Read gen Toto jo 25 Bible Online

Toto jo 25 - gen bible

Toto jo 25

¹Tɔhonɔ̀ gblɔ̃ na Mosè be:

²“Gblɔ̃ na Izràɛlviwo be wo ne jɔ̀ ènu na mù. Ŋusù kèwo keŋu lɔ̃, so èjì mè fàa, wo la na ènu kèa.

³Ènu kèwo mì la xɔ̀, so woa sia ye nyi ekèawo: sìka, klòsalò, gàjɛ̃,

⁴àvɔ jɛ̃-blisi, àvɔ jɛ̃-hɛ̀, àvɔ jɛ̃ dàzò, àvɔ bìɖì-bìɖì, àvɔ kè wo sɔ ègbɔfu lɔ̃a,

⁵àlɛ̃ be àgbàze jɛ̃wo, ènyɔ be àgbàze, òɖuŋ be àti;

⁶kãligbɛ̃ mè be àmì, ègbe xuɛ̃xuɛ̃ be àmì kè wo la nɔ do ètaa, àmì xuɛ̃xuɛ̃ na vɔsa mème,

⁷èkpe xɔ̀asì kè wo yɔna be Bèril, ku èkpe xɔ̀asì kè wo la sɔ ɖo àcɔ na dàbla ku àkɔtacɔ̃nua.

⁸Wo la tù kɔ̀kɔ̀ɛpe na mù, eye mù la nɔ̀ woa dòmè.

⁹Mù la sɔ nɔ̀pea be tata fiɔ wò, eye mù la sɔ e mènuwo ku yebe ŋutinuwo keŋu fiɔ wò, eye ɖoɖo kèawo ji tutu ye mì la zɔ̃ ɖo.”

¹⁰“Wo la sɔ òɖuŋ-ti kpà àɖakàa, yebe dìdimè la nyi àbɔglìgo èvè ku èfã; yebe kèkemè la nyi àbɔglìgo ɖèka ku èfã; yebe èjiyìyi la nyi àbɔglìgo ɖèka ku èfã.

¹¹Wò la tre sìka àku-àku ɖo e ŋuti; wò la tre è ɖo e mè ku e ŋuti, eye wò la fã sìka trɔ do è, ɖo yebe nɔ̀nɔmè nu.

¹²Ekèa yomè a, wò la wɔ̀ sìka-ga klobotoe ènè kèwo wò la do àfɔ̀ ènèawo na ɛ̀. Wò la do sìka-ga klobotoe èvè ɖo àkpa ɖèka, eye wò la gbà do èvè ɖo àkpa èvègɔ̃a cã.

¹³Wò la kpà òɖuŋ-ti lɔbɔɛ kèwo ŋuti wò la tɛ sìka ɖoa,

¹⁴eye wò la sɔ àti lɔbɔɛ kèawo do sìka-ga klobotoe kèwo lè àɖakàa be àxàda ɖe sia ɖe mèa mè, ne woa sɔ nɔ kɔkɔ ɛ̀.

¹⁵Àti lɔbɔɛawo la nɔ nɔ̀ àɖakàa be sìka-ga klobotoeawo mè; wo mu la nɔ ɖè wo ò.

¹⁶Wò la sɔ Zòɖùɖu jèsìdo kè mù la sɔ na wòa, do àɖakàa mè.

¹⁷Eye wò la sɔ sìka àku-àku wɔ̀ nùtuvi kè la dìdì àbɔglìgo èvè ku èfãa, eye be la kèkè àbɔglìgo ɖèka ku èfãa.

¹⁸Eye wò la sɔ sìka wɔ̀ Kèrubim èvè. Wò la tù wo ɖo nùtuvia be ètomè èvèawo.

¹⁹Wò la wɔ̀ Kèrubim ɖèka ɖo èto ɖèka, eye wò la gbà wɔ̀ Kèrubim èvègɔ̃a ɖo èto èvègɔ̃a. Mì la wɔ̀ Kèrubim èvèawo la kɔ yìji lè nùtuvia be ètomè èvèawo.

²⁰Kèrubimwo la vlũ àwàda ɖo àyamè, ne woa sɔ ɖia nùtuvia, eye woa cɔ̃ nutuvia ji. Wo la jè ŋùkɔ̀ woa nɔ̀nɔɛwo, eye wo la nɔ kpɔ nutuvia ji.

²¹Wò la sɔ nutuvia ɖo àɖakàa nu, eye Zòɖùɖu be jèsìdo kè mù la sɔ na wòa la nɔ̀ Àɖakàa mè.

²²Funua ye mù la nɔ dogò wò lè, eye mù la nɔ sɔ ègbè do àsi ɖe sia ɖe kè mù ɖo na Izràɛlviwoa, do àsi na wò lè, so nùtuvia be ètamè, lè Kèrubim èvè kèwo lè Zòɖùɖu-Ɖaka a be nùtuvia jia be dòdòmè.”

