Read gen Toto jo 35 Bible Online

Toto jo 35 - gen bible

Toto jo 35

¹Mosè bɔ̀ Izràɛlviwo be àmèha a kpata, eye be gblɔ̃ na wo be: “Ènyà kèwo ji Tɔhonɔ̀ be mia zɔ̃ doawo ye nyi ekèawo:

²“Ŋùkèkè àdɛ̃ ye mi la nɔ wɔ̀ miabe èdɔwo; vɔ̀a, ŋùkèkè adrɛ̃gɔ̃ a, la nyi ènu kɔ̀kɔ̀ɛ na mi: e ye le nyi sabat, kè le nyi Tɔhonɔ̀ be jɛ̃gbɔ̃zã gbè. Àmè ɖekpekpe àmè kè la wɔ̀ èdɔ ɖe, àzã ŋua gbèa, wo la wù ì.

³Àfi ɖekpekpe kè mì lèa, mì mu la do èzò jɛ̃gbɔ̃zãa gbè ò.”

⁴Mosè gblɔ̃ na Izràɛlviwo be àmèha a keŋu be: Tɔhonɔ̀ ɖè ègbè be:

⁵“Mìa jɔ̀ ènu, lè mìa dòmè, na Tɔhonɔ̀; àmè sia àmè kè lɔ̃ fàa, ne sɔ ènunana kèawo va na Tɔhonɔ̀: sìka, klòsalò, gàjɛ̃,

⁶àvɔ jɛ̃-èblisi, àvɔ jɛ̃-hɛ̀, àvɔ yìbɔ̀-dàzò, àlɛ̃ŋudà-vɔ, ekè wo sɔ ègbɔ be èfu wɔ̀a,

⁷àgbò be àgbàze kèwo lè jɛ̃ a, ènyɔ̃ be àgbàze, zãgaràti,

⁸kãligbɛ̃ mè-mi, àmì do èta be ègbe hɔ̃hũɛwo ku àmì hɔ̃hũɛ na àzìzɔ be vɔsa,

⁹Bèril-kpe xɔ̀asì ku èkpe kèwo wo la do dàblaa ku àkɔtacɔ̃nua ŋutia.

¹⁰Àmè ɖo nunya kèwo lè mìa dòmèawo keŋu ne va wɔ̀ ènu kèawo kpata kè be ègbè Tɔhonɔ̀ ɖèa.

¹¹Nɔ̀pea ku yebe gòxɔa, yebe àvɔa, yebe ètomètiawo, yebe ènumèsòtiawo, yebe sɔti ku yebe gɔ̃mè ɖo-nuawo;

¹²Zòɖùɖu-Ɖakà a ku yebe àti lɔ̀bɔ̀awo, nùtuvia, èxɔ̀mèsòvɔa

¹³èkplɔ̃a ku yebe àti-lɔ̀bɔ̀awo, yebe ŋutinuawo kpata kudo vɔsa be kpɔ̃nɔa,

¹⁴kãligbɛ̃ a be kãligbɛ̃tia ku yebe ŋutinuwo, kãligbɛ̃ ku kãligbɛ̃ mè-mia,

¹⁵anùwɛtrɛ̀ be vɔsakpea ku yebe àti-lɔbɔɛawo, àmì do ètaa, àmì hɔ̃hũɛ kè wo la sɔ nɔ tɔ èzòa ku èxɔ̀mɔnu-vɔa, le nɔ̀pea be èmɔnu,

¹⁶ènumème vɔsakpea ku yebe gàjɛ̃ be gàjaa, yebe ènumèsòtiawo kudo yebe ŋutinuawo keŋu; àdàwa gãa ku yebe sìhɛ̃a,

¹⁷gbàjà ji be kùŋùtuawo ku sɔtiawo, yebe gɔ̃mè ɖonuawo, kudo gbàjà ji be èxɔ̀mɔnu-vɔa,

¹⁸nɔ̀pea be èmɔnu be ègũmè trɔ̃-tiawo, gbàjàa ji be sɔtiawo ku woabe èkàwo,

¹⁹vɔsa be àwù kè wo la zã lè Kɔ̀kɔ̀ɛpea, hũbonɔ Arɔ̀n be àwù kɔ̀kɔ̀ɛawo ku àwù kèwo èviawo la do, la sɔ wɔ̀ vɔsa be èdɔa.”

²⁰Ekèa yomè a, Izràɛlviwo be àmèha bliboa trɔ, jo lè Mosè be ŋùkɔ̀.

