Read gen Toto jo 29 Bible Online

Toto jo 29 - gen bible

Toto jo 29

¹“Leke wò la kɔ̀ woa ŋuti, la sɔ vɔsadɔ nyèa do àsi na woa, ye nyi ekèa: Wò la sɔ ènyì-su ɖèka ku àgbo èvè kèwo be ŋutinuwo keŋu sɔ̀gbèa,

²ekèa yomè a, wò la sɔ kpɔ̃nɔ àkpiti, mawɔɛ àkpiti be klàko kè wo gbò ku àmìa, ku èkpe-ji klàko kè wo sɔ mawɔɛ àkpiti wɔ̀, eye wo sì àmì do a, wo la sɔ èlù be èwɔ wɔ̀ wo.

³Wò la sɔ wo do àjàfi mè; wò la sɔ àjàfia, ku ènyì-sua, kudo àgbò èvèawo va ɖo Tɔhonɔ̀ be ŋùmè.

⁴Wò la kplɔ̀ Arɔ̀n ku èvia ŋusùviawo va ɖo Mawu be Ègòdodo be Gòxɔa mɔnu, eye wò la lè wo ɖì.

⁵Wò la sɔ àwùawo, wò la do àwùgãa na Arɔ̀n; wò la do dàblaa be àwù gblɛ̀lɛ̀a na ɛ̀; wò la do dàblaa na ɛ̀, eye wò la sɔ àkɔ̀tacɔ̃wua kù èkɔ̀ na ɛ̀, wò la sɔ dàblaa be àbɔta be èkàwo kù àbɔta na ɛ̀.

⁶Wò la bla èta na ɛ̀, wò la ɖo kɔ̀kɔ̀ɛ ɖo-àmè be jèsìdoa ŋùgonu na ɛ̀, lè èta bablaa ji.

⁷Eye wò la sɔ àmì kɔ̀kɔ̀ɛa, wò la kɔ̀ ɛ̀ ɖo èta na ɛ̀, eye wò la sì ì na ɛ̀.

⁸Eye, ne wò kplɔ̀ èvia ŋusùawo va ɖo Mawu be ŋùmè vɔ̀a, wò la do àwùgãa na wo.

⁹Wò la bla ègo ji na wo, Arɔ̀n cã, èvia ŋusùawo cã, wò la ɖɔ àcɛ̀-kuku na wo, eye vɔsa-dɔa la nyi woa tɔ̀, sɔ zɔ̃ ɖo èse màtrɔ gbèɖea ji. Wò la sɔ èdɔa do àsì na Arɔ̀n ku èvia ŋusùwo.

¹⁰Wò la sɔ ènyì-sua va fiɔ lè ègòdodo be gòxɔa nu; Arɔ̀n ku èvia ŋusùwo la ɖo àlɔ̀ èta ji na ènyìsua.

¹¹Wò la sò èhlò na ènyì-sua lè Tɔhonɔ̀ be ŋùkɔ̀, lè ègòdodo be gòxɔa be èmɔ nu.

¹²Wò la sɔ ènyì-sua be èhũ; wò la sɔ àlɔ̀vi tɔ e mè, eye wò la sɔ tɔ àzò kèwo wò wɔ̀ ɖo vɔsakpea jiawo ŋuti. Ekèa yomè a, wò la sɔ èhũ kpɔ̀tɛa kɔ̀ ɖo vɔsakpea be dodoea ŋuti.

¹³Wò la ɖè àmì kè kpata lè àdɔ̀mènuawo ŋutia, kè lè àgòa ŋutia, wò la ɖè àyìku èvèawo ku àmì kè le ɖo woa ŋutia, eye wò la sɔ wo ɖo èzò nu, lè vɔsakpea ji.

¹⁴Vɔ̀a, ènyìsua be èlãa, yebe àgbàzea, yebe ènua, wò la fiɔ̃ wo, lè àsàɖaa godo. Èvuɛ̃ be vɔsa ye be nyi.

¹⁵Ekèa yomè a, wò la sɔ àgbò cucugbãa; Arɔ̀n ku èvia ŋusùwo la ɖo àlɔ̀ èta na àgbòa.

¹⁶Wò la sò èhlò na àgbòa; wò la sɔ yebe èhũ, eye wò la wu ì, trɔ do vɔsakpea.

¹⁷Wò la flì àgbòa ɖo tèpe ènè; wò la klɔ yebe àdɔ̀mènuwo ku yebe àfɔ̀tiwo, eye wò la sɔ wo ɖo èlã sòsoa ji ku ètaa.

¹⁸Wò la sɔ àgbò bliboa ɖo èzò nu, lè vɔsakpea ji. Tɔhonɔ̀ be ènumème vɔsa ye be nyi, ènu ɖùɖu kè wo fiɔ̃, ne yebe xɔ̃xũɛ lili bèa jè ŋùmè na Tɔhonɔ̀.

