Read gen Toto jo 30 Bible Online

Toto jo 30 - gen bible

Toto jo 30

¹Ekèa yomè a, wò la wɔ̀ vɔsakpe kè ji, wo la nɔ tɔ èzò àmì xɔ̃xũɛ lèa. Wò la sɔ zãgaràti wɔ̀ ɛ̀.

²Yebe dìdimè la nyi àbɔglìgo ɖèka, eye yebe kèkemè la nyi àbɔglìgo ɖèka; yebe dìdimè ku kèkemè la sɔ̀. Yebe èji yìyimè la nyi àbɔglìgo èvè. Wò la wɔ̀ yebe àzòwo la nyi ènu ɖèka ku ì.

³Wò la tre sìka àku-àku ɖo e ŋuti, wo la tre è ɖo e ji, wo la tre è ɖo e mè, wo la tre è ɖo e ŋuti trɔ do, ku àzòawo ŋuti, eye wo la mli sìka, trɔ do è, ɖo yebe nɔ̀nɔmè nu.

⁴Wò la wɔ̀ sìka-gàvi klobotoe ɖo sìka kè wò mlì trɔ do èa gɔ̃mè, lè àkpa èvèawo; wò la wɔ̀ ɖo yebe àxàda èvèawo mè, ne woa sɔ àti lɔbɔɛ kè wo la sɔ nɔ kɔ ɛ̀a, do woa mè.

⁵Wò la sɔ zãgaràti sɔ kpà àti lɔbɔɛ kèawo, eye wò la tre sìka ɖo woa ŋuti.

⁶Wò la sɔ ɛ̀ ɖo èxɔ̀mèsòvɔ kè godo Zòɖùɖu-Ɖakà a lèa be ŋùkɔ̀, lè nùtuvi kè lè Zoɖùɖu a tamèa be ŋùkɔ̀, àfi kè mù la nɔ dogò wò lèa.

⁷Arɔ̀n la nɔ tɔ èzò anùwɛtrɛ̀ kè wò la fiɔ̃ lè e jia; ŋùkè ŋùkèa, wàlɛbɛ kè be la nɔ jrà kãligbɛ̃awo ɖo ɖɛa, e la nɔ tɔ ɛ̀ èzò;

⁸Eye wàlɛbɛ kè Arɔ̀n la sũ kãligbɛ̃awo, fìɛ̃si mèa, e la nɔ tɔ ɛ̀ èzò. Àmì xɔ̃xũɛ lili be àzìzɔ be la nyi lè Tɔhonɔ̀ be ŋùmè tɛ̀gbɛ̀, so jìjimè yì jìjimè.

⁹Mì mu la tɔ èzò àmì hɔ̃hũɛ bu ɖekpekpe kpò, lè e ji, àlo, la wɔ̀ ènumème vɔsa ɖekpe kpò, àlo, ènu ɖùɖu vɔsa ɖekpe bu kpò ò; mì mu la wɔ̀ èsìkɔ̀ɖɛ cã, lè e ji ò.

¹⁰Eye, zè ɖèka lè èpè mèa, Arɔ̀n la wɔ̀ nuvuɛ̃ kɔklɔ be èkɔ̀nua, ɖo vɔsakpea be àzòwo ji. E la sɔ èvuɛ̃ kè àmè gãa be vɔsa be èhũa sɔ wɔ̀ ɛ̀, lè e ji, so jìjimè yì jìjimè. Vɔsakpe kèa la nɔ̀ kɔ̀kɔ̀ɛ ŋutɔ na Tɔhonɔ̀.”

¹¹Tɔhonɔ̀ pò nupo na Mosè be:

¹²“Ne wò la ŋlɔ̀ Izràɛlviwo kpata be nyikɔwo ɖɛa, àmè sia àmè la tu èfɛ̃ ɖo yebe àgbè ta na Tɔhonɔ̀, wàlɛbɛ kè wò la ŋlɔ̀ yebe nyikɔ ɖɛa. Nène a, èvuɛ̃ ɖekpe mu la tù wo, lè àmè hɛ̃hlɛ̃ hùenu ò.

¹³Ŋusù ɖe sia ɖe kè wo la hlɛ̃a, la tu sekɛ̀l be mamãmè na Tɔhonɔ̀; e la nyi kɔ̀kɔ̀ɛpea be sekɛ̀l kè lè gerà èwì na sekɛ̀l ɖèkaa.

¹⁴Ŋusù ɖekpekpe kè gbe ɖo èpè èwì to e ŋuti, eye wo la hlɛ̃ ɛ̀ kpòa, la jɔ̀ ènu kèa na Tɔhonɔ̀.

¹⁵Àjɔ̀ kè mì la na Tɔhonɔ̀, ɖo mìabe àgbèwo taa, ècitɔwo tɔ̀a mu la wu sekɛ̀l èfã, eye wɔ̀amènɔ̀wo tɔ̀a mu la hùe wu sekɛ̀l ɖèka be mamãmè ò.

¹⁶Wò la xɔ̀ àjɔ̀a be èci lè Izràɛlviwo si, eye wò la sɔ na, ne ègòdodo be gòxɔa be èdɔwɔ̀wɔ. Ekèa la nyi mìabe àgbè be àjɔ̀ be ŋùkuɖojinu lè Tɔhonɔ̀ be ŋùmè na Izràɛlviwo.”

