Read gen Toto jo 39 Bible Online

Toto jo 39 - gen bible

Toto jo 39

¹Wo sɔ àvɔ jɛ̃-èblisi, àvɔ jɛ̃-hɛ̀ ku yìbɔ-dàzò tɔ̃ vɔsa be àwù kèwo wo la nɔ do, sɔ nɔ wɔ̀ èkɔ̀nuwo lè kɔ̀kɔ̀ɛpea, eye wo tɔ̃ Arɔ̀n be àwù kɔ̀kɔ̀ɛawo ɖo àlekè Tɔhonɔ̀ gblɔ̃ ɛ̀a ji.

²E sɔ sìka, àvɔ jɛ̃-èblisi, jɛ̃-hɛ̀, yìbɔ-dàzò ku àlɛ̃ŋudà-vɔ totro wɔ̀ dàblaa.

³Wo pò sìka kpɛbɛwo, eye wo sò àvɔ trɛlɛ kèwo wo lɔ̃ àɖàŋùtɔ̀ ku èkà jɛ̃-èblisi, èkà jɛ̃-hɛ̃, èkà yìbɔ-dàzò, kudo àlɛ̃ŋudà-vɔa. E nyi àɖàŋù-dɔ ye wo wɔ̀.

⁴E do àbɔta-kà èvè, ɖo èto èvèawo mè na ɛ̀, ne woa sɔ nɔ le è ɖɛ.

⁵Wo wɔ̀ dàblaa be èkà kè lè e jia nènea ke: wo lɔ̃ ɛ̀ ku sìka be èkà kpɛbɛ kudo èkà jɛ̃-èblisi, èkà yìbɔ-dàzò, gbàkudo àlɛ̃ŋudà-vɔ totro be èkà, sìgbè àlekè Tɔhonɔ̀ ɖè yebe ègbè na Mosè a nène.

⁶Wo jrà èkpe xɔ̀-àsì kèwo wo yɔna be Bèrilawo ɖo, eye wo zĩ wo ɖo sìkaa mè, eye wo ŋlɔ̀ Izràɛl be èvi woèvèawo be nyikɔwo ɖo woa ji, sìgbè àlekè wo ŋlɔ̀nà ɛ̀ ɖo ènutrenu jèsìdo jia nène.

⁷E sɔ wo ɖo dàblaa be àbɔta-kàwo ŋuti, ɖoa, èkpe kèawo nyi ŋùkuɖoji-nu na Izràɛl be èviwo, sìgbè lekè Tɔhonɔ̀ ɖè yebe ègbè na Mosè a nène.

⁸Ekèa yomè a, e wɔ̀ àkɔtacɔ̃nua, àɖàŋù dɔwɔ̀wɔ, sìgbè lekè wo wɔ̀nà dàblaa nène, ku sìka, èkà jɛ̃-èblisi, èkà jɛ̃-hɛ̃, èkà yìbɔ-dàzò, ku àlɛ̃ŋudà-vɔ totro be èkà.

⁹Àkɔtacɔ̃nua be dìdimè ku kèkemèa sɔ̀, vɔ̀a, wo ŋɛ̃ ɛ̀; kè wo ŋɛ̃ ɛ̀a, e dìdì àlɔ̀gba ɖèka, eye be kèkè àlɔ̀gba ɖèka.

¹⁰Wo ɖo àcɔ na ɛ̀ ku èkpe-xɔ̀asì be ɖoɖo ènè. Lè àgbàkà cucugbãa jia, wo ɖo èkpe-xɔ̀asì jɛ̃ kè wo yɔna be Sàrdonìa, èkpe-xɔ̀asì ŋùtisiɖìɖi kè wo yɔna be Tòpaz, àmàmu kè wo yɔna be èmèrod; èkpe-xɔ̀asì ŋuawo ye wo ɖo ɖo àgbàkà cucugbãa nu.

¹¹Lè àgbàkà èvègɔ̃a nua, wo ɖo èkpe-xɔ̀asì jɛ̃ kè wo yɔna be Ɛskarbuklè, èblɔ be èsìmè tɔ̀ kè wo yɔna be Làzulit, àmàmu kè wo yɔna be Jaspè.

