Read gen Toto jo 40 Bible Online

Toto jo 40 - gen bible

Toto jo 40

¹Tɔhonɔ̀ gblɔ̃ na Mosè be:

²“Lè wètri cucugbãa be ŋùkèkè cucugbãa jia, wò la tù ègòdodo be gòxɔa be nɔ̀pea.

³Wò la sɔ Zòɖùɖu-Ɖakà a ɖo e mè, eye wò la wla àɖakàa ɖo èxɔ̀mèsòvɔa godo.

⁴Wò la sɔ èkplɔ̃a va, eye wò la ɖo è, la jrà e ji ɖo. Wò la sɔ kãligbɛ̃tia va, eye wo la sũ yebe èzòawo.

⁵Wò la sɔ lifi be sìka-vɔsakpea ɖo Zòɖùɖu-Ɖakà a be ŋùkɔ̀, eye wò la sɔ èxɔ̀mɔnu-vɔa ɖo nɔ̀pea be èmɔnu.

⁶Wò la sɔ ènumème be vɔsakpea ɖo ègòdodo be gòxɔa be nɔ̀pea be èmɔ̃nu.

⁷Wò la sɔ àmè lèlèɖì be àdàwaa ɖo ègòdodo be gòxɔa ku vɔsakpea dòmè, eye wò la kù èsì ɖo e mè.

⁸Wò la tɔ̃ gbàjàji be èkpa a, eye wò la do èxɔ̀mɔnu-vɔ ɖo gbàjàji be èmɔ̃a nu.

⁹Wò la sɔ àmì do ètaa, eye wò la sì ì na nɔ̀pea ku ènu kèwo lè e mèawo keŋu, wò la kɔ̀ ye ku yebe ŋutinuwo keŋu ŋuti, eye wo la nɔ̀ kɔ̀kɔ̀ɛ.

¹⁰Wò la sì àmì do ènumème vɔsakpea ku yebe ŋutinuwo keŋu, la kɔ̀ e ŋuti, eye vɔsakpea la nɔ̀ kɔ̀kɔ̀ɛ ŋutɔ.

¹¹Wò la sì àmì na àmè lèlèɖì be àdàwa gãa ku yebe sìhɛ̃a, eye wò la kɔ̀ e ŋuti.

¹²Wò la ɖè Arɔ̀n ku yebe ŋusùviwo fiɔ, lè ègòdodo be gòxɔa mɔnu; wò la lè wo ɖì ku èsìa,

¹³wò la do àwù kɔ̀kɔawo na Arɔ̀n, wò la do àmì èta na ɛ̀; eye wò la kɔ̀ e ŋuti, ne bèa wɔ̀ vɔsa be èdɔa na mù.

¹⁴Ne wò ɖè yebe ŋusùviwo fiɔ vɔ̀a, wò la do àwù gãawo na wo,

¹⁵wò la do àmì èta na wo, sìgbè lekè wò do è na woa tɔa nène, ne woa wɔ̀ vɔsa be èdɔa na mù. Nène a, àmì kè wò do èta na woa, la do vɔsa be èdɔ kòkòɖàbì àsi na wo, so jìjimè yì jìjimè.”

¹⁶Mosè tɔ èdɔa ji, eye be wɔ̀ ènu kè be ègbè Tɔhonɔ̀ ɖè na ɛ̀a tututu.

¹⁷Nène a, lè èpè èvègɔ̃a be wètri cucugbãa be ŋùkèkè cucugbãa jia, nɔ̀pea sɔ̀gbè.

¹⁸Mosè tù nɔ̀pea: e ɖo yebe dodoeawo, gla yebe èkpa a be àgboŋugbloawo, ɖo yebe àtiblatiawo eye be fɔ̃ yebe sɔtiawo ɖotè.

¹⁹E vlũ gòxɔa ɖo nɔ̀pea ji, sɔ gòxɔa be ènucɔ̃nu cɔ̃ e ji, sìgbè lekè Tɔhonɔ̀ ɖo è na Mosè a nène.

