Read gen Toto jo 27 Bible Online

Toto jo 27 - gen bible

Toto jo 27

¹Ekèa yomè a, wò la sɔ zãgaràti wɔ̀ vɔsakpea: yebe dìdimè la nyi àbɔglìgo àtɔ̃; dìdimè ku kèkemèa la nyi ɖèka; yebe èjiyìyi la nyi àbɔglìgo ètɔ̃.

²Wò la wɔ̀ àzò ɖo yebe koŋù ènèawo ji, eye àzòawo la nyi ènu ɖèka ku ì, eye wò la tre gàjɛ̃ ɖo e ŋuti.

³Wò la wɔ̀ àdàwa na vɔsakpea be àfiwo, sɔfìwo, èhũ wuwu be kogòwo, gafòwo, lifĩ-fiɔ̃nuwo; wò la sɔ gàjɛ̃ wɔ̀ ènu zãzã kèawo keŋu.

⁴Wò la wɔ̀ gàjɛ̃ be èlãmèga kè la nɔ̀ sìgbè èɖɔ nène, eye wo la wɔ̀ gàjɛ̃ be gàvi klobotoe ɖo gàjɛ̃ be èɖɔa be koŋù ènèawo mè.

⁵Wò la ɖiɖi èɖɔa so vɔsakpea be ètomè, sɔ tùtà yebe gɔ̃mè, eye be la sɛ̃ vɔsakpea be èjiyìyi be dòdòmè.

⁶Wò la wɔ̀ àti lɔbɔɛwo na vɔsakpea, àti lɔbɔɛ kèwo wò la sɔ zãgaràti wɔ̀, eye wò la tre gàjɛ̃ ɖo woa ŋuti.

⁷Wò la sɔ vɔsakpea be àti lɔbɔɛawo do gàvi klobotoeawo mè, eye àti lɔbɔɛawo la nɔ̀ vɔsakpea be àxàda èvèawo mè, ne wo la kɔkɔ vɔsakpea.

⁸Wò la sɔ gboŋugblo sɔ wɔ̀ ɛ̀, eye edo la nɔ̀ e mè. Wò la wɔ̀ ɛ̀ ɖo àleke wo sɔ ɛ̀ fiɔ wò, lè ètoa jia nu, ne èdo ne nɔ̀ e mè.

⁹Ekèa yomè a, wò la wɔ̀ gbàjàji na nɔ̀pea. Sɔ yì Nègev, lè àpùgo lɔ̀gea, wò la sɔ àvɔ biɖi-biɖi totro kè la dìdì àbɔglìgo èkà èvè takpoa na àkpa ɖèka.

¹⁰Wò la sɔ gàjɛ̃ wɔ̀ yebe sɔti èwì ku woabe gɔ̃mèɖonu èwìawo. Wò la sɔ klòsalò wɔ̀ sɔtiawo be ènu kùnu ku ènu glanuawo.

¹¹Nène a kea, lè èvègo lɔ̀gea, lè gbàjàa ji be dìdì mè jia, wò la ɖo àvɔ kè la dìdì àbɔglìgo èkàvè takpo; wò la sɔ gàjɛ̃ wɔ̀ yebe sɔti èwìawo, ku woabe gɔ̃mèɖonu èwìawo; wò la sɔ klòsalò wɔ̀ sɔtiawo be ènu kùnuawo.

¹²Gbàjàa ji be kèkemè, lè àpùta lɔ̀gea, le èwèzɛ̃pea, wò ɖo àvɔ kèwo be kèkemè la nɔ̀ àbɔglìgo èkà ci èwo.

¹³Gbàjàa ji be èwèzɛ̃pea be ŋùkɔ̀ lɔ̀ge la kèkè àbɔglìgo èkà ci èwo.

¹⁴Àwàda ɖèka jia, wo la ɖo àvɔ àbɔglìgo woeàtɔ̃, sɔti ètɔ̃ ku woabe gɔ̃mèɖonu ètɔ̃.

¹⁵Àwàda èvègɔ̃a jia, wò la ɖo àvɔ àbɔglìgo woeàtɔ̃, sɔti ètɔ̃ ku woabe gɔ̃mèɖonu ètɔ̃.

¹⁶Gbàjàa ji be àgboa, wò la sɔ àvɔ jɛ̃ èblisi, jɛ̃-hɛ̃, yìbɔ-dàzò ku àvɔ biɖi-biɖi totro àbɔglìgo èwì wɔ̀ èxɔ̀nuvɔ na ɛ̀; e la nyi àcã-vɔlɔ̃lɔ̃ be èdɔ; wò la ɖo sɔti ènè na è ku woabe gɔ̃mèɖonu ènèawo.

¹⁷Klòsalò be ènu kùnuwo ye wò la sɔ kù gbàjàa ji be èkpa a be sɔtiawo keŋu trɔ do; wò la sɔ klòsalò wɔ̀ woabe ènu kùnuwo, eye wò la sɔ gàjɛ̃ wɔ̀ sɔtiawo be gɔ̃mèɖonuawo.

¹⁸Gbàjàa ji be dìdimè la nyi àbɔglìgo èkà èvè takpo; yebe kèkemèa la nyi àbɔglìgo èkà ci èwo lè yebe àkpa èvèawo. Yebe èjiyìyi la nyi àbɔglìgo àtɔ̃, eye, wò la sɔ àvɔ biɖi-biɖi totro wɔ̀ yebe èjiyìyia; wò la sɔ gàjɛ̃ sɔ wɔ gɔ̃mèɖonuawo.

¹⁹Wò la sɔ gàjɛ̃ wɔ̀ Nɔ̀pe Kɔ̀kɔ̀ɛ a be ŋutinuwo kpata; gàjɛ̃ ye wò la sɔ wɔ̀ e mè be ènu zãzãwo keŋu ku yebe sɔtiwo be ègũmètiwo keŋu, kudo gbàjàa ji be sɔtiawo be ègũmètiawo keŋu.

²⁰Wò la gbà ɖè ègbè na Izràɛlviwo, ne woa ji àmìti be àmì kè mè kɔ̀, eye wo mu zã kpɔ ò a, àleke be, kãligbɛ̃ ne nɔ̀ sũsũ wè sia wè,

²¹lè ègòdodo be gòxɔa mè, lè èxɔ̀mèsɔ̀vɔ kè lè fikè zòɖùɖu ɖakà a lèa be ŋùkɔ̀. Arɔ̀n ku èviawo la sɔ ɛ̀ ɖo àfi kè be la nɔ bì lè, so fìɛ̃si, kaka va na ŋùdekɛ̃nyɛ mè, lè Tɔhonɔ̀ be ŋùkɔ̀. Èse màtrɔ gbèɖe ye be nyi na Izràɛl be èviwo, so jìjimè, yì jìjimè.