¹²Lè àgbàkà ètɔ̃gɔ̃a nua, wo ɖo èkpe-xɔ̀asi kè lè wãtã-wãtã eye wo yɔna ɛ̀ be Àgatàa, ekè mè kɔ̀nà sìgbè àpùpui nène, vɔ̀a lè jɛ̃, eye wo yɔna ɛ̀ be Kòralinà ku ekè ɖona èblisi be èsìmè eye wo yɔna ɛ̀ be Àmetìs,

¹³eye, lè àgbàkà ènègɔ̃a nua, èkpe-xɔàsì kè klɛ̃na sìgbè sìka nène, eye wo yɔna ɛ̀ be Krìzolit, ekè ɖona èblɔ be èsìmè, eye wo yɔna ɛ̀ be Bèril ku ekè ɖona èsìmè hamè-hamè, eye wo yɔna ɛ̀ be Ɔ̀nis. Wo zĩ wo do sìkakɔ̃ be èta gbàjàwo mè, àcã tɔ̀.

¹⁴Èkpeawo nyi woèvè sìgbè àlekè Izràɛl be èviwo cã nyi woèvèa nène. Nyikɔ ɖe sia ɖe ku yebe èkpe, eye wo ta nyikɔ ɖe sia ɖe ɖo yebe èkpe ji, sìgbè àlekè wo tana ɛ̀ ɖo ènutrenu-jèsìdo jia nène, ɖo Izràɛl be hɛ̃nu woèvèawo nu.

¹⁵Wo sɔ sìka àku-àku be kɔ̀sɔ̀-kɔsɔviwo, wo tro wo, eye wo lɔ̃ wo ɖodu, ɖo àkɔtacɔ̃nua ŋuti.

¹⁶Wo tù sìkakɔ̃-ta gbàjà èvè, ku sìka gàvi-klobotoe èvè. Wo sɔ sìka gàvi-klobotoe èvèawo do àkɔtacɔ̃nua be èto èvèawo mè.

¹⁷Wo do sìka kɔ̀sɔ̀-kɔsɔ totroa, gàvi klobotoe èvèawo ŋuti, lè àkɔtacɔ̃nua be èto èvèawo mè,

¹⁸eye wo sɔ sìka kɔ̀sɔ̀-kɔsɔ totro èvèawo be ènugbɔ èvèawo do sìkakɔ̃-ta gbàjàa ŋuti, sɔ le ɖo dàblaa be àbɔta-kà a ŋuti lè àdɔ̀mè.

¹⁹Wo gbà wɔ̀ sìka-gàvi klobotoe èvè buwo, eye wo sɔ wo do àkɔtacɔ̃nua be èto èvèawo mè, lè àfi kè wo trɔ ɖoɖa dàblaa gbɔ, lè àdɔ̀mè.

²⁰Wo gbà wɔ̀ sìka-gàvi klobotoe èvè buwo, eye wo sɔ wo do vɔsa be àwùa be àbɔta-kà èvèawo ŋuti, lè ŋùkɔ̀, lè woabe cape, àfi kè wo tɔ̃ wo ɖo vɔsa be àwùa ŋuti lè, lè dàblaa be ètamè.

²¹Wo sɔ àtrɛvi jɛ̃-èblisi ɖe sɔ kù àkɔtacɔ̃nua be gàvi-klobotoeawo mè, gbà sɔ kù vɔsa be àwùa be gàvi klobotoeawo mè, ekèa na be, àkɔtacɔ̃nua va lè vɔsa be àwùa be dàblaa ji, eye mu ɖìnàsà lè vɔsa be àwùa ji ò, sìgbè lekè Tɔhonɔ̀ ɖo è na Mosè a nène.

²²Ekèa yomè a, e sɔ àɖàŋù lɔ̃ vɔsa be àwù gblɛ̀lɛ̀a be lè jɛ̃-èblisi.

²³Èmɔ kè wo ɖè ɖo àwù gblɛ̀lɛ̀a be dòdòmèa lè sìgbè àkɔtakpoxɔ̀nu tɔ̀ nène, eye wo pòto na ɛ̀, àleke be mu gbà teŋu zɛ̃ ò.

²⁴Wo sɔ àvɔ jɛ̃-èblisi, jɛ̃-hɛ̀, yìbɔ-dàzò ku àlɛ̃ŋudà-vɔ totro wɔ̀ yòvo-bòɖà ɖo àcɔ na àwù gblɛ̀lɛ̀a be ètomè.

²⁵Wo sɔ sìka àku-àku wɔ̀ àyroloewo do yòvo-bòɖàawo dòmè, trɔ do àwù gblɛ̀lɛ̀a be ètomè:

²⁶ne wo ɖo àyroloe ɖèkaa, wo dona yòvo-bòɖà ɖèka; ne wo do àyroloe ɖèkaa, wo dona yòvo-bòɖà ɖèka, trɔ do àwù gblɛ̀lɛ̀ kè wo la sɔ nɔ wɔ̀ èkɔ̀nua be ètomè, sìgbè àlekè Tɔhonɔ̀ ɖo è na Mosè a nène.

