Read gen Toto jo 3 Bible Online

Toto jo 3 - gen bible

Toto jo 3

¹Mosè le nyì ètoa, Yetrò, àmè kè nyi Madìan be hũbonɔa be èlãwo. Gbè ɖèkaa, ekè be kplɔ̀ èlãawo yì zògbèa godoa, e va ɖo Mawu be èto kè wo yɔna be Horɛb be ètoa gbɔ.

²Tɔhonɔ̀ be àtikplɔtɔa ze ɖo e ji, lè èzò bìbi be àɖe ɖe mè. Èzò bìbia lè àve mumu ɖe mè. Èzòa le bì, lè àve mumua be dòdòmè, vɔ̀a, àve mumua mu le fiɔ̃ ò.

³Mosè gblɔ̃ be: “Mù la trɔ do ènukpèkpe gãa kèa, ne ma kpɔ ènu kè ŋuti àve mumu kèa mu le fiɔ̃ ò a.”

⁴Kè Tɔhonɔ̀ kpɔ be e le trɔ do, ne bèa kpɔ ènu nyuɛ̃ ɖe a, Tɔhonɔ̀ yɔ ɛ̀, so èzòa mè be: “Mosè! Mosè!” E ɖo e ŋuti be: “Ènyè ye nyi ekè!”

⁵Tɔhonɔ̀ gblɔ̃ na ɛ̀ be: “Mù gbà dɔ̃ gogo fikèa ò! Ɖè àfɔ̀kpa wòwo lè àfɔ̀, ɖoa, ànyigbã kè ji wò lèa, Tèpe Kɔ̀kɔ̀ɛ be nyi!”

⁶Tɔhonɔ̀ gbà gblɔ̃ be: “Ènyè ye nyi ètɔ wòwo be Mawu, Abràham be Mawu, Izàk be Mawu, Yakɔb be Mawu.” Eye Mosè sɔ ènu cɔ̃ ŋùmè, ɖo, e le vɔ̃ Mawu be kpɔkpɔ.

⁷Tɔhonɔ̀ gblɔ̃ be: “Mù kpɔ dùkɔ̃ nyèa be àyàɖùɖu lè Ejiptè be ànyigbã ji, eye mù sè yebe àlenana lè àkpasɛ̃sɛ̃ be dɔjikpɔtɔwo be àlɔ̀ mè. Ɛ̃ɛ, mù kpɔ yebe vevesèsewo.

⁸Mù ɖì va, be ma hlùɛ̃ ɛ̀ gã, lè Ejiptètɔwo simè, ne ma kplɔ̀ ɛ̀ jo, so ànyigbã kèa ji, yì ànyigbã kè nyɔ, eye be lòlòa ji, ànyigbã kè ji nyìnɔsi ku ànyisi bɔ lèa, àfi kè Kanàntɔwo, Hitìtɔwo, Àmorìtɔwo, Perizìtɔwo, Hivìtɔwo ku Yebisìtɔwo nɔ̀nàa.

⁹Fifìa, kè Izràɛlviwo be àpadodo va ɖo gbɔ nyè, eye mù kpɔ àgbã kpɛ̃kpɛ̃ kè Ejiptètɔwo le dro na woa,

¹⁰fifìa, yì! Mù le dɔ̃ wò ɖoɖa Faraɔ̀n gbɔ; ɖè dùkɔ̃ nyè, Izràɛlviwo to so Ejiptè be ànyigbã ji!”

¹¹Mosè gblɔ̃ na Mawu be: “Àmè kɛ ye mù nyi, ne ma yì Faraɔ̀n be ŋùmè, be ma ɖè Izràɛlviwo to lè Ejiptè ò?”

¹²Tɔhonɔ̀ ɖo e ŋuti na ɛ̀ be: “Mù lè ku wò. Jèsìdo kè wò la sɔ nya be ènyè ye dɔ̃ wòa ye nyi be, ne wò kplɔ̀ dùkɔ̃a to so Ejiptè vɔ̀a, mì la sumɔ Mawu lè èto kèa ji.”