²³“Eye wò la ta èkplɔ̃ ku òɖuŋ-ti, ekè be dìdimè la nyi àbɔglìgo èvè, eye yebe kèkemè la nyi àbɔglìgo ɖèkaa, yebe èjiyìyi la nyi àbɔglìgo ɖèka ku èfãa.

²⁴Wò la tɛ sìka àku-àku ɖo e ŋuti, eye wò la fã sìka trɔ do è.

²⁵Wò la sɔ àtivi kèwo be kèkemè nyi àlɔ̀gba ɖèkaa, sɔ trɔ do ètomè na ɛ̀, eye wò la fã sìka trɔ do àtiviawo.

²⁶Wò la wɔ̀ sìka-gàvi klobotoe ènè, eye wò la sɔ gàvi klobotoeawo do yebe àfɔ̀ ènèawo be koŋù ènèawo mè.

²⁷Àtiviawo gbɔ ye wò la sɔ ègà klobotoe kèwo mè wo la do àti kèwo wo la sɔ nɔ kɔkɔ èkplɔ̃a, kù.

²⁸Òɖuŋ-ti ye la nyi àti kèawo; wò la sɔ sìka tɛ ɖo woa ŋuti, eye woawo ye la nyi àlɔ̀ kèwo wo la nɔ le, sɔ nɔ kɔkɔ èkplɔ̃a.

²⁹Wò la wɔ̀ àgbã gbɛjɛwo, kogòwo, kɔpòwo ku àgbã kèwo wo la sɔ nɔ kɔ̀ èsì ɖɛa, kpe ɖo e ŋuti. Sìka àku-àku ye wò la sɔ wɔ̀ wo.

³⁰Eye wò la nɔ dà vɔsa kpɔ̃nɔ wè sia wè ɖo èkplɔ̃a ji, lè ŋùkɔ̀ na mù.”

³¹“Eye wò la wɔ̀ sìka àku-àku be kãligbɛ̃ti. Wò la tù kãligbɛ̃tia. Yebe gɔ̃mèɖonu ku yebe àtia, yebe kɔpòwo, yebe èse-pòpowo ku gboviawoa, wò la wɔ̀ wo ènu ɖèka.

³²Àlɔ̀zɛ̃ àdɛ̃ la so kãligbɛ̃ a be àxàdawo mè. Àlɔ̀zɛ̃ ètɔ̃ la so kãligbɛ̃ a be àkpa ɖèka, eye àlɔ̀zɛ̃ ètɔ̃ la so kãligbɛ̃ a be àkpa èvègɔ̃a.

³³Kogò kèwo lè lɔbɔɛ sìgbè àzì-kui nènea, be ètɔ̃, èse-pòpo ku gbovi la nɔ̀ àlɔ̀zɛ̃ ɖèka ji, eye kogò kèwo lè lɔbɔɛ sìgbè àzì-kui nènea be ètɔ̃, èse-pòpo ku gboviwo la nɔ̀ àlɔ̀zɛ̃ bu cã ji; nènea ye be la nyi na àlɔ̀zɛ̃ àdɛ̃ kèwo la nɔ̀ kãligbɛ̃tia ŋutia yeŋu.

³⁴Kãligbɛ̃tia ŋutɔ la ɖo kogò kèwo lè lɔbɔɛ sìgbè àzì-kui nènea be ènè ku èse-pòpo ku gboviwo.

³⁵Gbovi ɖèka la nɔ̀ àlɔ̀zɛ̃ èvè cucugbã kèwo to so kãligbɛ̃tia ŋutia be gɔ̃mè; gbovi ɖèka la gbà nɔ̀ àlɔ̀zɛ̃ èvè kèwo kplɔ̀ ekèawo do, so kãligbɛ̃tia ŋutia be gɔ̃mè; gbovi ɖèka la gbà nɔ̀ àlɔ̀zɛ̃ èvè kpɔ̀tɛ kèwo so kãligbɛ̃tia ŋutia be gɔ̃mè; nènea ye be la nyi na àlɔ̀zɛ̃ kèwo so kãligbɛ̃tia ŋutia.

³⁶Wò la wɔ̀ gbovi ku àlɔ̀zɛ̃awo la nyi ènu ɖèka, eye wò la tù wo blibo ɖèka ku sìka àku-àku.

³⁷Wò la wɔ̀ kãligbɛ̃ kèwo be hɛ̃hlɛ̃mè la nyi adrɛ̃ a na kãligbɛ̃tia; wo la nɔ sũ kãligbɛ̃awo, àleke be tèpe kè lè ŋùkɔ̀ na ɛ̀a ne kɔ̀.

³⁸Wò la sɔ sìka àku-àku wɔ̀ yebe ènulenu ku yebe àmì xɔ̀nuwo.

³⁹Wo la sɔ sìka àku-àku, jijenu ɖèka wɔ̀ ɛ̀ ku yebe ŋutinuwo.

⁴⁰Le ŋùku ɖo e ŋuti ne wòa wɔ̀ ɖo ènutata kè wo sɔ fiɔ wò, lè ètoa jia ji.”