Read gen Toto jo 26 Bible Online

Toto jo 26 - gen bible

Toto jo 26

¹“Nɔ̀pea, àɖàŋù kùŋùtu-lɔ̃tɔwo be àvɔ àlɛ̃dàtɔ̀ totro èwo, kèwo lè jɛ̃ blisia, jɛ̃-hɛ̃, ku yìbɔ-dàzòa ye wò la do e mè. Wò la sɔ àɖàŋù gã ɖe wɔ̀ Kèrubimwo ɖo e mè.

²Èxɔ̀mè-kùŋùtua be dìdimè la nyi àbɔglìgo èwì vɔ ènyi. Èxɔ̀mè-kùŋùtua be kèkemè la nyi àbɔglìgo ènè. Jije kèa ye èxɔ̀mè-kùŋùtuawo keŋu la ɖo.

³Wo la ca èxɔ̀mè-kùŋùtu àtɔ̃ ɖo woa nɔ̀nɔwo nu. Eye wò la gbà ca àtɔ̃ kpɔ̀tɛawo ɖo woa nɔ̀nɔwo nu.

⁴Wò la tɔ̃ èkà kpòkpòe kèwo la nɔ̀ jɛ̃ èblisia ɖo èxɔ̀mè-kùŋùtu cucugbãa be èto mè, lè cacapea be ènu, eye wò la gbà wɔ̀ nènea ke, ɖo cacape èvègɔ̃ kè lè èxɔ̀mè-kùŋùtu kpɔ̀tɛa nu.

⁵Wò la tɔ̃ èkà kpòkpòe èkà ci èwo ɖo xɔ̀mè-kùŋùtu cucugbã tɔ̀a nu, eye wò la gbà tɔ̃ èkà kpòkpoe èkà ci èwo ɖo cacape èvègɔ̃a be èxɔ̀mè-kùŋùtua be ènu. Èkà kpòkpòe ɖe sia ɖe la nɔ̀ èbu nu, lè cacapeawo.

⁶Wò la wɔ̀ sìka be ènu kù gàvi èkà ci èwo, eye wò la sɔ ènu kù gàviawo ca èxɔ̀mè-kùŋùtuawo, èɖe ɖo èɖe nu, eye nènea, nɔ̀pea la le ɖo ɖèka.

⁷Ekèa yomè wò la sɔ ègbɔfu lɔ̃ èxɔ̀mè-kùŋùtu, la sɔ tù àzàva ɖo nɔ̀pea tamè. Wò la lɔ̃ èxɔ̀mè-kùŋùtu woeɖèka.

⁸Kùŋùtu ɖèka be dìdimè la nyi àbɔglìgo ègbã. Kùŋùtu ɖèka be kèkemè la nyi àbɔglìgo ènè. Nène a ye be la nyi na kùŋùtu woeɖèkawo keŋu.

⁹Wò la ca kùŋùtu àtɔ̃ ɖovò, eye wò la gbà ca kùŋùtu àdɛ̃ bu ɖovò, eye wò la ŋɛ̃ kùŋùtu àdɛ̃gɔ̃ a ɖo gòxɔa be èmɔ nu.

¹⁰Wò la tɔ̃ èkà kpòkpòe èkà ci èwo ɖo èxɔ̀mè-kùŋùtu cucugbãa nu ekè la nyi kè wo ca ɖo duawo be kpɔ̀tɛa, eye wò la gbà tɔ̃ èkà kpòkpòe èkà ci èwo ɖo èxɔ̀mè-kùŋùtu kè lè ɖoɖo kèa nu, lè caca ɖo du èvègɔ̃a mèa cã.

¹¹Wò la wɔ̀ ègà-jɛ̃ be ènu kù-gàvi èkà ci èwo. Wò la sɔ ènu ku-gàviawo do èkà kpòkpòeawo mè, la sɔ ca gòxɔa, ne bèa le ɖo ɖèka.

¹²Gòxɔa be kùŋùtuawo dòmètɔ ɖèka la ci e ji, ekè la ŋɛ̃ jè ànyi gbalo: kùŋùtua be mamãmè kè ci e jia la ŋɛ̃ jè ànyi ɖo nɔ̀pea be ŋùgbedòmè.

¹³Eye, lè gòxɔa be kùŋùtuawo be dìdimè jia, àbɔglìgo ɖèka la ci e ji, lè àkpa èvèa, eye be la ŋɛ̃ jè e ji gbalo, ne bèa cɔ̃ e ji.

¹⁴Eye, wò la sɔ àgbò be àgbàze wɔ̀ ènu ji cɔ̃nu kè la nɔ̀ jɛ̃, ku ènu ji cɔ̃nu kè wò la sɔ ènyɔ be àgbàze wɔ̀a, la sɔ ɖo e ji.

¹⁵Ekèa yomè a, wò la sɔ zãgaràti wɔ̀ ètomètiawo na nɔ̀pea, eye wò la ɖo è ètè.

¹⁶Ètomèti ɖe sia ɖe be dìdimè la nyi àbɔglìgo èwo, eye ètomèti ɖe sia ɖe be kèkemè la nyi àbɔglìgo ɖèka ku èfã.

¹⁷Ètomèti ɖe sia ɖe la ɖo ènu kùnu èvè, eye wò la sɔ èɖe ɖo èɖe ŋuti: nènea ye wò la wɔ nɔ̀pea be ètomètiawo keŋu.

¹⁸Wò la ɖo nɔ̀pea be ètomèti èwì kèwo la ɖota Nègev lè àpùgo.