²⁷Ekèa yomè a, wo sɔ àlɛ̃ŋudà-vɔ lɔ̃ àɖàŋù be àwù gãwo na Arɔ̀n ku èvia ŋusùwo;

²⁸nènea ke ye wo wɔ̀ àlɛ̃ŋudà be dukùwo, àlɛ̃ŋudà dukùwo be àcɔnuwo, àlɛ̃ŋudà cãŋùka kèwo wo wɔ̀ ku àlɛ̃ŋudà-vɔ totroa.

²⁹Wo gbà sɔ àɖàŋù wɔ̀ ègojiblanuwo cã ku àlɛ̃ŋudà-vɔ totro, jɛ̃-èblisi, jɛ̃-hɛ̀ ku yìbɔ-dàzò.

³⁰Ekèa yomè a, wo wɔ̀ ŋùgonu-jèsì, ekè le nyi àmì do èta be jèsìa, wo wɔ̀ ɛ̀ ku sìka àku-àku; wo ŋlɔ̀nu ɖo e ji, sìgbè lekè wo tana ènu ɖo ènutrenu-jèsì ji ɖoa be: “'Wo kɔ̀ e ŋuti ɖɛ na Tɔhonɔ̀.”

³¹Eye wo sɔ àtrɛvi kpàbà jɛ̃-èblisi ɖe le è ɖo dukùa ŋuti sìgbè àlekè Tɔhonɔ̀ ɖo è na Mosè a nène.

³²Nène a ye wo wu èdɔ kèwo keŋu kù ɖo ègòdodo be gòxɔa ŋutia nu. Izràɛlviwo tɔ èdɔ ji, eye wo wɔ̀ ènu kèwo keŋu Tɔhonɔ̀ ɖo na Mosè a tututu.

³³Wo fɔ̀ ènu kèwo wo la sɔ tù nɔ̀pea va na Mosè: Gòxɔa ku yebe ŋutinuwo, yebe ènu kù-gàviwo, yebe ètomè be gboŋugblowo, yebe àtiblatiwo, yebe sɔtiwo ku yebe gɔ̃mè-ɖonuwo,

³⁴àgbò be àgbàze be ènu ji-cɔ̃nu èsìmè jɛ̃ ku ènyɔ̃ be àgbàze be ènu ji-cɔ̃nua, èxɔ̀mè-sòvɔa,

³⁵Zòɖùɖu-Ɖakà a, yebe àti lɔbɔɛawo ku yebe nutuvia;

³⁶èkplɔ̃a, yebe ŋutinuwo keŋu ku vɔsa kpɔ̃nɔa;

³⁷kãligbɛ̃ a ŋutɔ, yebe èzò vòvòvòawo, yebe ŋutinuwo keŋu, kãligbɛ̃ mè-mìa,

³⁸sìka vɔsakpe a, àmì do-èta a, vɔsa be àmì hɔ̃hũɛ a; ku gòxɔ a be èxɔ̀ mɔnu-vɔ a

³⁹gàjɛ̃-vɔsakpe a, yebe gàjɛ̃-gàjàa, yebe àti lɔ̀bɔ̀wo ku yebe ŋutinuwo keŋu, àmè lèlèɖì be àdàwa gã a ku yebe sìhɛ̃ a,

⁴⁰gbàjà a ji be èkpa a be kùŋùtuawo, yebe sɔtiawo, yebe gɔ̃mè-ɖonuawo, gbàjàa ji be èmɔnu-vɔa, yebe èkàwo, yebe ègũmè trɔ̃-tiwo ku ŋutinu kèwo kpata wo zãna, na èdɔ-wɔ̀wɔ lè nɔ̀pea, na ègòdodo be gòxɔa:

⁴¹Kɔ̀kɔ̀ɛpe a be èkɔ̀nu-wɔ̀nuwo, hũbonɔ, Arɔ̀n be àwù kɔ̀kɔ̀ɛwo, ku àwù kèwo èvia ŋusùwo dona, sɔ wɔ̀nà sɛ̃sɛ̃dɔa.

⁴²Ekè wo zɔ̃ ɖo ègbè kèwo keŋu Tɔhonɔ̀ ɖè na Mosè jia, Izràɛlviwo wɔ̀ èdɔa kpata.

⁴³Mosè kpɔ èdɔ kèwo kpata wo wɔ̀a; wo zɔ̃ ɖo ègbè ke Tɔhonɔ̀ ɖèa ji tututu. Ekèa yomè a, Mosè tu sì na wo.