Read gen Toto jo 37 Bible Online

Toto jo 37 - gen bible

Toto jo 37

¹Eye Besàlɛl sɔ zãgaràti kpà àɖakà kè be dìdimè nyi àbɔglìgo èvè ku èfã, yebe kèkemè nyi àbɔglìgo ɖèka ku èfã, yebe jiyìyi nyi àbɔglìgo ɖèka ku èfã.

²E tɛ sìka àku àku ɖo e ŋuti ku e mè, eye be fɛ̃ sìka ɖo yebe nɔ̀nɔmè nu, trɔ do è.

³E wɔ̀ sìka gàvi klobotoe ènè, na yebe àfɔ̀ ènèawo: èvè lè àkpa ɖèka, èvè lè àkpa èvègɔ̃a.

⁴E sɔ zãgaràti kpà àti lɔbɔɛwo, eye be tre sìka ɖo woa ŋuti.

⁵E sɔ àti lɔbɔɛawo do gàvi klobotoe kèwo lè àɖakàa be àxàdamèawo mè, ne woa sɔ nɔ kɔkɔ ɛ̀.

⁶E gbà sɔ sìka àku-àku wɔ̀ nùtuvi kè be dìdimè nyi àbɔglìgo èvè ku èfã, eye yebe kèkemè nyi àbɔglìgo ɖèka ku èfãa.

⁷E yomè a, e sɔ sìka wɔ̀ kerubì èvè, be sɔ wo ɖo nùtuvia be èto èvèawo mè.

⁸Kèrubim ɖèka lè èto ɖèka mè, eye kerubì èvègɔ̃a lè èto èvègɔ̃a mè. E sɔ kerubìawo tɔtè ɖo nùtuvia ji, lè nùtuvia be ètomè be ènugbɔ èvèawo.

⁹Kerubìawo vlũ woabe àwàdawo ɖo èji, sɔ le ɖia nùtuvia. Wo jè ŋùkɔ̀ woa nɔ̀nɔwo, eye wo le kpɔ nùtuvia.

¹⁰Ekèa yomè a, e ta èkplɔ̃a ku zãgaràti; yebe dìdimè nyi àbɔglìgo èvè; yebe kèkemè nyi àbɔglìgo ɖèka, yebe jiyìyi nyi àbɔglìgo ɖèka ku èfã.

¹¹E tɛ sìka àku-àku ɖo e ŋuti, eye be fɛ̃ sìka trɔ do è ɖo yebe nɔ̀nɔmè nu.

¹²E sɔ àtikpo kèwo be kèkemè nyi àlɔ̀gba ɖèkaa trɔ do è. E va mli sìka trɔ do àtikpoawo, ɖo woabe nɔ̀nɔmè nu.

¹³E tù sìka gàvi klobotoe ènè, eye be sɔ wo do yebe àfɔ̀ ènèawo be koŋù ènèawo.

¹⁴E sɔ gàvi klobotoe kèwo mè wo sɔna àti lɔbɔɛ kè wo sɔ kɔkɔna èkplɔ̃a do a, le ɖo àtikpoawo gbɔ.

¹⁵E sɔ zãgaràti wɔ̀ àti lɔbɔɛ kèwo wo la sɔ nɔ kɔkɔ èkplɔ̃a, eye be tɛ sìka ɖo woa ŋuti.

¹⁶E sɔ sìka àku-àku wɔ èkpɔ̃a be ŋuti be ènuzãzã kèwo nyi, àgbã-gbɛjɛwo, kogòwo, èsì kù-gbã ku kɔpò kèwo wo la sɔ nɔ kɔ̀ èsì ɖɛa.

¹⁷Ekèa yomè a, e sɔ sìka àku-àku wɔ̀ kãligbɛ̃tia; ekè be tù kãligbɛ̃tia, yebe àfɔ̀, yebe àtia, yebe kogòwo, yebe sepòpo kèwo mu kpɔ hũ ò a, ku yebe sepòpowo kpataa, e wɔ̀ wo ɖo àlɔ̀ ɖèka ji.

