Read gen Toto jo 36 Bible Online

Toto jo 36 - gen bible

Toto jo 36

¹Besàlɛl, Ohòliab ku ŋusù ɖe sia ɖe kè be ètamè Tɔhonɔ̀ sɔ àɖàŋù ku ènunya do, ne woa nya lekè wo la wɔ̀ kɔ̀kɔ̀ɛpea ŋuti-dɔwo keŋu ɖoa, nène be àmèawo la wɔ̀ ènu kèwo keŋu be ègbè Tɔhonɔ̀ ɖèa.”

²Mɔsè yɔ Besàlɛl ku Ohòliab kudo ŋusù ɖe sia ɖe kè Tɔhonɔ̀ sɔ ènunya do ètamè na a, eye àmè sia àmè jro fàa be yèa wɔ̀ èdɔa.

³Wo xɔ̀ ènujɔ̀jɔ kèwo keŋu Izràɛlviwo hɛ̃ va na Mosè, ne woa sɔ tù Kɔ̀kɔ̀ɛpea eye, ne woa sɔ wɔ̀ yebe ŋuti-dɔa. Vɔ̀a, kè e nyi be, wo gbà le hɛ̃ ènu nanawo va ŋùkè ŋùkèa,

⁴àɖàŋùme kèwo keŋu le wɔ̀ Kɔ̀kɔ̀ɛpea be èdɔ vòvòvòwoa, wo gble èdɔ kèwo ŋuti wo tɛ ɖoawo ɖɛ ɖèka ɖèka,

⁵eye wo gblɔ̃ na Mosè be: “'Dùkɔ̃a le hɛ̃ ènunana va wunu, ne woa sɔ ekèa wɔ̀ èdɔ kè Tɔhonɔ̀ ɖè ègbè be woa wɔ̀a!”

⁶Mosè gbà va ɖè ègbè ke na àsàɖaa keŋu nya be: ''Ŋusù, àlo, nyɔ̃nù ɖekpe mu gbà wɔ̀ ènu nana na Kɔ̀kɔ̀ɛpea ke ò!'' Ekèa yomè a, dùkɔ̃a tɔtè ènu nanaawo hɛ̃hɛ̃ va.

⁷Dùkɔ̃a be ènu kè be wɔ̀a sù na èdɔa be wɔ̀wɔ, kaka kpɔ̀tɔ̀.

⁸Àlɔ̀nudɔwɔ̀tɔ kèwo si àɖàŋù lè wuawo tù Tɔhonɔ̀ be nɔ̀pea ku èxɔ̀mè-kùŋùtu èwo, kèwo wo sɔ àlɛ̃ŋudà-vɔ totro, àvɔ jɛ̃ èblisi, àvɔ jɛ̃ hɛ̃ ku àvɔ yìbɔ dàzò be èkà lɔ̃a, eye wo sɔ àɖàŋù wɔ̀ Kèrubimwo ɖo woa mè.

⁹Èxɔ̀mè-kùŋùtu ɖèka be dìdimè ye nyi àbɔglìgo èwì vɔ ènyi. Èxɔ̀mè-kùŋùtu ɖèka be kèkemè ye nyi àbɔglìgo ènè. Jije kèawo ye lè èxɔ̀mè-kùŋùtuawo keŋu si.

¹⁰Mosè ca èxɔ̀mè-kùŋùtu àtɔ̃ èɖe ɖo èɖe nu, eye be gbà ca àtɔ̃ kpɔ̀tɛawo cã èɖe ɖo èɖe nu.

¹¹E wɔ̀ èkà kpòkpòe jɛ̃ èblisiwo ɖo èxɔ̀mè-kùŋùtu cucugbã tɔ̀a be ètomè, àfi kè wo la ca ɛ̀ lèa; e gbà wɔ̀ ɖo èxɔ̀mè-kùŋùtu kpɔ̀tɛ kè la nɔ̀ caca ɖo èvègɔ̃a nua cã be ètomè.

¹²E do èkà kpòkpòe èkà ci-èwo na èxɔ̀mè-kùŋùtu cucugbãa, eye be gbà do èkà kpòkpòe èkà ci-èwo èxɔ̀mè-kùŋùtu èvègɔ̃a be cacapea be ètomè, eye, èkà kpòkpòeawo sɔ̀ ku woa nɔ̀nɔwo, lè cacapeawo.

¹³Mosè gbà wɔ̀ sìka-nukùgàvi èkà ci-èwo, eye be ca èxɔ̀mè-kùŋùtuawo ɖo woa nɔ̀nɔwo nu ku ènukù-gàviawo, eye nènea, nɔ̀pea nyi ènu caca ɖèka.

¹⁴Ekèa yomè a, e sɔ ègbɔfu lɔ̃ èxɔ̀mè-kùŋùtu woeɖèka sɔ wɔ̀ gòxɔ ɖo nɔ̀pea tamè.

¹⁵Èxɔ̀mè-kùŋùtu ɖe sia ɖe be dìdimè ye nyi àbɔglìgo ègbã. Kèkemèa ye nyi àbɔglìgo ènè. Èxɔ̀mè-kùŋùtu woeɖèkaawo keŋu be jijemèwo la nyi ɖèka ŋùkumè.

¹⁶E ca èxɔ̀mè-kùŋùtu àtɔ̃ ɖodu, eye be sɔ wo ɖovò; e gbà ca èxɔ̀mè-kùŋùtu àdɛ̃ cã ɖodu, gbà sɔ woa cã ɖovò.

