Read gen Toto jo 32 Bible Online

Toto jo 32 - gen bible

Toto jo 32

¹Ekè dùkɔ̃a kpɔ be Mosè mu le gbɔ̀ so ètoa ji ò a, dùkɔ̃a va bɔ̀ lè Arɔ̀n gbɔ, eye be gblɔ̃ na ɛ̀ be: “'Fifìa, sitè, ne wòa wɔ̀ vòdu kèwo la nɔ̀ ŋùkɔ̀ na mia, na mi, ɖoa, Mosè, ŋusù kè kplɔ̀ mi to so Ejiptè be ànyigbã jia, mi mu nya ènu kè jɔ̀ ɖo e ji ò.”

²Arɔ̀n gblɔ̃ na wo be: “'Mì ɖè sìka-gàvi kèwo ye lè mìa srɔ̃wo, mìabe èvi ŋusùwo ku mìabe èvi nyɔ̃nùwo be èto mèawo va na mù.”

³Dùkɔ̃a keŋu ɖè sìka-gàvi kèwo lè woabe ètomèa, eye wo sɔ wo va na Arɔ̀n.

⁴Kè e xɔ̀ sìkaa lè woa sia, e trɔ àsi lè e ŋuti ku ègàkpànu, eye be sɔ wɔ̀ sìka be ènyìvi tata. Eye wo gblɔ̃ be: “'Izràɛl, àpo vòduwo ye nyi ekèawo, vòdu kèwo ye kplɔ̀ wò to so Ejiptè be ànyigbã jia!”

⁵Kè Arɔ̀n kpɔ ekèa, e tù vɔsakpe ɖo ŋùkɔ̀ na sìka be ènyìvi tataa. Ekèa yomè a, Arɔ̀n ɖè è gblɔ̃ be: “Èsɔ̀a, mi la ɖù àzã na Tɔhonɔ̀!”

⁶Kè èŋù kèa, kè wo gbe fɔ̃ kpòa, wo wɔ̀ ènumème vɔsa, eye wo hɛ̃ ŋuti fàfa vɔsa va. Dùkɔ̃a nɔ̀ ànyi eye wo ɖùnu eye wo nùnu, ekèa yomè a, wo sitè, eye wo tɔ jìjɔɛ kpɔkpɔ.

⁷Tɔhonɔ̀ gblɔ̃ na Mosè be: “Ɖì, ne wòa yì kpɔ dùkɔ̃ kè wò ɖè to so Ejiptè a, ɖoa, dùkɔ̃ wòa trɔ, eye be gble keŋu-keŋu.

⁸Wo mu gbɔ̃jì ɖɛ gbɔ̀xue trã èmɔ, jo lè àfɔ̀ɖèɖe kè mù do àsi na woa ji ò. Wo wɔ̀ ènyìvi tata na woa ɖokoe, wo do èta gũ na ɛ̀, wo wɔ̀ vɔsa na ɛ̀, eye wo gblɔ̃ be: 'Izràɛl, àpo vòduwo ye nyi ekèawo, woawo kèwo ye ɖè wò to so Ejiptè be ànyigbã jia, ye nyi ekèawo!'

⁹Eye Tɔhonɔ̀ gblɔ̃ na Mosè be: 'Mù le kpɔ dùkɔ̃ kèa: Ɛ̃ɛ! Dùkɔ̃ kè be èkɔ̀ lìaa ye be nyi!

¹⁰Fifìa, ɖè àsi lè ŋuti nyè ne àpe àdɔ̀mèze ne fiɔ̃ wo; mù la crɔ̃ wo, eye mù la sɔ wò wɔ̀ dùkɔ̃ gã ɖe.”

¹¹Vɔ̀a, Mosè blìbɔ̀ na Tɔhonɔ̀, yebe Mawu, eye be gblɔ̃ be: “Nukɛ ŋuti àdɔ̀mèze wòa la bì ɖo àpo dùkɔ̃ kè wò ɖè to so Ejiptè ku ŋusɛ̃ kudo àlɔ̀ sɛ̃sɛ̃a ɖo ò?