¹⁷Tɔhonɔ̀ pò nupo na Mosè, eye be gblɔ̃ na ɛ̀ be:

¹⁸“Wò la sɔ gàjɛ̃ wɔ̀ èsì lèle be àdàwa ku yebe sìhɛ̃a, ne mìa sɔ nɔ lè mìa ɖokoewo ɖì: wò la sɔ ɛ̀ ɖo ègòdodo be gòxɔa ku vɔsakpea dòmè, eye wò la kù èsì ɖo e mè.

¹⁹Arɔ̀n ku èvia ŋusùawo la sɔ nɔ klɔ woabe àlɔ̀ ku àfɔ̀wo.

²⁰Ne wo la ɖo ègòdodo be gòxɔa mèa, wo la lè èsì, ne wo mu gbà ku ò; àlo, ne wo la gogo vɔsakpea, la wɔ̀ vɔsa be èdɔ, la mè ènu ɖùɖu kè wo la fiɔ̃ na Tɔhonɔ̀a,

²¹wo la klɔ àlɔ̀ ku àfɔ̀wo, ne wo mu gbà ku ò. Ekèa la nyi èse màtrɔ na Arɔ̀n ku yebe èviwo, so jìjimè, yì jìjimè.”

²²Tɔhonɔ̀ gblɔ̃ na Mosè be:

²³“Wò la ji ègbe-xɔ̃xũɛ lili nyuɛ̃wo: wò la ji àbɛyɛ èsì tɔ̀ sekɛ̀l àlɔ̀ àtɔ̃, sinamɔ̀n be ènu xɔ̃xũɛ kè xũɛ nyuɛ̃ ɖe a mamãmè kè le nyi àlɔ̀ èvè ku èfãa, àti hɔ̃hũɛ fio fio àlɔ̀ èvè ku èfã;

²⁴kasè-ku, Kɔ̀kɔ̀ɛpea be sekɛ̀l àlɔ̀ àtɔ̃ ku àmìti be àmì ègò gãa ɖèka.

²⁵Wò la sɔ wo wɔ̀ àmì kɔ̀kɔ̀ɛ kè wò la nɔ do èta na àmèa; wò la wɔ̀ ɛ̀, be la nyi àmì xɔ̃xũɛ lili, eye be la nyi àmì kɔ̀kɔ̀ɛ kè wò la nɔ do èta na àmèa.

²⁶Wò la sì ì ɖo ègòdodo be gòxɔa ŋuti, do Zòɖùɖu-Ɖakà a,

²⁷èkplɔ̃a ku yebe ŋutinuwo kpata, kãligbɛ̃tia ku yebe ŋutinuwo, àmì xɔ̃xũɛ be vɔsakpea,

²⁸ènumème be vɔsakpea ku yebe ŋutinuwo keŋu, àdàwa gãa ku yebe sìhɛ̃a.

²⁹Wò la kɔ̀ woa ŋuti, eye wo la nɔ̀ kɔ̀kɔ̀ɛ ŋutɔ; ènu kè la gbe tɔ woa ŋuti kpòa la nɔ̀ kɔ̀kɔ̀ɛ.

³⁰Wò la do àmì èta na Arɔ̀n ku èvia ŋusùwo cã, eye wò la kɔ̀ woa ŋuti, ne woa nɔ wɔ̀ vɔsa be èdɔ na mù.

³¹Wò la gblɔ̃ na Izràɛlviwo be: ekèa ye nyi àmì kɔ̀kɔ̀ɛ kè wo la nɔ do ètaa, so jìjimè yì jìjimè, tɔ̀ nyè ye be nyi.

³²Àmè ɖekpe mu la sì ì ɖo ŋuti ò. Mì mu la wɔ̀ àmì bu ku ènu kèwo wo sɔ wɔ̀ ɛ̀a ò, ɖoa wo kɔ̀ e ŋuti, eye be la nɔ̀ kɔ̀kɔ̀ɛ na mì.

³³Àmè kè la wɔ̀ àmì kèa hati, eye be la sì ì na àmè bu ɖe a, wo la crɔ̃ ɛ̀ jo lè yebe xòmètɔwo dòmè.”

³⁴Tɔhonɔ̀ gblɔ̃ na Mosè be: “Wò la ji ègbe xɔ̃xũɛ be àmì kèwo nyi: storàs, ambrè, gàlbanɔ̀m, kèwo xũɛ̃ nyuɛ̃ ɖe a ku lifi àku-àku, eye woa kpata be jijemè ne sɔ̀.

³⁵Wò la sɔ wo wɔ̀ àmì xɔ̃xũɛ kè mè wò la do èjè, eye e mè la kɔ̀a, eye wò la kɔ̀ e ŋuti.

³⁶Wò la tù yebe ènuwɔ̀nuawo, eye wò la sɔ ɛ̀ ɖo Zòɖùɖu-Ɖakà a be ŋùkɔ̀, lè ègòdodo be gòxɔa mè, àfi kè mù la dogò wò lèa. E la nɔ̀ kɔ̀kɔ̀ɛ na mì.

³⁷Eye àmì xɔ̃xũɛ kè wò la wɔ̀a, mì mu la wɔ̀ eŋuã ke, ku enuwɔ̀nuwo, na mìabe zãzã ò! Mì la kɔ̀ e ŋuti na Tɔhonɔ̀.

³⁸Àmè kè la wɔ̀ yebe hati, ne bèa nɔ sè yebe xɔ̃xũɛa, wo la crɔ̃ ɛ̀ jo lè yebe xòmètɔwo dòmè.”