Read gen Toto jo 28 Bible Online

Toto jo 28 - gen bible

Toto jo 28

¹Lè Izràɛlviwo dòmèa, wò la kplɔ̀ fòfo wò, Arɔ̀n ɖo ŋuti ku èvia ŋusùwo, ne woa nɔ wɔ̀ vɔsa be èdɔ na mù. Wò la yɔ Arɔ̀n, Nadàb ku Abihù, Eleazàr kudo Itamàr, kèwo nyi Arɔ̀n be èviwo.

²Wò la tɔ̃ àwù kɔ̀kɔ̀ɛwo na fòfo wò Arɔ̀n; ekèawo la nyi gogo ku bùbu be jèsìdo.

³Èwò yaa, wò la pò nupo na àmèsĩsĩ kèwo keŋu mè mù do ènunya be gbɔ̃gbɔ̃a, wò la gblɔ̃ na wo be wo ne tɔ̃ Arɔ̀n be àwùwo, ne woa do àmì èta na ɛ̀, àleke be ne nɔ wɔ̀ sɛ̃sɛ̃ be èdɔ na mù.

⁴Àwù kèwo wo la tɔ̃a ye nyi ekèawo: àkɔ̀taɖonu, dàbla, àwù gblɛ̀lɛ̀, àwù vlàyà kè wo ɖo àɖàŋù be àcɔ na a, ètabla dukù, ègojiblanu. Nène a ye wo la tɔ̃ àwù kɔ̀kɔ̀ɛawo na fòfo wò, Arɔ̀n ku èvia ŋusùwo, àleke be wo ne nɔ wɔ̀ vɔsa be èdɔ na mù.

⁵Wo la zã sìka, àvɔ jɛ̃ èblisi, jɛ̃-hɛ̃, yìbɔ dàzò ku àlɛ̃dà-vɔ.

⁶Àɖàŋùdɔwɔ̀tɔwo la wɔ̀ dàblaa ku sìka, kudo àvɔ jɛ̃ èblisi, jɛ̃-hɛ̃, yìbɔ-dàzò ku àlɛ̃dà-vɔ totro.

⁷Èkà èvè la to àbɔta a, la va kù yebe ènugbɔ èvèawo.

⁸Dàblaa be èkà kè la nɔ̀ e jia, be wɔ̀wɔ la sɔ̀ ku èvègɔ̃a: wo la wɔ̀ ɛ̀ ku sìka, àvɔ jɛ̃ èblisi, jɛ̃-hɛ̃, yìbɔ-dàzò ku àlɛ̃ŋudà-vɔ totro.

⁹Wò la sɔ èkpe xɔ̀ àsì kè wo yɔna be Bèril, èvè, eye wò la ta Izràɛl be èvi ŋusùwo be nyikɔwo ɖo woa ji:

¹⁰Àmè àdɛ̃ be nyikɔwo la nɔ̀ èkpe ɖèka ji, ɖo woabe jìjimè be ɖoɖo nu, eye àmè àdɛ̃ kpɔ̀tɛawo be nyikɔwo la nɔ̀ èkpe èvègɔ̃a ji.

¹¹Wò la ta Izràɛl be èvi ŋusùwo be nyikɔwo ɖo èkpeawo ji, sìgbè lekè èkpe be àɖàŋùdɔwɔ̀tɔwo tana ɛ̀a nène, sìgbè lekè wo tana xoma tre-jèsia nène. Wò la wɔ̀ ɛ̀, sɔ do ŋɔ̀ŋlɔ̃awo mè, eye wò la zĩ wo ɖo sìkaa mè.

¹²Wò la sɔ èkpe èvèawo ɖo dàblaa be èkàawo ŋuti, èkpe kèwo nyi ŋùkuɖoji-kpe na Izràɛl be ŋusùwoa, eye woabe nyikɔwo la nɔ̀ Arɔ̀n be àbɔta, lè Tɔhonɔ̀ be ŋùkɔ̀, lè Arɔ̀n be dàblaa be èkàwo ŋuti, na Izràɛlviwo be ŋùkuɖoji.

¹³Wò la wɔ̀ sìka gàvi kpɛbɛwo,

¹⁴ku sìka àku-àku be kɔ̀sɔ̀kɔsɔvi èvè; wò la wɔ̀ wo sìgbè èkà kè wo troawo nène; wò la sɔ kɔ̀sɔ̀kɔsɔvi totroawo ɖo gàvi kpɛbɛawo ji.

¹⁵Ekèa yomè a, wò la wɔ̀ kòjoɖoɖo be àkɔ̀tacɔ̃nu kè la nyi àɖàŋùdɔwɔ̀wɔa; wò la wɔ̀ ɛ̀ sìgbè dàbla nène. Wò la wɔ̀ ɛ̀ ku sìka, ku àvɔ jɛ̃ èblisi, jɛ̃-hɛ̃, yìbɔ dàzò ku àlɛ̃ŋudà-vɔ totro.