¹³Mosè gblɔ̃ na Mawu be: “Mù la yì Izràɛlviwo gbɔ; mù la gblɔ̃ na wo be: 'Mìa tɔwo be Mawu a dɔ̃ mù ɖoɖa mìa gbɔ.' Vɔ̀a, ne wo biɔ mù sè be: 'Leke wo yɔna ɛ̀ ɖo' mà ɖe? Leke mù la ɖo e ŋuti na wo ò?”

¹⁴Mawu gblɔ̃ na Mosè be: “Mù nyi àmè kè mù nyia!” Eye bè gbà gblɔ̃ be: “Wò la gblɔ̃ na Izràɛlviwo be: 'Mù nyi ye dɔ̃ mù ɖoɖa mìa gbɔ.'”

¹⁵Mawu gbà gblɔ̃ na Mosè be: “Wò la to na Izràɛlviwo be: Tɔhonɔ̀, mìa tɔwo be Mawu, Abràham be Mawu, Izàk be Mawu, Yakɔb be Mawu a ye dɔ̃ mù ɖoɖa mìa gbɔ. Nène a ye nyi àpe Nyikɔ, kaka sɔ yì. Nène a ye jìjimèwo la nɔ yɔ mù.

¹⁶Yì, ne wòa yɔ Izràɛl be àmèsĩsĩwo bɔ̀. Gblɔ̃ na wo be: Tɔhonɔ̀, mìa tɔwo be Mawu, Abràham ku Izàk kudo Yakɔb be Mawu, ze ɖo ji nyè, eye e gblɔ̃ be: 'Mù ɖo è be ma wɔ̀ nyuɛ̃ na mì, ɖo ènu kèwo wo le wɔ̀ ku mì, lè Ejiptè a ŋuti.'

¹⁷Eye mù gblɔ̃ be: mù la ɖè mì to lè Ejiptè be àyàɖùɖua mè, sɔ mì yì Kanàntɔwo, Hitìtɔwo, Àmorìtɔwo, Perizìtɔwo, Hivìtɔwo ku Yebusìtɔwo be èdù mè, èdù kè mè nyìnɔsi ku ànyisi bɔ lèa.

¹⁸Wo la sè àpo ègbè, eye èwò ku Izràɛl be àmèsĩsĩwo, mì la ɖo Ejiptè be èfìɔa be àxomè; mì la gblɔ̃ na ɛ̀ be: 'Tɔhonɔ̀, Hebrùwo be Mawu ɖè ye ɖokoe fiɔ mi. Ɖèmɔ̃ na mi, mia zɔ̃ ŋùkèkè ètɔ̃ be èmɔ̃, yì zògbè ji, ne mia yì savɔ na Tɔhonɔ̀, miabe Mawu a.

¹⁹Vɔ̀a, mù nya be Ejiptè be èfìɔa mu la ɖè èmɔ na mì, be mìa jo, ne àlɔ̀ sɛ̃ŋu ɖe mu zĩ e ji ò.

²⁰Eye mù la vlũ àlɔ̀, eye mù la sɔ ŋùdãnu kèwo keŋu mù la wɔ̀, lè Ejiptètɔwo dòmèa, pò Ejiptètɔwo. Ekèa yomè a, e la ɖè àsi lè mìa ŋuti, ne mìa jo.

²¹Mù la na be Ejiptèviwo la ve dùkɔ̃ kèa nu, àleke be, ne mì la joa, mì mu la yì àlɔ̀ gbalo ò.

²²Ye ŋutia, nyɔ̃nù sia nyɔ̃nù ne biɔ klòsalò ku sìkanuwo, ku àvɔwo yebe àxuekɔ̀tɔwo kudo Ejiptè be nyɔ̃nù kè gbɔ be lèa. Mì la sɔ wo ɖo àcɔ na mìabe ŋusùviwo ku nyɔ̃nùviwo. Nène ye mì la xɔ̀ àdɔ̀kùnuwo lè Ejiptètɔwo sia yeŋu.”