Read gen Toto jo 31 Bible Online

Toto jo 31 - gen bible

Toto jo 31

¹Tɔhonɔ̀ gblɔ̃ na Mosè be:

²“'Kpɔɖa! Mù yɔ Besàlɛl, àmè kè nyi Urì be èvi ŋusù, Urì kè nyi Xur kè so Yudà be kɔ̀ta mèa be èvi ŋusùa, be nyikɔ.

³Mù sɔ Mawu be gbɔ̃gbɔ̃ ɖɔ ɛ̀, ne bèa ɖo àdòdò, ènunya, susu lè xixe kplògòdòa be àɖàŋù be èdɔwɔ̀wɔwo mè:

⁴àɖàŋù-nutata, sìka dɔwɔ̀wɔ, klòsalò dɔwɔ̀wɔ, gàjɛ̃ dɔwɔ̀wɔ,

⁵èkpewo be kpàkpa ku èkpewo tata, àtiwo kpàkpa ku àti be ènutata, kudo èdɔwɔ̀wɔ vòvòvò buwo.

⁶Sɔ wu ekèa, mù sɔ Ohòliab, kè nyi; Àhisamàk kè so Dàn be kɔ̀taa mèa be èvi ɖo e gbɔ, eye mù sɔ àdòdò ɖo àmèsĩsĩ ɖe sia ɖe be èjì mè, àleke be woa teŋu wɔ̀ ɖo ègbè kè mù ɖè na woa ji:

⁷ègbèɖèɖe kèwo ye nyi: Ègòdodo be gòxɔa, Zòɖùɖu-Ɖakà a, nùtuvi kè lè e nua, gòxɔa be ŋutinuwo keŋu,

⁸èkplɔ̃a ku yebe ŋutinuwo, kãligbɛ̃ti kè wo sɔ sìka àku-àku wɔ̀a ku yebe ŋutinuwo, lifi be vɔsakpea,

⁹ènumème be vɔsakpea ku yebe ŋutinuwo keŋu, àdàwa gãa, ku yebe sìhɛ̃a,

¹⁰vɔsa be èkɔ̀nu be àwùawo, hũbonɔ Arɔ̀n be àwù kɔ̀kɔ̀ɛwo, àwù kèwo èviawo la nɔ do, na vɔsa be èdɔwɔ̀wɔa,

¹¹àmì do ètaa, àmì xɔ̃xũɛ kè wo la tɔ èzò na Kɔ̀kɔ̀ɛɛpea. Wò la wɔ̀ ɖo ègbè kè mù ɖè na wòa ji tututu.”

¹²Tɔhonɔ̀ gblɔ̃ na Mosè be:

¹³“'Gblɔ̃ na Izràɛlviwo be: mìabe ŋùkuvi la nɔ nɔ̀ jɛ̃gbɔ̃zã nyèwo ji, ɖoa, jèsìdo be nyi lè ènyè ku mìa dòmè, so jìjimè yì jìjimè, ne àmèwo ne nya be ènyè Tɔhonɔ̀ ye kɔ̀ mìa ŋuti.

¹⁴Mìabe ŋùkuvi ne nɔ̀ jɛ̃gbɔ̃zãa ji, ɖoa, e lè kɔ̀kɔ̀ɛ na mì. Àmè ɖekpekpe àmè kè la dovlo èa, wo la wù ì. Ɛ̃ɛ, àmè ɖekpekpe àmè kè la wɔ̀dɔ, àzã ŋua gbèa, wo la ɖè yebe àgbè jo, lè yebe xòmètɔwo dòmè.

¹⁵Àmè sia àmè la wɔ̀ yebe èdɔ lè ŋùkèkè àdɛ̃ mè; ŋùkèkè adrɛ̃gɔ̃ a gbè ye nyi Sabat gbè, jɛ̃gbɔ̃zã kè nyi Tɔhonɔ̀ tɔ̀a. Àmè ɖekpekpe kè la wɔ̀ èdɔ jɛ̃gbɔ̃zã gbèa, wo la wù ì.

¹⁶Izràɛlviwo la lebè na jɛ̃gbɔ̃zã, so jìjimè yì jìjimè, àleke be jɛ̃gbɔ̃zã ne nyi zòɖùɖu kòkòɖàbì na wo.

¹⁷Kaka sɔ yìa, jèsìdo be la nyi na nyè ku Izràɛlviwo be ŋùkèkè àdɛ̃ ye Tɔhonɔ̀ sɔ wɔ̀ jiŋùkusi ku ànyigbãa, vɔ̀a, ŋùkèkè adrɛ̃gɔ̃ a gbèa, e ɖo àlɔ̀ tè, eye be gbɔ̃jɛ̃.”

¹⁸Ekèa yomè a, kè Tɔhonɔ̀ pò nupo ku Mosè lè Sinaì be ètoa ji vɔ̀a, e sɔ zòɖùɖu be èkpe gbàjà èvèawo do àsi na Mosè, èkpe gbàjà kèwo ji Mawu sɔ yebe àlɔ̀vi ŋlɔ̀ ènu ɖoa.