Read gen Toto jo 4 Bible Online

Toto jo 4 - gen bible

Toto jo 4

¹Eye Mosè ɖo e ŋuti be: “Vɔ̀a, wo mu la xɔ̀ ji nyè sè ò, eye wo mu la sè ènyà kè mù la to na woa ò. Wo la gblɔ̃ be: 'Tɔhonɔ̀ mu ɖè ye ɖokoe fiɔ wò ò!'”

²Tɔhonɔ̀ biɔ ɛ̀ sè be: “Nukɛ ye wò le ɖo àsi ŋua ò?” Mosè ɖo e ŋuti be: “Èmɔzɔ̃ti ye.”

³Tɔhonɔ̀ gblɔ̃ na ɛ̀ be: “Dà ɛ̀ ɖo ànyi!” Mosè sɔ ɛ̀ dà ɖo ànyigbã: èkpòa trɔ zũ èdã, eye Mosè si lè ŋùkɔ̀ na ɛ̀.

⁴Tɔhonɔ̀ gblɔ̃ na Mosè be: “Drɛ̃ àlɔ̀, ne wòa le yebe àsike gbɔ.” E drɛ̃ àlɔ̀, eye be le è: èdãa gbà trɔ zũ èkpò lè àlɔ̀ mè na ɛ̀.

⁵Eye Mawu gblɔ̃ na ɛ̀ be: “Ekèa ne nyi jèsìdo kè la na wò la xɔ̀sè be Tɔhonɔ̀ kè nyi Abràham be Mawu, Izàk be Mawu, Yakɔb be Mawu a ɖè ye ɖokoe fiɔ wò.”

⁶Tɔhonɔ̀ gbà gblɔ̃ na ɛ̀ be: “Sɔ àpo àlɔ̀ dà ɖo àkɔta.” E sɔ àlɔ̀ dà ɖo àkɔta. Eye kè be ɖè yebe àlɔ̀a: yebe àlɔ̀ jè èkpò, eye be ɣe tìi.

⁷Tɔhonɔ̀ gbà gblɔ̃ na ɛ̀ be: “Gbà sɔ àpo àlɔ̀ dà ɖo àkɔta.” E sɔ àlɔ̀ dà ɖo àkɔta. Eye ekè be gbà ɖè è toa, àlɔ̀ a gbà trɔ sìgbè yebe ŋutilã kpɔ̀tɛa nène.

⁸“Ne wo mu xɔ̀ ji wò sè, eye wo mu bù jèsìdo cucugbã tɔ̀a òa, wò la bù jèsìdo èvègɔ̃a.

⁹Ne wo mu do bùbu jèsìdo èvè kèawo ŋuti, eye wo mu sè àpo ègbè ò a, eŋuã, wò la kù èsì lè Nil be ètɔ̀a mè, eye wò la sɔ kɔ̀ ɖo ànyigbã. Èsì kè wò la kù lè ètɔ̀ sàsra mè, kɔ̀ ɖo ànyigbãa, la trɔ zũ èhũ.”

¹⁰Mosè gblɔ̃ na Tɔhonɔ̀ be: “Tɔ̀ wò jɔ̀, Tɔhonɔ̀, nupo mu nyana pòpo na mù ò. Mu nyi egbè ò, mu nyi èsɔ̀ kè va yì, àlo nyìsɔ̀ ò, mu nyi so kaka hùenu kè wò tɔ nupo pòpo na sumɔ̃vi wòa ò. Àɖekã mu sò na mù ò, eye àɖe kpɛ̃nà lè ènu mè na mù.”

¹¹Tɔhonɔ̀ ɖo e ŋuti na ɛ̀ be: “Àmè kɛ ye wɔ̀ ènu na àgbètɔ ò? Àmè kɛ ye wɔ̀ àmumui àlo ètokunɔ̀ ò, ènukpɔtɔ àlo ŋùvìnɔ̀ ò? Mu nyi ènyè Tɔhonɔ̀ ye ò a?

¹²Fifìa, yì! Mù la nɔ̀ ku àpo ènu, eye mù la fiɔ wò ènyà kè wò la gblɔ̃a.”

¹³Vɔ̀a, Mosè gblɔ̃ be: “Tàflacɛ, Tɔhonɔ̀, dɔ̃ àmè bu kè wò jro a bòhũ!”

¹⁴Eye Tɔhonɔ̀ do àdɔ̀mèze ɖo Mosè ŋuti, gblɔ̃ be: “Fòfo wò Arɔ̀n, Levìa mu lèa? Mù nya be e ya pònà nupo nyuɛ̃ ɖe. Ye ŋutɔ ye gbãnà la va dogò wò ŋua. Ne e kpɔ wòa, èjì la jɔ̀ ɛ̀.