¹⁹Ekèa yomè a, wò la le àgbò èvègɔ̃a: Arɔ̀n ku èvia ŋusùawo la do àlɔ̀ èta ji na àgbòa.

²⁰Wò la sò èhlò na àgbòa; wò la sɔ yebe èhũa tɔ Arɔ̀n be ɖùsimè be èto ŋuti, wò la sɔ tɔ èviawo be èto ŋuti, wò la sɔ tɔ woabe ɖùsi-lɔ be dèglè-fòsu ji, wò la sɔ tɔ woabe ɖùsi-fɔ be dèglè-fòsu ji, eye wò la wu èhũa, trɔ do vɔsakpea.

²¹Wò la sɔ èhũ kè lè vɔsakpea jia, eye wò la sɔ àmì kè wo dona ètaa; wò la wu wo ɖo Arɔ̀n ku yebe àwùwo ŋuti; eye wò la wu wo ɖo èvia ŋusùwo ku woabe àwùwo ŋuti.

²²Wò la sɔ tèpe kèwo do àmì lè àgbòa ŋutiawo, àsike, àmì kè trɔ do àdɔ̀mènuawoa, àgòa ku àmì kè trɔ do èa, àyìku èvèawo kudo àmì kè lè woa ŋutia, eye wò la sɔ ɖùsimè be àtaa cã, ɖoa, èdɔ do-àsi na àmè be àgbò ye be nyi;

²³eye wo la gbà sɔ kpɔ̃nɔ klòbòtò ɖèka, klàko ɖèka, ku àzĩ-klàko ɖèka lè àjàfi kè mè mawɛ-àkpiti be ènu ɖùɖuwo lè, eye wo sɔ ɖo Tɔhonɔ̀ be ŋùmè a mèa.

²⁴Wò la fɔ̀ woa kpata do Arɔ̀n be àlɔ̀xòmè, eye wo la fɔ̀ wo ɖo èvia ŋusùwo be àlɔ̀xòmè; wò la na, wo la sɔ wo na, ku ènu sɔ ɖo Tɔhonɔ̀ be ŋùmè be wɔ̀na.

²⁵Wò la gbà trɔ xɔ̀ wo lè woa si, eye wò la sɔ wo ɖo èzò nu, lè vɔsakpea ji ku ènumème vɔsa kè be xɔ̃xũɛ lili la jè ŋùmè na Tɔhonɔ̀a. Ènuɖùɖu kè wo fiɔ̃ lè èzò nu, na Tɔhonɔ̀a ye be nyi.

²⁶Eye wò la sɔ èdɔ do-àsi be àgbòa be àkɔta, ekè nyi Arɔ̀n tɔ̀a, eye wo la sɔ ɛ̀ na ku ènu sɔ ɖo Tɔhonɔ̀ be ŋùmè be wɔ̀naa: ekèa la nyi àpo mamã.

²⁷Wò la kɔ̀ àkɔta kè wò sɔ ɖo Tɔhonɔ̀ be ŋùmè a ku àta kè wò ɖè ɖɛa ŋuti, ènu kè wo sɔ ɖo Tɔhonɔ̀ be ŋùmè a ku ènu kè wò ɖè lè àgbòa ŋuti ɖɛa, ekè nyi Arɔ̀n ku èviawo tɔ̀a.

²⁸Ekèa la nyi jèna màtrɔ gbèɖe, na Arɔ̀n ku èvia ŋusùwo lè Izràɛlviwo ji, ɖoa ekèa nyi ènu jɔ̀jɔ, eye ènu jɔ̀jɔ ji, kpò be la ci, so Izràɛlviwo gbɔ, àjɔ̀ kè wo la ɖè lè woabe ŋuti fàfa vɔsa ŋuti, ekèa la nyi woabe ènu jɔ̀jɔ na Tɔhonɔ̀.

²⁹Arɔ̀n be àwù kɔ̀kɔ̀ɛawo la va zũ èvia ŋusù kèwo la va nɔ̀ e tèpeawo tɔ̀; àwù kèawo ye wo la do, wàlɛbɛ kèwo la do àmì èta na wo, eye wo la xɔ̀ èdɔa.

³⁰Èvia ŋusù kè la nɔ̀ e tèpea, ekè la nyi hũbonɔa, ekè la nɔ ɖo ègòdodo be gòxɔa mè, la nɔ sumɔ, lè Kɔ̀kɔ̀ɛpea, la do àwùawo, ŋùkèkè adrɛ̃ sɔ̃ŋu.

³¹Wò la sɔ èdɔ do àsi na àmè be àgbòa, wò la ɖà yebe èlã lè Tèpe Kɔ̀kɔ̀ɛ ɖe.

³²Arɔ̀n ku èvia ŋusùawo la ɖù àgbòa be èlã ku kpɔ̃nɔ, kè lè àjàfia mèa.