¹⁸Àlɔ̀zɛ̃ àdɛ̃ to so yebe àxàdamè; kãligbɛ̃tia be àlɔ̀zɛ̃ ètɔ̃ le so àkpa ɖèka, eye kãligbɛ̃tia be àlɔ̀zɛ̃ ètɔ̃ to so àkpa èvègɔ̃a.

¹⁹Kogò lɔbɔɛ ètɔ̃ ku sepòpo kèwo mu kpɔ hũ òa, kudo sepòpowo lè àlɔ̀zɛ̃ ɖèka ji, eye kogò lɔbɔɛ ètɔ̃ ku sepòpo kèwo mu kpɔ hũ òa, kudo sepòpo buwo gbà lè àlɔ̀zɛ̃ bu ji; nènea be lè na àlɔ̀zɛ̃ àdɛ̃ kèwo keŋu to so kãligbɛ̃tia mèa.

²⁰Kogò lɔbɔɛ ènè ku sepòpowo, kudo sepòpo kèwo mu kpɔ hũ ò a, lè kãligbɛ̃tia ŋutɔ ji:

²¹Sepòpo kè mu kpɔ hũ ò a ɖèka lè àlɔ̀zɛ̃ èvè cucugbãtɔ̀ kèwo so kãligbɛ̃tia mèawo be gɔ̃mè; èbu gbà lè àlɔ̀zɛ̃ èvè kèwo kplɔ̀ ekèawo do a gɔ̃mè; èbu gbà lè àlɔ̀zɛ̃ èvè kpɔ̀tɛ kèwo to so kãligbɛ̃tia mèa cã mè: nènea ye be lè na àlɔ̀zɛ̃ àdɛ̃ kèwo to so kãligbɛ̃tia mèawo cã mè.

²²Wo sɔ sìka àku-àku tù sepòpo kèwo mu kpɔ hũawo ku àlɔ̀zɛ̃awo ɖo àlɔ̀ ɖèka ji.

²³E sɔ sìka àku-àku wɔ̀ kãligbɛ̃ adrɛ̃ ku zòka-lenuwo, kudo vɛlɛ̀-xɔ̀nuwo.

²⁴E sɔ sìka àku-àku tàlɛ̃ŋutò ɖèka sɔ tù kãligbɛ̃tia ku yebe ŋutinuwo.

²⁵Ekèa yomè a, e sɔ zãgaràti wɔ̀ lifi be vɔsakpea: yebe dìdimè nyi àbɔglìgo ɖèka, yebe kèkemè nyi àbɔglìgo ɖèka, dìdimè ku kèkemèa nyi ɖèka; yebe èji yìyia nyi àbɔglìgo èvè. Wo wɔ̀ ye ku yebe àzòwo ku àti ɖèka ŋùkumè.

²⁶E sɔ sìka àku-àku tre ɖo e ŋuti; e tre è ɖo e ji, e mè, trɔdo, ku àzòawo, eye be fɛ̃ sìka trɔ do è, ɖo yebe nɔ̀nɔmè nu.

²⁷E tù sìka gàvi klobotoe ɖo sìka kè be fɛ̃ ɖo e be nɔ̀nɔmè nua ji, lè àkpa èvèawo, ɖo yebe àxàda èvèawo mè, ne woa nɔ̀ sɔ àti lɔ̀bɔ̀ kè wo la sɔ nɔ kɔkɔ ɛ̀a do woa mè.

²⁸E sɔ zãgaràti wɔ̀ àti lɔ̀bɔ̀ kèawo, eye be tre sìka ɖo woa ŋuti.

²⁹E wɔ̀ àmì kɔ̀kɔ̀ɛa ku lifi àdodoe kè wo la nɔ tɔ èzòa, sìgbè àmì xɔ̃xũɛ-dɔwɔ̀tɔtɔ̀ nène.