¹⁵Wò la pò nupo na ɛ̀, eye wò la sɔ ènyà do ènu mè na ɛ̀. Nyè yaa, mù lè ku àpo ènu, eye mù lè ku yebe ènu. Mù la fiɔ mì, ènu kè mì la wɔ̀a.

¹⁶E ya la pò nupo ɖo tèpe wò, na dùkɔ̃a. E la nɔ̀ ènu tèpe na wò; wò ya, wò la nɔ̀ Mawu tèpe na ɛ̀.

¹⁷Èkpò kèa, wò la sɔ ɛ̀ ɖo àsi! E ye wò la sɔ nɔ wɔ̀ ŋùdãnuawo.”

¹⁸Mosè trɔ yì ètoa Yetrò gbɔ, eye be gblɔ̃ na ɛ̀ be: “Mù ji be ma trɔ yì Ejiptè, lè nɔ̀vi nyèwo gbɔ, ne ma kpɔ fɔ̃fɔ̃ mè na wo.” Yetrò ɖo e ŋuti na ɛ̀ be: “Yì fàa, lè ŋuti fàfa mè!”

¹⁹Tɔhonɔ̀ gblɔ̃ na Mosè, lè Madìan be èdùa mè be: “Trɔ yì Ejiptè, ɖoa, àmè kèwo keŋu le ɖo èvuɛ̃ ɖo àpo àgbè ŋutiawo ku vɔ̀.”

²⁰Mosè kɔ èsrɔ̃a ku èviawo ɖo èsɔ àkɛtɛ ji, eye be trɔ yì Ejiptè be ànyigbã ji. Mosè sɔ Mawu be àtikplɔa ɖo àsi.

²¹Tɔhonɔ̀ gblɔ̃ na Mosè be: “Lè Ejiptè be èmɔ jia, wò la ɖo ŋùku ŋùdãnu kèwo keŋu mù do àsi na wòa, ne wòa wɔ̀ wo, lè Faraɔ̀n be ŋùmè. Vɔ̀a, ènyè yaa, mù la na yebe ètamè la sɛ̃ŋu, eye mu la ɖè àsi lè dùkɔ̃a ŋuti, ne bèa jo ò!

²²Wò la to na Faraɔ̀n be: Tɔhonɔ̀ gblɔ̃ be: 'Izràɛl ye nyi ŋùkɔ̀gbevi nyè ŋusù.

²³Ekèa ŋuti, mù lè gblɔ̃ na wò be wòa ɖè àsi lè èvi nyè ŋuti, ne bèa va sumɔ mù. Kè wò gbe be yè mu la ɖè àsi lè e ŋuti, ne bèa va ò a, eŋuã, mù la wù àpo ŋùkɔ̀gbevi ŋusù.'”

²⁴Vɔ̀a, lè èmɔ jia, ekè wo ɖo zɛ̃pe ɖe a, Tɔhonɔ̀ va kpãŋùkɔ̀ ɛ̀, ji la wù ì.

²⁵Sèforà sɔ èkpe ɖaɖa ɖe, sò èvo na èvia, sɔ àyua tɔ àfɔ̀gɔ̃mè na ɛ̀, gblɔ̃ be: “Èhũ mè be èsrɔ̃ ye wò nyi na mù.”

²⁶Eye be ɖè àsi lè e ŋuti. Sèforà gblɔ̃ be 'Èhũ mè be èsrɔ̃' ɖo èvosòsoa ŋuti.

²⁷Tɔhonɔ̀ gblɔ̃ na Arɔ̀n be: “Sitè, ne wòa yì dogò Mosè lè zògbè a ji. E yì dogò è lè Mawu be ètoa gbɔ, eye be kpla àsi èkɔ̀ na ɛ̀.

²⁸Mosè ɖè ènyà kèwo keŋu Tɔhonɔ̀ do àsi na ɛ̀, ku ŋùdãnuwo kèwo keŋu Mawu be ne wɔ̀awo na Arɔ̀n.

²⁹E yomè a, Mosè ku Arɔ̀n yì yɔ Izràɛlviwo be àmèsĩsĩwo kpata bɔ̀.

³⁰Eye Arɔ̀n gbìgbɔ̀ gblɔ̃ ènyà kèwo keŋu Tɔhonɔ̀ do àsi na Mosè a, eye be gbà wɔ̀ ŋùdãnuawo lè dùkɔ̃a be ŋùmè.

³¹Eye, ekè dùkɔ̃a sè be Tɔhonɔ̀ ɖo ŋùku Izràɛlviwo ji, eye be kpɔ lekè wo le zĩ wo ɖo ànyi ɖoa, wo xɔ̀sè; wo jè èklò, eye wo do ènu ègũ, sumɔ Tɔhonɔ̀.