³³Wò la ɖù ènu kè wò sɔ wɔ̀ èvuɛ̃wo kɔklɔ be èkɔ̀nu kè wò sɔ kɔ̀ woa ŋuti, eye wò sɔ do èdɔ àsi na woa. Àgbàlè àlo àhè ɖekpe mu la ɖù ì ò, ɖoa, ènu ɖùɖu kɔ̀kɔ̀ɛ ye be nyi.

³⁴Ne èlã kè wò sɔ do èdɔ àsi na àmèa ku kpɔ̃nɔa kpɔ̀tɔ̀, eye èŋù kè ɖo e jia, wò la tɔ èzò ekè kpɔ̀tɔ̀a. Àmè ɖe mu la ɖù lè e ŋuti ò, ɖoa, e lè kɔ̀kɔ̀ɛ.

³⁵Nène a ye wò la wɔ̀ na Arɔ̀n ku yebe èvi ŋusùwo, sɔ zɔ̃ ɖo ègbè kè mù ɖè na wòa ji. Wò la sɔ ŋùkèkè adrɛ̃ sɔ̃ŋu do èdɔ àsi na wo.

³⁶Gbè sia gbèa, wò la jrà ènyì-su ɖèka ɖo, na èvuɛ̃ kɔklɔ be vɔsa be kɔ̀nu; wò la wɔ̀ vɔsa ɖo èvuɛ̃ ta, lè vɔsakpea ji, eye wò la wɔ̀ èvuɛ̃ kɔklɔ be èkɔ̀nu, wò la do àmì èta na ɛ̀, la sɔ kɔ̀ e ŋuti.

³⁷Wò la wɔ̀ ŋuti kɔ̀kɔ be kɔ̀nua lè vɔsakpea ji, ŋùkèkè adrɛ̃ sɔ̃ŋu, eye wò la kɔ̀ e ŋuti; nènea, vɔsakpea la nɔ̀ kɔ̀kɔ̀ɛ ŋutɔ, eye ènu ɖekpe kè la tɔ vɔsakpea ŋutia la nɔ̀ kɔ̀kɔ̀ɛ.”

³⁸“Ènu kèwo wò la gbà jràɖo ɖɛ, ɖo vɔsakpea jia, ye nyi ekèawo: àlɛ̃vi kèwo xɔ̀ èpè ɖèkaa, èvè gbè ɖèka, wè sia wè.

³⁹Wò la jrà àlɛ̃vi cucugbã tɔ̀a ɖo, na ŋùdekɛ̃nyɛ, eye wò la jrà èvègɔ̃a ɖo, na fìɛ̃si.

⁴⁰Sɔ kpe ɖo àlɛ̃vi cucugbã tɔ̀a ŋutia, wò la sɔ èwɔ, jijenu gãa be mamã èwogɔ̃a, eye wò la nyàmà ɛ̀ ku àmì kè wo mu zã kpɔ ò a, ègò gãa be mamã ènègɔ̃a, ku èsìkɔ̀ɖɛ be vɛ̃ ègò gãa be mamã ènègɔ̃a.

⁴¹Àlɛ̃vi èvègɔ̃a, wò la jrà ɛ̀ ɖo na fìɛ̃si mè. Wò la gbà wɔ̀ ènu nana kè wò wɔ̀ ŋùdekɛ̃nyɛ mè ku àlɛ̃vi cucugbã tɔ̀a, ku ì, kudo èsìkɔ̀ɖɛ ŋua ke. Ekèa la nyi ènumème vɔsa, ɖùɖu kè wo la fiɔ̃, ne yebe xɔ̃xũɛ lili bèa jè ŋùmè na Tɔhonɔ̀.

⁴²Nène a ye mì la nɔ wɔ̀ ènumème vɔsa, wè sia wè, lè ègòdodo be gòxɔa mɔnu, lè Tɔhonɔ̀ be ŋùmè, so jìjimè, yì jìjimè; funua ye mù la nɔ dogò mì lè, la nɔ pò nupo na wò lè.

⁴³Mù la nɔ dogò Izràɛlviwo lè tèpe kèa, eye àpe gogo la kɔ̀ tèpe kèa ŋuti.

⁴⁴Mù la kɔ̀ ègòdodo be gòxɔa ku vɔsakpea ŋuti. Mù la kɔ̀ Arɔ̀n ku èvia ŋusùwo ŋuti, ne woa nɔ wɔ̀ vɔsa be èdɔ na mù.

⁴⁵Mù la nɔ̀ Izràɛlviwo dòmè, eye mù la nyi Mawu na wo.

⁴⁶Wo la jèsi ì be ènyè Tɔhonɔ̀ ye nyi woabe Mawu, ènyè kè ɖè wo to so Ejiptè be ànyigbã ji, ne ma nɔ̀ woa dòmè. “Ènyè Tɔhonɔ̀ ye nyi woabe Mawu.”