Read gen Toto jo 33 Bible Online

Toto jo 33 - gen bible

Toto jo 33

¹Tɔhonɔ̀ pò nupo na Mosè, eye be gblɔ̃ na ɛ̀ be: “'Jo lè tèpe kèa ku dùkɔ̃ kè wò kplɔ̀ to lè Ejiptè a, eye wòa yì ànyigbã kè be àjɔ̀gbè mù fìã na Abràham, na Izàk ku Yakɔb, wàlɛbɛ kè mù gblɔ̃ na wo be: 'Jìjimèvi wòwo mù sɔ ɛ̀ le na a' ji.

²Mù la dɔ̃ àtikplɔtɔ ɖe ɖo ŋùkɔ̀ na wò, eye mù la nyà Kanàntɔ, Àmorìtɔ ku Hitìtɔwo, mù la nyà Perizìtɔ, Hivìtɔ ku Yebusìtɔwo lè ŋùkɔ̀ na wò.

³Jè èmɔ̃, yì ànyigbã kè ji nyìnɔsi ku ànyisi bɔ ɖoa ji. Nyè mu la teŋu yì ku wò ò, ɖo dùkɔ̃ kè be èkɔ̀mè lìaa ye wò nyi, eye, ne mù yì ku wòa, mù la va crɔ̃ wò lè èmɔ̃a ji.”

⁴Dùkɔ̃a sè jɔ̀gbè vuɛ̃ be ènyà kèa, eye wo ci ŋuzĩzĩ mè. Àmè ɖekpe mu gbà do yebe àzã ɖùɖu be àwùwo ò.

⁵Tɔhonɔ̀ gblɔ̃ na Mosè be: “'Gblɔ̃ na Izràɛlviwo be: 'Dùkɔ̃ kè be èkɔ̀mè lìaa ye mì nyi. Ne mù ɖo mìa dòmè, hùenu viɖe kpòa, mù la crɔ̃ mì. Fifìa, mì ɖè mìabe àzã ɖùɖu be àwùwo ɖɛ, eye mù la nya ènu kè mù la wɔ̀ na mìa.'”

⁶Eye Izràɛlviwo ɖè woabe àzã ɖùɖu be àwùwo ɖɛ, so Horɛb be ètoa gbɔ.

⁷Mosè sɔ gòxɔa, yì tù ì ɖo àzɔ̀ge na àsàɖaa, eye be yɔ ɛ̀ be: “Ègòdodo be Gòxɔ”. Eye àmè ɖekpekpe àmè kè ji be yèa pòɖɛ̀, yɔ Tɔhonɔ̀a, yìnà ègòdodo be gòxɔ kè lè àzɔ̀ge na àsàɖaa gbɔ.

⁸Eye, ne Mosè to va le yì gòxɔa gbɔa, dùkɔ̃a keŋu sinatè, àmè ɖekpekpe àmè tɔnatè ɖo yebe gòxɔ mɔnu, fɔ̀nà ŋùkuvi ɖo Mosè ji, kaka na wàlɛbɛ kè be ɖo gòxɔa mèa.

⁹Eye, ne Mosè ɖo gòxɔa mè vɔ̀a, lili bablaa ɖìnà va nɔ̀nà gòxɔa mɔnu, eye be pònà nupo ku Mosè.

¹⁰Dùkɔ̃a keŋu kpɔna lili bablaa le gòxɔa mɔnu; dùkɔ̃a keŋu sinatè eye àmè sia àmè dona èta gũ lè gòxɔa mɔnu.

¹¹Tɔhonɔ̀ pònà nupo na Mosè àgbãŋùgbà, sìgbè àlekè ŋusù ku ŋusù pònà nupoa nène. Ekèa yomè a, Mosè trɔna gbɔ̀ va àsàɖaa mè, wàlɛbɛ kè yebe àlɔ̀dotɔ ɖèkajɛvi, Yosùa kè nyi Nun be èvia, mu tona lè gòxɔa mè ò a.

¹²Mosè gblɔ̃ na Tɔhonɔ̀ be: “'Kpɔɖa! Wò ŋutɔ wò gblɔ̃ na mù be: 'Kplɔ̀ dùkɔ̃ kèa jo.' Vɔ̀a, wò mu ɖè àmè kè wò la dɔ̃ kpe ɖo ŋuti nyèa fiɔ mù ò. Gãkea, èwò ye gblɔ̃ be: 'Mù nya àhèmè nyikɔ wò,' eye wò gbà gblɔ̃ be: 'Wò fɔ̀ màje lè gbɔ nyè'.

¹³Fifìa, ne mù kpɔ màje lè gbɔ wò nyàwo a, ɖè èmɔ̃ wòa fiɔ mù, eye mù la jèsi wò. Nène a ye mù la fɔ̀ màje lè gbɔ wò nyàwo. Eye ɖo ŋùku be dùkɔ̃ kèa, dùkɔ̃ wò ye be nyi!”

¹⁴Tɔhonɔ̀ biɔ ɛ̀ be: “'Nyè ŋutɔ ye la yì na wò gbɔ̃jɛ̃a?”

¹⁵Mosè ɖo e ŋuti be: “'Ne wò ŋutɔ wò mu la va òa, mù gbà kplɔ̀ mi jo lè àfi kèa ò.

¹⁶Àleke àmèwo la wɔ̀, la nya be nyè ku dùkɔ̃ wòa, mi fɔ̀ màje lè gbɔ wò, ne wò mu le zɔ̃ ku mi, eye nyè ku dùkɔ̃ wòa, mi mu tovò na dùkɔ̃ kpɔ̀tɛ kèwo keŋu lè ànyigbã jia ò?”

¹⁷Tɔhonɔ̀ ɖo e ŋuti na Mosè be: “Ènu kè wò gblɔ̃ fifìa, mù la wɔ̀ e cã, ɖoa, wò fɔ̀ màje so gbɔ nyè, eye mù nya wò, gbà nya àpo àhèmè nyikɔ.”

¹⁸Mosè trɔ gblɔ̃ na ɛ̀ be: “'Eŋuã, jo ɖè àpo gogoa fiɔ mù jro!”

¹⁹Tɔhonɔ̀ ɖo e ŋuti na ɛ̀ be: “Mù la kɔ̀ àdɔ̀mè nyuɛ̃ nyèwo keŋu ɖo ji wò, eye mù la ɖè 'Tɔhonɔ̀' be nyikɔ gblɔ̃ le ŋùkɔ̀ na wò; mù ɖènà ènyuɛ̃ wɔ̀wɔ nyè, sɔ na àmè kè mù jro a, eye mù sɔna èvuɛ̃ kènà àmè kè mù jro a.

²⁰E gbà gblɔ̃ be: “Wò mu la teŋu kpɔ àpe ŋùmè ò, ɖoa, àgbètɔ mu la teŋu kpɔ àpe ŋùmè, eye be la gbà nɔ̀ àgbè ò.”

²¹Tɔhonɔ̀ gbà gblɔ̃ be: “'Tèpe ɖe ye nyi ekèa lè gbɔ nyè. Wò la nɔ̀tè ɖo àkpãa ji.

²²Eye, wàlɛbɛ kè gogo nyè la va yìa, mù la sɔ wò ɖo àkpãa be èdoa mè, eye mù la sɔ àlɔ̀ nyè cɔ̃ ji wò, wàlɛbɛ kè mù va le yìa.

²³Ekèa yomè a, mù la ɖè àlɔ̀ jo, eye wò la kpɔ ŋùgbedòmè na mù; vɔ̀a, wò mu la teŋu kpɔ ŋùkumè na mù ò!”