¹⁶Ne wò gbe ŋɛ̃ ɛ̀ kpòa, yebe dìdimè ku kèkemèwo la sɔ̀. Dìdimèa la nyi àlɔ̀gba ɖèka; kèkemèa cã la nyi, àlɔ̀gba ɖèka.

¹⁷Wò la sɔ èkpe xɔ̀ àsìwo ɖo e ŋuti; èkpeawo la nɔ̀ àgbàkà ènè ji: àgbàkà cucugbãa jia, wò la do èkpe xɔ̀ àsì kèawo: Sàrdonìa, ŋùtisĩɖìɖi kè wo yɔna be Tòpazòa, àmàmu kè wo yɔna be èmèrod, woawo ye la nɔ̀ àgbàkà cucugbãa ji.

¹⁸Lè àgbàkà èvègɔ̃a jia, wò la do èkpe xɔ̀ àsì kèawo: jɛ̃-hɛ̃ kè wo yɔna be Ɛ̀skàrbuklèa, èkpe èblɔtɔ̀ kè wo yɔna be Làzùlità ku Yàsp-kpea;

¹⁹ètɔ̃gɔ̃a jia, wò la do èkpe xɔ̀ àsì kèawo: Agatà, Kɔ̀rnalinà ku Àmetìs,

²⁰eye, lè àgbàkà ènègɔ̃a jia, wò la do èkpe àmàmu, kè wo yɔna be krìzòlità, ku kè wo yɔna be Bèrilà, kudo Ɔ̀nis. Wò la sɔ sìka gàvi ɖo àcɔ na wo.

²¹Èkpeawo la sɔ̀ ku Izràɛl be èviwo be nyikɔwo. Wo la nyi woèvè, sìgbè Izràɛl be èviwo be nyikɔwo nène. Wò la ta nyikɔawo ɖo woa mè, sìgbè àlɔ̀gàvi be jèsì nène. Nyikɔ ɖe sia ɖe ku yebe èkpe, ɖo, hɛ̃nu woèvè ye lè.

²²Wò la sɔ sìka àku-àku wɔ̀ kɔ̀sɔ̀kɔsɔviwo, wò la gbĩ wo sìgbè èkà nène ɖo àkɔtacɔ̃nua ŋuti.

²³Wò la wɔ̀ sìka gàvi klobotoe èvè ɖo àkɔtacɔ̃nua ŋuti; wò la tɔ̃ wo ɖo àkɔtacɔ̃nua be èto èvèawo mè.

²⁴Wò la le kɔ̀sɔ̀kɔsɔviawo ɖo gàvi klobotoeawo ŋuti, lè àkɔtacɔ̃nua be ètowo mè,

²⁵eye ne wò sɔ kɔ̀sɔ̀kɔsɔviawo be ènugbɔ èvèawo le ɖo sìka-gàvi kpɛbɛ èvèawo ŋutia, wò la tɔ̃ wo ɖo dàblaa be àbɔta be èkàwo be ŋùkɔ̀.

²⁶Wò la wɔ̀ sìka-gàvi klobotoe èvè; wò la tɔ̃ wo ɖo àkɔtacɔ̃nua be èto èvè kèwo trɔ ɖoɖa dàblaa be àbɔta be èkàwo gbɔ, yì e mè lɔ̀gea.

²⁷Wò la wɔ̀ sìka-gàvi klobotoe èvè, eye wò la tɔ̃ wo ɖo dàblaa be àbɔta be èkàwo ŋuti, lè àfi kè tɔ̃tɔ̃a tɔ e ji so, lè ŋùkɔ̀, àfi kè wo ca lèa gbɔ, lè dàblaa be àbɔta be èkàa be ètamè.

²⁸Wo la sɔ gàvi klobotoe sɔ ca àkɔtacɔ̃nua be gàvi klobotoeawo ku dàblaa be gàvi klobotoeawo, eye wo la sɔ àvɔvi trɛlɛ jɛ̃-èblisi, sɔ kù àkɔtacɔ̃nua be gàvi klobotoeawo mè, àleke be àkɔtacɔ̃nua ne nɔ̀ dàblaa be èkàa ji, ne mu gbà nɔ hùã, lè àkɔtacɔ̃nua ji ò.

²⁹Eye, wàlɛbɛ kè be la ɖo Kɔ̀kɔ̀ɛpea, Arɔ̀n la do kòjoɖoɖo be àkɔtacɔ̃nu kè ji wo la ŋlɔ̀ Izràɛl be èviwo be nyikɔwo ɖoa ɖo àkɔta; ekèa la nyi ŋùkuɖojinu, wè sia wè lè Tɔhonɔ̀ be ŋùkɔ̀.

