Read gen Toto jo 38 Bible Online

Toto jo 38 - gen bible

Toto jo 38

¹Ekèa yomè a, Mosè sɔ zãgaràti wɔ̀ vɔsakpea: yebe dìdimè nyi àbɔglìgo àtɔ̃, kèkemèa nyi àbɔglìgo àtɔ̃, dìdimè ku kèkemèawo sɔ̀, eye yebe èji-yìyi nyi àbɔglìgo ètɔ̃.

²Lè yebe kɔ̃nà ènèawo jia, e wɔ̀ àzòawo ɖo àlɔ̀ ɖèka ji ku vɔsakpea. E tre gàjɛ̃ ɖo woa ŋuti.

³E wɔ̀ vɔsakpea be ŋutinuwo keŋu: àdàwaawo, sɔfìawo, èsì-hɛ̃hlɛ̃ be kogòawo, gafò ku lifi-fiɔ̃nuawo. E sɔ gàjɛ̃ wɔ̀ woa kpata.

⁴So vɔsakpea be gɔ̃mè be ètomè kaka va dòdòmèa, e wɔ̀ gàja ɖe kè lè sìgbè èɖɔ nènea ku gàjɛ̃.

⁵E tù gàvi-klobotoe ènè ɖo gàjɛ̃-gàjaa be èto ènèawo mè, ne woa sɔ àti lɔbɔɛwo nɔ do woa mè.

⁶E sɔ zãgaràti wɔ̀ àti lɔbɔɛawo, eye be tre gàjɛ̃ ɖo woa ŋuti.

⁷E sɔ àti lɔbɔɛawo do gàvi-klobotoeawo mè, lè vɔsakpea be àxàdawo mè, ne woa sɔ nɔ kɔkɔ ɛ̀. E wɔ̀ ɛ̀ ku gboŋugblo kè mè be ɖè èmɔ toa.

⁸Ekèa yomè a, e sɔ gàjɛ̃ wɔ̀ èsì lèle be àdàwa gãa ku yebe sìhɛ̃a kudo nyɔ̃nù kèwo va kpena ɖo ègòdodo be gòxɔa nu be èdɔwɔ̀wɔwo ŋutia be àpùpuiwo.

⁹Eye e wɔ̀ gbàjà ji, lè Nègɛb lɔ̀ge, lè àpùgoa, e sɔ àlɛ̃ŋudà-vɔ totro tɔ̃ èkpa a, eye be dìdì àbɔglìgo àlɔ̀ ɖèka, àlo, èkà èvè takpo (100).

¹⁰Wo sɔ gàjɛ̃ wɔ̀ èkpa a be sɔti èwì ku woabe gɔ̃mè-ɖonu èwìawo, eye wo sɔ klòsalò sɔ wɔ̀ sɔtiawo be ènu kùnu ku woabe ènu glanuawo.

¹¹Lè àvegoa, dìdimèa nyi àbɔglìgo èkà-vè takpo, eye wo sɔ gàjɛ̃ wɔ̀ sɔti èwìawo ku woabe gɔ̃mèɖonu èwìawo; wo sɔ klòsalò wɔ̀ sɔtiawo be ènu kùnu ku woabe ènu glanuawo.

¹²Le àpùta lɔ̀gea, èkpaa be kùŋùtuawo dìdì àbɔglìgo èkà ci-èwo, eye wo sɔ klòsalò wɔ̀ yebe sɔti èwo ku woabe gɔ̃mè-ɖonuwo, ènu kùnuawo ku ènu glanuawo.

¹³Lè èwèzɛ̃pea, dìdimèa nyi àbɔglìgo èkà ci-èwo.

¹⁴Lè èmɔ̃nua be àkpa èvèa jia, èkpa a dìdì àbɔglìgo woeàtɔ̃; e ɖo sɔti ètɔ̃ ku gɔ̃mè-ɖonu ètɔ̃.

¹⁵Lè àkpa ɖetɔa lè àdɔ̀mè, lè gbàjàa ji be èkpa a be àgboa be àxàda èvèawo mèa, ɖe sia ɖe be kùŋùtuawo dìdì àbɔglìgo woeàtɔ̃, eye be ɖo sɔti ètɔ̃ ku gɔ̃mè ɖonu ètɔ̃.

¹⁶Wo sɔ àlɛ̃ŋudà-vɔ totro lɔ̃ èkpa a be kùŋùtuawo kpata.

¹⁷Wo sɔ gàjɛ̃ wɔ̀ sɔtiawo be gɔ̃mè ɖonuwo, eye wo sɔ klòsalò wɔ̀ sɔtiawo be ènu kùnuwo ku ènu glanuwo; wo tre klòsalò ɖo sɔti be ètawo ŋuti. Vɔ̀a, wo sɔ klòsalò be ènu kùnu kù gbàjà ji be èkpa a be sɔtiawo keŋu ɖodu.

¹⁸Àɖàŋù-vɔlɔ̃tɔwo sɔ èkà jɛ̃ èblisi, jɛ̃ hɛ̃, yìbɔ dàzò ku àlɛ̃ŋudà-vɔ be èkà totro lɔ̃ gbàjà ji be èmɔnu-vɔa. Yebe dìdimè nyi àbɔglìgo èwì, eye yebe èji-yìyi nyi àbɔglìgo àtɔ̃; ekèa ye le nyi yebe kèkemè kè sɔ̀ ku gbàjà ji be kùŋùtuawo be èji-yìyi.