¹²Nukɛ ŋuti Ejiptètɔwo la nɔ gblɔ̃ be: 'Àdɔ̀mèvuɛ̃ ye be sɔ ɖè wo to, ne bèa wù wo, lè ètoawo ji, ne bèa crɔ̃ wo, lè ànyigbãa be ŋùmè,' ɖo ò? Ɖè àsi lè àpo àdɔ̀mèzea ŋuti, eye trɔ lè èvuɛ̃ kè wò ɖo, be yèa wɔ̀ ku dùkɔ̃ wòa yomè.

¹³Ɖo ŋùku Abràham, Izàk ku Izràɛl, àpo sumɔ̃vi kèwo wò ŋutɔ wò fĩa àjɔ̀gbè na, eye wò gblɔ̃ be: 'Mù la na mìabe jìjimè la jì ɖo e ji, eye wo la sùgbɔ sìgbè wètriviwo nène, eye èdù kèa keŋu kè mù gblɔ̃ be mù la sɔ na mìabe jìjimèviwoa, wo la xɔ̀ ɛ̀, sɔ ɖù ècrɔ̃, kaka sɔ yì.'”

¹⁴Ekèa yomè a, Tɔhonɔ̀ ɖe àsi lè èvuɛ̃ kè be ɖo be yèa wɔ̀ ku yèbe dùkɔ̃a ŋuti.

¹⁵Mosè le Zòɖùɖu be èkpe èvèawo ɖo àsi, eye be trɔ ɖì, so ètoa ji, èkpe kèwo ji wo ŋlɔ̀ ènu ɖo àkpa èvè na, eye wo ŋlɔ̀ ɛ̀ ɖo ŋùkɔ̀ ku ŋùgbe na a;

¹⁶èkpeawo nyi Mawu be èdɔwɔ̀wɔ; ènu ŋɔ̀ŋlɔ̃ a cã nyi Mawu be àlɔ̀nu, eye wo ta ɛ̀ ɖo èkpeawo mè.

¹⁷Yosùa sè dùkɔ̃a be zigìdi, eye be gblɔ̃ na Mosè be: “'Àhùapa le ɖì lè àsàɖaa mè!”

¹⁸Vɔ̀a Mosè ɖo e ŋuti na ɛ̀ be: “'Mu nyi jiɖùɖu be èhà, àlo, mɔɛ̃làla be èhà ò. Ènu kè mù le sèa, jìjɔɛ kpɔkpɔ be èhàwo ye!”

¹⁹Vɔ̀a, wàlɛbɛ kè be zɔ̃ le gogo àsàɖaa, Mosè kpɔ ènyìvia, ku àlekè dùkɔ̃a le ɖuwè ɖoa; Mosè do àdɔ̀mèze: e sɔ èkpeawo xla ɖo ànyi, eye wo gbã ɖo ètoa gɔ̃mè.

²⁰E sɔ ènyìvi kè wo wɔ̀a, tɔ ɛ̀ èzò, gbã ɛ̀ gudu-gudu, eye be sɔ ɛ̀ kãkã ɖo èsì be ŋùkɔ̀, sɔ na Izràɛlviwo, wo nù.

²¹Mosè gblɔ̃ na Arɔ̀n be: “'Nukɛ dùkɔ̃ kèa wɔ̀ na wò, ye wò na èvuɛ̃ gã ɖe va e ji ò?”

²²“'Àpetɔ nyè, mù gbà do àdɔ̀mèze ò! Wò ŋutɔ wò nya be dùkɔ̃a lè jɔ̀gbè vuɛ̃ mè.