²¹Àmè kèwo keŋu ɖo èjro nyuɛ̃awo ku àmè sia àmè kè jro be yèa na ènu fàa, sɔ Tɔhonɔ̀ be ènujɔ̀jɔawo va, na ègòdodo be gòxɔa be èdɔwɔ̀wɔ ku yebe ènuzãzãwo keŋu, kudo na yebe àwù kɔ̀kɔ̀ɛawo.

²²Eye ŋusùwo ku nyɔ̃nùwo va. Àmè kèwo gbe jro, lè woabe èjìmè kpòa, wo hɛ̃ sìkanuwo, àwù ŋuti kùnuwo, gàviwo, àlɔ̀gawo, sìkakɔ̃wo ku sìkanu ku ènu vòvòvòwo, sɔ ɖè àjɔ̀gbè na Tɔhonɔ̀.

²³Eye àmè sia àmè sɔ ènu kè lè e si, sìgbè, àvɔ jɛ̃-èblisi, àvɔ jɛ̃-hɛ̃, àvɔ yìbɔ-dàzò, àlɛ̃ŋudà-vɔ, ègbɔ be àgbàze, àgbò be àgbàze kè bìaa, àlo ènyɔ̃ be àgbàzea va, na.

²⁴Àmè ɖekpekpe kè wo jɔ̀ klòsalò àlo gàjɛ̃ na, lè àfi ɖe a, sɔ ènujɔ̀jɔ kèa va, na Tɔhonɔ̀. Àmè ɖekpekpe àmè kè si zãgaràti lèa, sɔ ɛ̀ va, na Tɔhonɔ̀ be èdɔa.

²⁵Nyɔ̃nù kèwo keŋu ɖo àɖàŋùa sɔ woabe àlɔ̀ gbĩ èkà jɛ̃-èblisi, jɛ̃-hɛ̃, yìbɔ-dàzò ku àlɛ̃ŋudà-vɔ, sɔ wo lɔ̃ àvɔ, eye wo sɔ wo va na.

²⁶Nyɔ̃nù kèwo keŋu ɖo àɖàŋùa gbĩ ègbɔfu.

²⁷Ŋùkɔ̀nɔ̀tɔawo sɔ èkpe xɔ̀asì kè wo yɔna be Bèril ku èkpe kèwo wo la sɔ ɖo àcɔ na dàblaa ku àkɔtacɔ̃nua;

²⁸wo gbà hɛ̃ ègbe hɔ̃hũɛwo, kãligbɛ̃ mè-mi, àmì do èta, ku àzìzɔ vɔsa be àmì hɔ̃hũɛ cã va.

²⁹Eye, ŋusùwo ku nyɔ̃nùwo, àmè kèwo lɔ̃ ku èjì fàa, sìgbè Izràɛlvi jìjiwo nènea, wo sɔ ènu kè hiã, ne woa sɔ wɔ̀ èdɔ kè Tɔhonɔ̀ do àsi na wo, to Mosè jia, va na Tɔhonɔ̀.

³⁰Mosè gblɔ̃ na Izràɛlviwo be: “'Mì kpɔ ɖa! Tɔhonɔ̀ yɔ Besàlɛl, Urì kè nyi Xur so Yudà be kɔ̀ta mèa be ŋusùvia be èvi;

³¹e sɔ Mawu be gbɔ̃gbɔ̃ ɖɔ ɛ̀, ne bèa ɖo àdòdò, ènunya, ènujèsi ku xixe kplògòdòa be àɖàŋùdɔ wɔ̀wɔ:

³²e nya àɖàŋùdɔ vòvòvò kèwo nyi sìka, klòsalò, gàjɛ̃ ŋuti dɔwɔ̀wɔ,

³³e nya èkpe kè wo sɔ ɖona àcɔawo lìli, ènuwo tata ku àti, eye be gbà nya àɖàŋùdɔ vòvòwo wɔ̀wɔ.

³⁴Tɔhonɔ̀ sɔ ènufiɔfiɔ be ènu nana ɖo èjì mè na ɛ̀, sìgbè àlekè be na Ohòliab kè nyi Àhisamàk so Dàn be kɔ̀taa mè be èvia nène.

³⁵E na wo ɖɔ ku àɖàŋù, ne woa wɔ̀ èkpekpàtɔ be èdɔawo keŋu, àɖàŋù-dɔ, àɖàŋù-nulɔ̃lɔ̃ do àvɔ jɛ̃-èblisi mè, ɖo àvɔ jɛ̃-hɛ̀ mè ku ɖo àvɔ yìbɔ-dàzò kudo àlɛ̃ŋudà-vɔ mè, àvɔlɔ̃tɔ be èdɔ, àlɔ̀nudɔwɔ̀tɔwo ku àɖàŋùdɔwɔ̀tɔwo keŋu be èdɔwo.