Read gen Toto jo 24 Bible Online

Toto jo 24 - gen bible

Toto jo 24

¹Tɔhonɔ̀ gblɔ̃ na Mosè be: “Lia ètoa va Tɔhonɔ̀ gbɔ, èwò, Arɔ̀n, Nadàb ku Abihù, ku Izràɛl be àmè sĩsĩ èkàtakpo ci èwo, eye mì la cɔ̃ ŋùmè ànyi, lè dìdìpe.

²Vɔ̀a Mosè ɖèka la gogo Tɔhonɔ̀. Woawo yaa, wo mu la gogo è ò, eye dùkɔ̃a mu la lia ètoa ku ì ò.”

³Mosè va gblɔ̃ Tɔhonɔ̀ be ènyàwo ku ɖoɖowo keŋu na dùkɔ̃a. Dùkɔ̃a kpata ɖo e ŋuti ku ègbè ɖèka be: “Ènyà kèwo keŋu Tɔhonɔ̀ gblɔ̃a, mi la zɔ̃ ɖo woa ji.”

⁴Mosè ŋlɔ̀ Tɔhonɔ̀ be ènyàwo keŋu; e fɔ̃zã, eye be tù vɔsakpe ɖo ètoa gɔ̃mè, ku gɔ̃mèɖokpe woèvè, ɖo Izràɛl be kɔ̀ta woèvèawo nu.

⁵Eye Mosè dɔ̃ Izràɛl be ɖèkajɛwo, àmè kèawo wɔ̀ ènumème vɔsa, eye wo sɔ ènyì-suwo wɔ̀ ŋuti fàfa be vɔsa na Tɔhonɔ̀.

⁶Mosè kɔ̀ èhũa be mamãmè ɖo kogòwo mè; e sɔ èhũ kpɔ̀tɛa wu ɖo vɔsakpea ŋuti.

⁷E sɔ Zòɖùɖu Xoma a, eye be hlɛ̃ ɛ̀ na dùkɔ̃a. Eye dùkɔ̃a gblɔ̃ be: “Ènu kèwo keŋu Tɔhonɔ̀ gblɔ̃a, mi la wɔ do e ji, mi la ɖo èto è.”

⁸Mosè sɔ èhũ, e wu ì ɖo dùkɔ̃a ŋuti, eye be gblɔ̃ be: “Èzò kè Tɔhonɔ̀ sɔ ènyà kèawo keŋu ɖù ku mìa, be èhũ ye nyi ekèa.”

⁹Ekèa yomè a, Mosè ku Arɔ̀n, Nadàb kudo Abihù gbàkudo Izràɛl be àmèsĩsĩ èkàtakpo ci èwoawo lia ètoa.

¹⁰Wo kpɔ Izràɛl be Mawu a, eye ànyigbãa lè yebe àfɔ̀ gɔ̃mè sìgbè Làzulit be èkpe xɔ̀asì nyuɛ̃ ɖe nène. Èkpe xɔ̀asì kèa mè kɔ̀ sìgbè jiŋùkusi be àmàdodo èblɔ nène.

¹¹Tɔhonɔ̀ mu wɔ̀ èvuɛ̃ ɖe ku Izràɛlviwo be àmèŋùkuta kèawo ò. Wo kpɔ Mawu be nyɔnyɔ, wo ɖù ènu, eye wo nù àhà.

¹²Tɔhonɔ̀ gblɔ̃ na Mosè be: “Lia ètoa, va gbɔ nyè, eye wò la nɔ̀ tèpe kèa, ne ma sɔ èkpe gbàjà kèwo ji mù ŋlɔ̀ èsea ku ɖoɖoawo ɖoa na wò, ne wòa sɔ fiɔ ènu dùkɔ̃a.”

¹³Mosè so ku Yosùa, yebe àlɔ̀dotɔa, eye Mosè yì Mawu be ètoa ji,

¹⁴wàlɛbɛ kè be gblɔ̃ na Izràɛl be àmèsĩsĩawo be: “Mì nɔ̀tè kpɔ mi, lè tèpe kèa, kaka na wàlɛbɛ kè mi la trɔ gbɔ̀ va mìa gbɔa. Arɔ̀n ku Hur la nɔ̀ mìa gbɔ. Ne àmè ɖe ɖo ènyà ɖe a, ne kpɔ wo.”

¹⁵Mosè lia ètoa ji, eye lilikpo babla cɔ̃ ètoa keŋu.

¹⁶Tɔhonɔ̀ be gogo nɔ̀ Sinaì be ètoa ji, eye lilikpo bablaa cɔ̃ e ji, ŋùkèkè àdɛ̃. Ŋùkèkè adrɛ̃gɔ̃ a, e nɔ̀ lilikpoa mè, yɔ Mosè.

¹⁷Tɔhonɔ̀ be gogoa ze do Izràɛlviwo sìgbè èzò bìbi kè fiɔ̃na ènua nène lè ètoa tamè.

¹⁸Mosè ɖo lilikpo bablaa mè, eye be lia ètoa ji. Mosè nɔ̀ ètoa ji ŋùkèkè èkà, èzã èkà.