²⁰E sɔ Zòɖùɖu be jèsìa ɖo àɖakàa mè, sɔ àti lɔbɔɛawo ɖo àɖakàa ji, eye be sɔ nùtuvia ɖo e nu.

²¹E kɔ àɖakàa va ɖo nɔ̀pea mè, eye be vlũ èxɔ̀mèsòvɔ kè la tu ŋùmè na Zòɖùɖu-Ɖakà a, sìgbè lekè Tɔhonɔ̀ ɖo è na Mosè a nène.

²²E sɔ èkplɔ̃a ɖo ègòdodo be gòxɔa mè, lè nɔ̀pea be àvego lɔ̀ge, lè èxɔ̀mèsò-vɔa be ŋùkɔ̀.

²³E ɖo kpɔ̃nɔ àgbàkà ɖèka ɖo e ji, lè Tɔhonɔ̀ be ŋùmè, sìgbè lekè Tɔhonɔ̀ ɖo è na Mosè a nène.

²⁴E sɔ kãligbɛ̃tia ɖo ègòdodo be gòxɔa mè, e jè ŋùkɔ̀ èkplɔ̃a, lè nɔ̀pea be àkpa èvègɔ̃a.

²⁵E sũ èzòawo lè Tɔhonɔ̀ be ŋùmè, sìgbè lekè Tɔhonɔ̀ ɖo è na Mosè a nène.

²⁶E sɔ sìka-vɔsakpea ɖo ègɔ̀dodo be gòxɔa mè, lè èxɔ̀mèsò-vɔa be ŋùkɔ̀.

²⁷E tɔzò lifi lè e ji, sìgbè lekè Tɔhonɔ̀ ɖo è na Mosè a nène.

²⁸E sɔ èxɔ̀mɔnu-vɔ ɖo nɔ̀pea be èmɔnu.

²⁹Ekè be sɔ ènumème vɔsakpea ɖo ègòdodo be gòxɔa be nɔ̀pea be èmɔnu vɔ̀a, e wɔ̀ ènumème vɔsa ku ènu nana, sìgbè lekè Tɔhonɔ̀ ɖo è na Mosè nène.

³⁰E sɔ àmè lèlèɖì be àdàwaa ɖo ègòdodo be gòxɔa ku vɔsakpea dòmè, eye be kù èsì ɖo e mè, ne àmè lèlèɖì.

³¹Mosè, Arɔ̀n ku èvia ŋusùwo kùnà yebe èsìa klɔna àlɔ̀ ku àfɔ̀.

³²Ne wo la ɖo ègòdodo be gòxɔa mè, ku ne wo va vɔsakpea be ŋùkɔ̀a, wo lènà woa ɖokoewo ɖì, sìgbè lekè Tɔhonɔ̀ do è àsi na Mosè a nène.

³³E tɔ̃ gbàjàji be èkpa trɔ do nɔ̀pea ku vɔsakpea, eye be do gbàjàji be èmɔnu-vɔa. Nène a, Mosè wu èdɔawo kpata nu.

³⁴Lili bablaa cɔ̃ ègòdodo be gòxɔa, eye Tɔhonɔ̀ be gogoa ɖɔ nɔ̀pea.

³⁵Ekè lili bablaa cɔ̃ ègòdodo be gòxɔa, eye Tɔhonɔ̀ be gogo ɖɔ nɔ̀pea, Mosè mu teŋu ɖo e mè ò.

³⁶Ne lili bablaa kɔ yì èjia, Izràɛlviwo jènà èmɔ̃, ɖona èta woabe àgbãdroɖope vòvòawo.

³⁷Vɔ̀a, ne lilia mu kɔ yì èji ò a, wo mu jona, kaka na gbè kè gbè be la gbà kɔ yì èjia ò.

³⁸Ɖoa, Tɔhonɔ̀ be lilia, cɔ̃na nɔ̀pea ji, lè ŋùkèkè mè, vɔ̀a, lè èzã mèa, èzò nɔ̀nà e mè, lè Izràɛl be àxuea keŋu be ŋùmè, lè woabe àgbãdroɖopeawo kpata.