Read gen Toto jo 5 Bible Online

Toto jo 5 - gen bible

Toto jo 5

¹Mosè ku Arɔ̀n va gblɔ̃ na Faraɔ̀n be: “Tɔhonɔ̀ kè nyi Izràɛl be Mawu a gblɔ̃ be: 'Ɖè àsi lè dùkɔ̃ nyèa ŋuti ne bèa yì sɛ̃ mù, lè zògbè a ji, la sɔ do bùbu ŋuti nyè.'”

²Faraɔ̀n biɔ sè be: “Àmè kɛ ye nyi Tɔhonɔ̀a, ne ma sè yebe ègbè, ne ma ɖè àsi lè Izràɛl ŋuti, bèa yì ò?”

³Wo ɖo e ŋuti be: “Hebrùviwo be Mawu a ɖè ye ɖokoe fiɔ mi. Tɔ̀ wò jɔ̀, ɖè èmɔ̃ na mi, ne mia zɔ̃ ŋùkèkè ètɔ̃ be àzɔ̃lì, yì zògbè a ji, ne mia yì savɔ na Tɔhonɔ̀, miabe Mawu. Ne mu nyi nène ò a, e la lũ ɖo mìa ji, ku èdɔ̀ vuɛ̃, àlo, ku èwui.”

⁴Ejiptè be èfìɔa ɖo e ŋuti na wo be: “Mosè ku Arɔ̀n, nukɛ ŋuti ye mì le ji, la ɖè dùkɔ̃a jo, lè yebe èdɔa gbɔ ɖo ò? Mì ɖèbla yì mìabe èdɔ sɛ̃sɛ̃awo ji!”

⁵Faraɔ̀n gblɔ̃ be: “Fifì kè dùkɔ̃a sùgbɔ ɖo e jia, mì le ji be woa gbɔ̃jɛ̃, lè woabe èdɔ sɛ̃sɛ̃wo mèa!”

⁶Gbè ŋua gbèa, Faraɔ̀n ɖè ègbè na dùkɔ̃a be àkpasɛ̃sɛ̃ be èdɔ ji kpɔtɔawo ku ènuŋlɔ̀tɔawo be:

⁷“Mì mu la gbà ji èbè na dùkɔ̃a, ne woa sɔ do ànyikɔa mè, la sɔ mè èkpe, sìgbè lekè mì nana wo sãa nène ke ò. Woa ŋutɔ, wo ne nɔ yì ji èbèa.

⁸Mìawo yaa, mì zĩ woa ji, ne woa gbà nɔ mè èkpe nenè kè wo mènà kaka va na fifìa. Mì mu gbà ɖè ɖekpe kpɔ̀tɔ̀ na wo ò. Kuviɔ̃tɔwo ye wo nyi. Ènu kèa ŋuti wo le do àpa be: 'Mia yì savɔ na miabe Mawu!'

⁹Àkpasɛ̃sɛ̃ be èdɔa ne sù àmè ŋuawo, eye èdɔ sùgbɔ ne nɔ̀ woa ji, ne wo mu gbà nɔ ɖo èto àmè blènyàwo ò!”

¹⁰Àkpasɛ̃sɛ̃ be èdɔ jikpɔtɔawo ku ènuŋlɔ̀tɔawo to va gblɔ̃ na dùkɔ̃a be: “Èse kè Faraɔ̀n do a ye nyi ekèa: 'Nyè mu gbà la na mì èbè ò!'

¹¹Mìawo ŋutɔ, mì yì ji èbè, lè àfi kè mì la kpɔ ɛ̀ lèa! Vɔ̀a, mìabe èdɔa mu la ɖè kpɔ̀tɔ̀ ò.”

¹²Nène a, dùkɔ̃a kãkã ɖo Ejiptè be ànyigbã bliboa ji, ne bèa lɔ èbè ku èko.

¹³Èdɔjikpɔtɔawo lè zĩ woa ji, le ciji na wo be: “Mì ɖo la wu mìabe gbè sia gbè be èdɔa nu keŋu-keŋu, sìgbè lekè mì wɔ̀nà ɛ̀ sãa, wàlɛbɛ kè èbè nɔ̀nà mìa sia ke nène!”

¹⁴Wo pò Izràɛlvi kèwo Faraɔ̀n be èdɔjikpɔtɔwo sɔ ɖo èdɔnunɔ̀tɔwoa, biɔ wo sè be: “Nukɛ ŋuti mì mu wu èkpe kè wo dɔ̃ mìa nu lè èsɔ̀ ku egbè mè sìgbè lekè mì wɔ̀na ɛ̀ sãa nène ò?”

¹⁵Izràɛlviwo be èdɔnunɔ̀tɔwo va na àle na Faraɔ̀n be: “Nukɛ ŋuti ye wò le wɔ̀ nènea ku sumɔ̃vi wòawo ò?

¹⁶Wo mu gbà le na èbè sumɔ̃vi wòwo ò, gãke wo le gblɔ̃ na mi be: 'Mì mè èkpe, mì mè èkpe!' Wu ekèa, wo le pò sumɔ̃vi wòwo. Vɔ̀a, dùkɔ̃ wòa bòhũ ye jè àgɔ̀.”

¹⁷Faraɔ̀n ɖo e ŋuti be: “Kuviɔ̃tɔwo, kuviɔ̃tɔwo ye mì nyi! Ekèa ŋuti ye mì le gblɔ̃ be: “Mì na, mia yì savɔ na Tɔhonɔ̀.

¹⁸Fifìa, mì yì wɔ̀ èdɔ. Wo mu la na mì èbè ò, vɔ̀a, èkpe kè mì wɔ̀nàa kpò mì la gbà wɔ̀!”

¹⁹E sɛ̃ŋu na Izràɛlviwo be èdɔnunɔ̀tɔwo ŋutɔ, kè wo gblɔ̃ na wo be: “Mì mu la ɖè èkpe kè mì mènà gbè sia gbèa ji kpɔ̀tɔ̀ ò. Hɛ̃hlɛ̃mè kè mì mènà xoxoa kpò mì la gbà mè!”

²⁰Ekè wo to so Faraɔ̀n gbɔa, wo va kpɔ Mosè ku Arɔ̀n kèwo lètè kpɔ woa.

²¹Wo gblɔ̃ na Mosè ku Arɔ̀n be: “Tɔhonɔ̀ ŋutɔ ne kpɔ, eye ne bèa ɖokòjo. Mì na be mi trɔzũ àmè bàɖàwo lè ŋùkumè na Faraɔ̀n ku yebe ŋutimewo. Èwui ye mì sɔ do àlɔ̀ mè na wo be wo ne sɔ wù mi!”

²²Mosè trɔ yì Tɔhonɔ̀ gbɔ, eye be gblɔ̃ na ɛ̀ be: “Tɔhonɔ̀, nukɛ ŋuti wò do àyà na dùkɔ̃ kèa ɖo ò? Nukɛ ŋuti ye wò jo dɔ̃ mù ɖoɖa ɖo ò?

²³So kaka hùenu kè mù dɔ̃ gogo Faraɔ̀n, pò nupo na ɛ̀, lè àpo nyikɔ mèa, ɖe kpò be le sɛ̃ ètamè ɖo dùkɔ̃ kèa ŋuti, eye wò yaa, wò mu le wɔ̀ ènu ɖekpe sɔ hlùɛ̃ dùkɔ̃ wòa gã ŋutɔ cã ò!”