¹⁹Yebe sɔti ènèawo ku woabe gɔ̃mè-ɖonu ènèawo nyi gàjɛ̃; woabe ènu kùnuawo nyi klòsalò, wo tre klòsalò ɖo woabe sɔti be ètaawo ku ènu glanuawo ŋuti.

²⁰Wo sɔ gàjɛ̃ wɔ̀ nɔ̀pea ku gbàjà ji be èkpa a be ègũmè trɔ-tiawo kpata.

²¹Zãzã kèwo wo wɔ̀ na nɔ̀pea be tùtuawo ye nyi ekèawo: Zòɖùɖua be nɔ̀pea, Mosè ɖè ègbè be wo ne bù ènu kè wo zãawo keŋu kpɔ: ekèa nyi Levì be èvi ŋusùwo, kèwo be ŋùkɔ̀, hũbonɔ Arɔ̀n be èvi ŋusù Itamàr nɔ̀a be èdɔwɔ̀wɔ.

²²Besàlɛl nyi Urì be èvi, Urì nyi Hur ŋusù ɖe kè so Yudà be kɔ̀taa mèa be ŋusùvi be èvi; e wɔ̀ ènu kèwo kpata be ègbè Tɔhonɔ̀ ɖè na Mosè a.

²³Ohòliab, Àxisamàk be ŋusùvi kè so Dàn be kɔ̀ta mèa, kpe ɖo e ŋuti. Àmè kèa ɖènà àɖàŋù, eye be tana ènu ɖo èkpe ji; e nyi àɖàŋù-vɔlɔ̃tɔ eye be zãna èkà jɛ̃-èblisi, jɛ̃ hɛ̃, yìbɔ dàzò ku àlɛ̃ŋudà-vɔ be èkà.

²⁴Sìka kè kpata wo zã na kɔ̀kɔ̀ɛpea be tùtu be èdɔ wɔ̀wɔwo, èdɔ wɔ̀wɔawo kpata be sìka kèa, so ènujɔ̀jɔwo mè: tàlɛ̃ŋutò be jijenu èwì vɔ àsiɖèkɛ ku sekɛ̀l àlɔ̀ adrɛ̃ takpo ci-èwo (730), kè wo jije ku kɔ̀kɔ̀ɛpea be sekɛ̀l.

²⁵Klòsalò kè àmè kèwo wo hlɛ̃ lè èhabɔ̀bɔa mèawo jɔ̀ a ye nyi ekèa: tàlɛ̃ŋutò èkà èvè takpo (100) ku sekɛ̀l àkpe ɖèka àlɔ̀ adrɛ̃ èkà takpo ci woeàtɔ̃ (1775), ekè wo sɔ kɔ̀kɔ̀ɛpea be sekɛ̀l jijea.

²⁶Ekèa le nyi be ŋusù ɖe sia ɖe kè xɔ̀ èpè èwì to e ŋuti, eye wo hlɛ̃ lè Izràɛlviwo dòmèa, na sìka jijenu bekà ɖèka, àlo sekɛ̀l èfã ya tètè, ne wo sɔ kɔ̀kɔ̀ɛpea be sekɛ̀l wɔ̀ jijea, ɖo àmè hotu àlɔ̀ ètɔ̃ àkpe ètɔ̃ àlɔ̀ àtɔ̃ ku èkà ci-èwo nua.

²⁷Wo srè klòsalò tàlɛ̃ŋutò àlɔ̀ ɖèka (100), sɔ tù kɔ̀kɔ̀ɛpea ku gɔ̃mè-ɖonu kèwo ye le èxɔ̀mèsò-vɔa be àtiawo: wo zã klòsalò tàlɛ̃ŋutò àlɔ̀ ɖèka sɔ wɔ̀ gɔ̃mè-ɖonu àlɔ̀ ɖèka; ye gɔ̃mè ye le nyi be: gɔ̃mè-ɖonu ɖèka xɔ̀nà klòsalò tàlɛ̃ŋutò ɖèka.

²⁸E sɔ klòsalò sekɛ̀l àkpe ɖèka àlɔ̀ adrɛ̃ èkà takpo ci woeàtɔ̃ (1775) wɔ̀ sɔtiawo be ènu kùnuawo, sɔ tre ɖo sɔtia be ètawo ŋuti, eye be sɔ ènu glanuawo le wo ɖodu.

²⁹Ènujɔ̀jɔ be gàjɛ̃a keŋu le nyi tàlɛ̃ŋutò be jije èkà takpo ci èwo (70) ku sekɛ̀l hotu ɖèka àlɔ̀ ènè (2400).

³⁰E zã ekèa, sɔ wɔ̀ ègòdodo be gòxɔa be èmɔ̃nu be gɔ̃mè-ɖonuawo, gàjɛ̃ be vɔsakpea, yebe gàjɛ̃ gàjaa, vɔsakpea be ŋutinuwo keŋu,

³¹Gbàjàa ji be èkpa a be gɔ̃mè-ɖonuwo, gbàjàa ji be àgboa be gɔ̃mè-ɖonuwo, nɔ̀pea be ègũmè trɔ̃-tiwo keŋu ku gbàjàa ji be èkpa a be ègũmè trɔ̃-tiwo keŋu.