²³Wo gblɔ̃ na mù be: 'Wɔ̀ vòdu kèwo la nɔ zɔ̃ lè ŋùkɔ̀ na mia, na mi, ɖoa, Mosè, ŋusù ŋua kè kplɔ̀ mi jo lè Ejiptè-nyigbã jia, mi mu nya ènu kè jɔ̀ ɖo e ji ò.'

²⁴Mù biɔ wo sè be: 'Àmè kɛ si sìka lè ò?' Wo ɖè è lè woabe ètowo mè, eye wo sɔ na mù. Mù srè è lè èzò mè, eye mù sɔ wɔ̀ ènyìvi kèa.”

²⁵Mosè kpɔ be dùkɔ̃a ci àya mè, e kpɔ be Arɔ̀n gble è ɖɛ, eye be trɔ ènu kòko na yebe kɛ̃tɔwo.

²⁶Ekèa yomè a, Mosè yì nɔ̀tè ɖo àsàɖaa be àgbo nu, eye be gblɔ̃ be: “Àmè kèwo lè Tɔhonɔ̀ jiawo ne va gbɔ nyè!” Levì be èvi ŋusùwo kpata va bɔ̀, trɔ do è.

²⁷E gblɔ̃ na wo be: “'Tɔhonɔ̀, Izràɛl be Mawu a gblɔ̃ be: 'Ŋusù sia ŋusù ne sã yebe èwui ɖo àlì ji. Mì la to èxɔ̀ ɖe sia ɖe nu, lè àsàɖaa mè, eye mì la wù mìa nɔ̀vi ŋusùwo, mìa xlɔ̃wo ku mìabe xòmètɔwo!'”

²⁸Levì be èvi ŋusùwo wɔ̀ ɖo Mosè be ènyàa ji, eye ŋusù sìgbè hotu ɖèka èkà èwì vɔ àtɔ̃ nène ku lè dùkɔ̃a mè.

²⁹Mosè gblɔ̃ be: “'Egbèa, Tɔhonɔ̀ ŋutɔ le ɖo mì ànyi. Sìtu kè be le na mìa, mìa dòmètɔ ɖe sia ɖe plè è ku ye ŋutɔ èvia kudo nɔ̀via be èhũ.”

³⁰Vɔ̀a, kè èŋù kèa, Mosè gblɔ̃ na dùkɔ̃a be: “Mì wɔ̀ èvuɛ̃ gãa ɖe, gãkea, fifìa, mù la lia ètoa, yì Tɔhonɔ̀ gbɔ. Ta mu nyɔ ò a, mù la xɔ̀ sɔsɔkè na mìabe èvuɛ̃a.”

³¹Mosè trɔ va Tɔhonɔ̀ gbɔ, eye be gblɔ̃ be: “'E nyrã ŋutɔ! Dùkɔ̃ kèa wɔ̀ èvuɛ̃ gã ɖe, eye wo wɔ̀ sìka be vòduwo.

³²Vɔ̀a, fifìa, tɔ̀ wò jɔ̀; wò mu la sɔ woabe èvuɛ̃ sɔ kè wo jro ò a? Ne mu nyi nène ò a, eŋuã, tutu nyikɔ nyè lè xoma kè wò ŋlɔ̀a mè.”

³³Tɔhonɔ̀ ɖo e ŋuti na Mosè be: “Àmè kè wɔ̀ èvuɛ̃ ɖo ŋuti nyèa ye mù la tutu lè xoma nyèa mè.

³⁴Fifìa, jo yì! Kplɔ̀ dùkɔ̃a yì àfi kè mù gblɔ̃ na wòa, eye àtikplɔtɔ nyè ye la nɔ̀ ŋùkɔ̀ na wò. Vɔ̀a, gbè kè gbè nyè ŋutɔ mù la vaa, mù la dɔ̃ èto na wo, ɖo woabe èvuɛ̃ ta.”

³⁵Eye Tɔhonɔ̀ dɔ̃ èto na dùkɔ̃a, ɖo ènyìvi kè be na Arɔ̀n wɔ̀a ŋuti.