¹⁷E wɔ̀ èkà kpòkpòe èkà ci-èwo ɖo cacaa be èxɔ̀mè-kùŋùtu kpɔ̀tɛa be ètomè, eye be gbà wɔ̀ èkà kpòkpòe èkà ci-èwo ɖo èxɔ̀mè-kùŋùtu ŋua ke, be cacape èvègɔ̃a.

¹⁸E wɔ̀ gàjɛ̃-nukùgàvi èkà ci-èwo, ne bèa sɔ ca gòxɔa, wɔ̀ ènu ɖèka.

¹⁹Ekèa yomè a, e sɔ àgbò be àgbàze kè wo do àmàdodo jɛ̃a sɔ gba gòxɔa, eye be gbà sɔ ènyɔ̃ be àgbàze sɔ cɔ̃ e ji.

²⁰Kè e wɔ̀ ekèawo vɔ̀a, Mosè so zãgaràti wɔ̀ ètomètiwo sɔ le nɔ̀pea ɖotè.

²¹Ètomèti ɖèka be dìdimè nyi àbɔglìgo èwo, eye kèkemèa nyi àbɔglìgo ɖèka ku èfã.

²²E wɔ̀ ènu kùnu èvè na ètomèti ɖe sia ɖe, eye èɖe lè èɖe ŋuti. Nène a ye be wɔ̀ na nɔ̀pea be ètomètiawo keŋu.

²³E wɔ̀ ètomèti èwì nènea, eye be trɔ wo jè ŋùkɔ̀ Nègev lè àpùgo.

²⁴E gbà wɔ̀ klòsalò gɔ̃mèɖonu èkà, ɖo ètomèti èwìawo gɔ̃mè; gɔ̃mèɖonu èvè lè ètomèti ɖèka gɔ̃mè, na yebe ènu kùnu èvèawo.

²⁵E wɔ̀ ètomèti èwì ku woabe gɔ̃mèɖonu èkà ɖo nɔ̀pea be àkpa èvègɔ̃ kè lè àvegoa.

²⁶E sɔ klòsalò wɔ̀ woabe gɔ̃mèɖonu èkàawo; gɔ̃mèɖonu èvè lè ètomèti ɖèka gɔ̃mè, eye gɔ̃mèɖonu èvè lè ètomèti bu cã gɔ̃mè.

²⁷E wɔ̀ ètomèti àdɛ̃ ɖo gòxɔa mè, lè àfi kè do ŋùgbe àpùtaa lɔ̀gea.

²⁸E gbà wɔ ètomèti èvè kèwo lè gòxɔa be kɔ̃nàawo, ji lè àdɔ̀mè.

²⁹Wo kèkè, lè gɔ̃mè, vɔ̀a wo ca, lè èji, lè gàvi-klobotoe cucugbãa mè: nènea ye be wɔ̀ na kɔ̃nà èvèawo.

³⁰Ètomèti ènyi ye be wɔ̀ ku woabe klòsalò gɔ̃mèɖonu kèwo kpata le nyi: gɔ̃mèɖonu woeàdɛ̃, kèwo wo ɖo èvè, èvè ɖo ètomèti ɖe sia ɖe gɔ̃mè.

³¹Eye be sɔ zãgaràti wɔ̀ ènu mèsòtiawo: e ɖo àtɔ̃ na gòxɔa be àkpa cucugbãa be ètomètiawo;

³²e ɖo àtɔ̃ na gòxɔa be àkpa èvègɔ̃a be ètomètiawo, eye be gbà ɖo àtɔ̃ na Gòxɔa be àkpa kè lè e mè, lè àfi kè doŋùgbe àpù lɔ̀gea be ètomètiawo.

³³E ɖo dòdòmè be ènu mèsòtia, àleke be, ne bèa to ètomètiawo be èji yìyi be dòdòmè, so àgo ɖe ji, yì àgo bu ji.

³⁴E tre sìka ɖo ètomètiawo ŋuti, e sɔ sìka wɔ̀ woabe gàvi-klobotoe kèwo mè ènu mèsòtiawo la ɖoa, eye be tɛ sìka ɖo ènu mèsòtiawo ŋuti.

³⁵Ekèa yomè a, e wɔ̀ èxɔ̀mèsò-vɔ jɛ̃-èblisi, jɛ̃ hɛ̀, yìbɔ-dàzò ku àlɛ̃ŋudà-vɔ totro. Wo sɔ àɖàŋù ta Kèrubimwo do woa mè.

³⁶E sɔ zãgaràti wɔ̀ sɔti èvè na wo, eye be tre sìka ɖo sɔtiawo ŋuti, eye be sɔ sìka wɔ̀ woabe ènu kùnuawo. E va sɔ klòsalò wɔ̀ gɔ̃mèɖonu ènè na wo.

³⁷Ekèa yomè a, e sɔ àvɔ jɛ̃-èblisi, jɛ̃-hɛ̀, yìbɔ-dàzò ku àlɛ̃ŋudà-vɔ totro kèwo wo sɔ àɖàŋù lɔ̃a, wɔ̀ èxɔ̀mɔnu-vɔ na gòxɔa.

³⁸Bɔ̀ ɖo woa ŋutia, e wɔ̀ gòxɔa be sɔti àtɔ̃ ku woabe ènu kùnuawo, woabe èta kudo ènu glanu kèwo ŋuti be tre sìka ɖoa, gbàkudo woabe gàjɛ̃ gɔ̃mèɖonuawo.