̀ na wò, kaka na wàlɛbɛ kè mì la sùgbɔa, wò la va xɔ̀ èdùa, la sɔ ɖùcrɔ̃.

³¹Mù la do lipò na mìabe èdùa, so Plãŋùpòfɛ̃ be àpùa nu, va Filistìtɔwo be àpùa to, eye e la gbà so zògbè a to, va ètɔ̀a nu. Ne mù sɔ èdùamètɔwo do àsi na mì vɔ̀, eye wò nyà wo lè àpo ŋùkɔ̀ vɔ̀a,

³²wò mu la ɖùzò ɖekpe ku wo, àlo, ku woabe vòduwo ò.

³³Wo mu la nɔ̀ èdù wò mè, ne woa va na, ne wòa wɔ̀ èvuɛ̃ ɖo ŋuti nyè ò: Wò la teŋu va sɛ̃ woabe vòduwo, eye ekèa la va nyi gàmɔ na wò.”