¹⁹Eye wò la sɔ klòsalò tù gɔ̃mèɖonu èkà ɖo ètomèti èwìawo gɔ̃mè. Gɔ̃mèɖonu èvè la nɔ̀ ètomèti ɖèka gɔ̃mè, ɖo yebe ènu kùnu èvèawo ŋuti; nènea kea, gɔ̃mèɖonu èvè la nɔ̀ ètomèti ɖèka gɔ̃mè, ɖo yebe ènu kùnu èvèawo ŋuti.

²⁰Sɔ yì àvego, lè nɔ̀pea be àkpa èvègɔ̃a, ètomèti èwì

²¹ku woabe gɔ̃mèɖonu èkà kè wò la sɔ klòsalò wɔ̀a: gɔ̃mèɖonu èvè la nɔ̀ ètomèti ɖèka gɔ̃mè, eye gɔ̃mèɖonu èvè la gbà nɔ̀ ètomèti bu gɔ̃mè.

²²Eye, le àpùta lɔ̀ge, àfi kè nɔ̀pea mè be gòglòpea lèa, wò la do ètomèti àdɛ̃;

²³Wò la gbà wɔ̀ ètomèti èvè kèwo la le nɔ̀pea ɖotè, lè e mè ɖaa.

²⁴Gɔ̃mèa la kèkè na wo, vɔ̀a, wo la tɔ woa nɔ̀nɔwo lè ètamèa, lè ègà-klobotoe cucugbãa mè: nènea ye be la nyi na èvèawo, wo la nyi ènu le ènu ɖotè.

²⁵Eŋuã, ètomèti ènyi ye wò la wɔ̀, eye wo la ɖo klòsalò gɔ̃mèɖonu: woa kpata la nɔ̀ gɔ̃mèɖonu woeàdɛ̃, ekè la nyi, gɔ̃mèɖonu èvè, le ètomèti ɖèka gɔ̃mè, eye gɔ̃mèɖonu èvè la nɔ̀ ètomèti bu cã gɔ̃mè.

²⁶Ekèa yomè a, wò la sɔ zãgaràti wɔ̀ ènu mèsòtiwo: wò la wɔ̀ àtɔ̃, na ètomèti kèwo lè nɔ̀pea be àkpa cucugbãa.

²⁷Wò la wɔ̀ àtɔ̃ bu na nɔ̀pea be àkpa èvègɔ̃a be ètomètiawo; wò la gbà wɔ̀ àtɔ̃ bu, na nɔ̀pea be àkpa kè lè àpùta lɔ̀gea, lè yebe gòglòpe,

²⁸eye ènu mèsòti dòdòmètɔ̀ kè la sɛ̃ ètomètiawo be èji-yìyi be dòdòmèa, la so àgo ɖe ji, yì àgo èvègɔ̃a ji.

²⁹Wò la tre sìka ɖo ètomètiawo ŋuti; wò la sɔ sìka wɔ̀ woabe gàvi klobotoe kèwo mè wò la sɔ ènu mèsòtiawo ɖoa, eye wò la tre sìka ɖo ènu mèsòtiawo ŋuti.

³⁰Wò la tù nɔ̀pea ɖo ɖoɖo kè wo sɔ fiɔ wò lè ètoa jia nu.

³¹Ekèa yomè a, wò la wɔ̀ èxɔ̀mèsòvɔ jɛ̃ èblisi, jɛ̃hɛ̃, yìbɔ-dàzò, ku àvɔ biɖi-biɖi totro. Wo la sɔ àɖàŋù ta Kèrubimwo ɖo e mè.

³²Wò la sɔ ɛ̀ ɖo zãgaràti kèawo ŋuti; sìka be ènu kùnu la nɔ̀ woa ŋuti, eye wò la sɔ wo ɖo klòsalò gɔ̃mèɖonu ènè ji.

³³Wò la le èxɔ̀mèsòvɔa ɖɛ, ɖo ènu kùnuawo gɔ̃mè, eye, lè funua, wò la wɔ̀ Zòɖùɖo-Ɖakà ɖo èxɔ̀mèsòvɔa godo. Eye èxɔ̀mèsòvɔa la ma Kɔ̀kɔ̀ɛpea ku Kɔ̀kɔ̀ɛpewo be Kɔ̀kɔ̀ɛpea dòmè na mì.

³⁴Wò la sɔ Zòɖùɖu-Ɖakà a be nutuvia ɖo è nu, lè Kɔ̀kɔ̀ɛpewo be Kɔ̀kɔ̀ɛpea,

³⁵eye wò la sɔ èkplɔ̃a dàɖo èxɔ̀mèsòvɔa be ŋùkɔ̀; kãligbɛ̃tia la kpãŋùkɔ̀ èkplɔ̃a, lè nɔ̀pea be àpùgo. Èkplɔ̃a la nɔ̀ àvego.

³⁶Ekèa yomè a, wò la do èxɔ̀mɔnu-vɔ kè àɖàŋù-vɔ lɔ̃tɔwo la sɔ èkà jɛ̃ èblisi, jɛ̃-hɛ̃, yìbɔ dàzò ku àvɔ biɖi-biɖi totro lɔ̃a ɖo gòxɔa mɔnu: e la nyi àɖàŋù-vɔ lɔ̃tɔwo be èdɔwɔ̀wɔ.

³⁷Wò la sɔ zãgaràti wɔ̀ èsɔti àtɔ̃ na èxɔ̀mɔnu-vɔa; wò la tre sìka ɖo woa ŋuti, wò la sɔ sìka wɔ̀ woabe ènu kùnuwo, eye wò la tù gɔ̃mèɖonu àtɔ̃ na wo ku ègà-jɛ̃.