³⁰Wò la sɔ Urìm ku Tumìm[38]do kòjoɖoɖo be àkɔtacɔ̃nua mè, eye wo la nɔ̀ Arɔ̀n be èjì ji, lè àkɔta, wàlɛbɛ kè be la va Tɔhonɔ̀ be ŋùkɔ̀a; eŋuã Arɔ̀n la sɔ Izràɛl be èviwo be kòjoɖoɖo ɖo yebe èjì ji, wè sia wè lè Tɔhonɔ̀ be ŋùmè.

³¹Ekèa yomè a, wò la tɔ̃ dàblaa be àwù gblɛ̀lɛ̀a, eye be la nɔ̀ jɛ̃ èblisi.

³²Wò la wɔ̀ èmɔ ɖo yebe dòdòmè, ne ètaa; Wò la ɖo àcɔ na èta be èmɔa be ètomè; àɖàŋù-vɔlɔ̃tɔwo be èdɔ be la nyi; èmɔa nu la sɛ̃ŋu sìgbè àkɔta be ègà-wu nène, eye wo mu la teŋu zɛ̃ ɛ̀ ò.

³³Wò la sɔ èkà jɛ̃ èblisi, jɛ̃-hɛ̃ ku yìbɔ-dàzò ta yòvobòɖà, ɖo yebe ètomè kaka trɔ do, eye wò la do sìka be àyroloe ɖo woa dòmè trɔ do.

³⁴Yòvobòɖà ɖèka yomè a, sìka be àyroloe ɖèka, yòvobòɖà ɖèka yomè a, sìka be àyroloe ɖèka, trɔ do àwù gblɛ̀lɛ̀a be ètomè.

³⁵Àwù kèa ye la nɔ̀ èkɔ̀ na Arɔ̀n, ne e la wɔ̀ vɔsaa: àyroloeawo la nɔ ɖì, wàlɛbɛ kè be la ɖo vɔsawɔ̀pea, lè Tɔhonɔ̀ be ŋùkɔ̀, eye wo la gbà nɔ ɖì, ne be gbà le toa. Ne e zɔ̃ ɖo ɖoɖo kèa jia, mu la ku ò.

³⁶'Ekèa yomè a, wò la sɔ sìka àku-àku wɔ̀ sepòpovi, eye wo la ta ŋɔ̀ŋlɔ̃ kèawo ɖo e ji, sìgbè leke wo tana àlɔ̀gàvi jèsìdo nène be: 'Ekèa ŋuti wo kɔ̀ na Tɔhonɔ̀.'

³⁷Wò la sɔ ɛ̀ ɖo àtrɛlɛ jɛ̃ èblisi ŋuti, eye, be la nɔ̀ dukùa ŋuti. E la nɔ̀ ŋùkɔ̀ na dukùa.

³⁸E la nɔ̀ Arɔ̀n be ŋùgonu, àleke be Arɔ̀n ne teŋu sɔ àgɔ̀ kèwo wo jè do ènu kɔ̀kɔ̀ɛawoa be àgbã, àgɔ̀ kèwo keŋu ŋuti Izràɛlviwo le savɔ ɖo, ne woa sɔ kɔ̀ woa ŋutia, e la nɔ̀ yebe ŋùgonu wè sia wè, àleke be ènu nana kèawo, woa kpɔ àlè lè Tɔhonɔ̀ gbɔ.

³⁹“Ekèa yomè a, wò la do àɖàŋù be àcã na àlɛ̃ŋudà-vɔa be àwù gãa, wo la sɔ àlɛ̃ŋudà-vɔa wɔ̀ dukù, eye wò la gbà wɔ̀ ègojiblanuwo, la nyi àɖàŋù be àcã dodo.

⁴⁰Wò la tɔ̃ àwù gãwo, wò la wɔ̀ ègojiblanuwo, ekèawo yomè a, wò la wɔ̀ kukuwo na Tɔhonɔ̀ be gogo ku àcɛ̀ na Arɔ̀n be èviwo.

⁴¹Wò la do àwùawo na fòfo wò Arɔ̀n ku èvia ŋusùwo, wò la do àmì èta na wo, wò la do èdɔ àsi na wo, wò la ɖo wo kɔ̀kɔ̀ɛ, eye wo la wɔ̀ vɔsa be èdɔ na mù.

⁴²Wò la sɔ àlɛ̃ŋudà-vɔ tɔ̃ cãŋùka, sɔ cɔ̃ àma na wo; e la dìdì so àlìmè va woabe àta.

⁴³Arɔ̀n ku èviawo la do è, ne wo la ɖo gòdodo be gòxɔa mè, àlo, ne wo la dɔ̃ gogo vɔsakpea, la wɔ̀ vɔsa lè kɔ̀kɔ̀ɛpea, àleke be, wo mu gbà dro èvuɛ̃ ɖe be àgbã, ne woa ku ò. Èse màtrɔ ye ekèa nyi na ye ku yebe jìjimè kèwo keŋu la kplɔ̀ ɛ̀ doawo.”