Read gen Toto jo 6 Bible Online

Toto jo 6 - gen bible

Toto jo 6

¹Tɔhonɔ̀ gblɔ̃ na Mosè be: “Fifìa, wò la kpɔ ènu kè mù la wɔ̀ ku Faraɔ̀n: Àlɔ̀ sɛ̃sɛ̃ ye la na, be e la ɖè àsi lè woa ŋuti, be woa yì; àlɔ̀ sɛ̃sɛ̃ ye la na be ye ŋutɔ la nyà wo to lè èdùa mè!”

²Mawu pò nupo na Mosè, eye be gblɔ̃ na ɛ̀ be: “Ènyè ye nyi Tɔhonɔ̀.

³Mù ɖè ɖokoe nyè fiɔ Abràham, Izàk ku Yakɔb, sìgbè Mawu ŋusɛ̃kpatatɔ nène. Vɔ̀a, nyè mu kpɔ ɖè ɖokoe nyè fiɔ wo, ku nyikɔ nyè kè nyi Tɔhonɔ̀a hàɖe ò.

⁴Mù ɖù èzò ku wo, eye mù sɔ Kanàn be ànyigbã kè ji wo la nyi àmèjrowo lèa, na wo.

⁵Fifìa, mù sè Izràɛlviwo be àlenana, ekè Ejiptètɔwo le tɛ wo ɖo ànyia, eye mù ɖoŋù zòɖùɖu kè mù wɔ̀ ku woa.

⁶Ye ŋutia, to na Izràɛlviwo be: Ènyè ye nyi Tɔhonɔ̀. Mù la ɖè mì to lè Ejiptè be àkpasɛ̃sɛ̃-dɔwo mè. Mù la hlùɛ̃ mì, to so kluvi-dɔwɔ̀wɔ mè. Mù la drɛ̃ àlɔ̀, la sɔ hɔ̃hlɔ̃ ku ŋusɛ̃ ɖè mì.

⁷Mù la sɔ mì wɔ̀ dùkɔ̃ nyè, eye mù la nyi mìabe Mawu. Mì la nya ɛ̀ be, ènyè ye nyi Tɔhonɔ̀ kè nyi mìabe Mawu, àmè kè le ɖè mì to lè Ejiptè be kluvi-dɔwɔ̀wɔ mèa.

⁸Mù la kplɔ̀ mì yì èdù kè be àjɔ̀gbè mù fìã na Abràham, Izàk ku Yakɔb woa mè. Ènyè Tɔhonɔ̀ ye la sɔ ɛ̀ kè mì.”

⁹Mosè va gblɔ̃ ènyà kèawo na Izràɛlviwo, vɔ̀a, wo mu ɖo èto è ò, ɖoa, woabe kluvi be àgbèa, wɔ̀ be wo gbɔjɔ.

¹⁰Tɔhonɔ̀ gblɔ̃ na Mosè be:

¹¹“Yì pò nupo na Faraɔ̀n, Ejiptè be èfìɔa! Gblɔ̃ na ɛ̀ be ne ɖè àsi lè Izràɛlviwo ŋuti, ne woa jo lè yebe ànyigbã ji.”

¹²Eye, Mosè gblɔ̃ lè Tɔhonɔ̀ be ŋùmè be: “Ekè Izràɛlviwo mu ɖo èto mù ò a, leke Faraɔ̀n la teŋu ɖo èto ènyè kè nupo mu nyana pònà na a ò?”

¹³Tɔhonɔ̀ pò nupo ku Mosè ku Arɔ̀n, eye be do yebe èjro àsi na wo, na Izràɛlviwo ku Faraɔ̀n, Ejiptè be èfìɔa, be wo ne kplɔ̀ Izràɛlviwo jo lè Ejiptè-nyigbã ji.

¹⁴Woabe xòmè be ègaawo ye nyi ekèawo: Rubɛ̀n Izràɛl be ŋùkɔ̀gbevi be èviwo ye nyi: Henɔ̀k, Palù, Hesrɔ̀n ku Karmì. Woawo ye lè Rubɛ̀n be kɔ̀ta mè.

¹⁵Simeɔ̀n be èviwo ye nyi: Yemùɛl, Yamìn, Ohàd, Yakìn, Sohàr ku Caòl, Kanàn nyɔ̃nùa be ŋusùvi. Woawo ye nyi Simeɔ̀n be èviwo.

¹⁶Levì be èviwo be nyikɔwo, ɖo woabe jìjimè nu ye nyi ekèawo: Gɛrsɔ̀n, Kehàt ku Merarì. Levì be àgbènɔ̀zãwo sù èpè àlɔ̀ ɖèka ègbã vɔ adrɛ̃ (137).

¹⁷Gɛrsɔ̀n be èviwo nyi: Livnì ku Cimeì, ɖo woabe jìjimè nu.

¹⁸Kehàt be èviwo ye nyi: Amràm, Yizhàr, Hebrɔ̀n ku Uzìɛl. Kehàt nɔ̀ àgbè èpè àlɔ̀ ɖèka gbã vɔ ètɔ̃ (133).

¹⁹Merarì be èviwo nyi: Maxlì ku Musì. Ekèawo ye nyi Levì be èviwo be kɔ̀ta ɖo woabe jìjimè nu.

²⁰Aràm ɖè tasia Yokebɛ̀d, eye be jì Mosè ku Arɔ̀n na ɛ̀. Aràm nɔ̀ àgbè èpè àlɔ̀ ɖèka ègbã vɔ adrɛ̃ (137).

²¹Yizmàr be èviwo ye nyi: Korà, Nɛfɛg ku Zitrì.

²²Uzìɛl be èviwo ye nyi: Mikàɛl, Elzafà ku Zitrì.

²³Arɔ̀n ɖè Elicebà kè nyi Aminadàb be nyɔ̃nùvi, àmè kè le nyi Nàxasɔ̀n be nɔ̀vi-nyɔ̃nùa. Elicebà jì Nadàb, Avihù, Eleazàr ku Itamàr.

²⁴Korà be èviwo ye nyi: Àsir, Ɛlkanà, ku Aviasàf. Woawo ye nyi Korà be èviwo be kɔ̀ta.

²⁵Eleazàr, kè nyi Arɔ̀n be ŋusùvia ɖè Putìɛl be èvi nyɔ̃nù; e jì Pinexàs na ɛ̀. Àmè kèawo ye lè ŋùkɔ̀ na Levì be èviwo be xòmèawo, ɖo woabe kɔ̀tawo nu.

²⁶Mosè ku Arɔ̀n ye nyi àmè kèwo si Tɔhonɔ̀ biɔ so be: “Mì kplɔ̀ Izràɛlviwo jo lè Ejiptè-nyigbã ji, lè gbãdãgbãwo be ɖoɖo nu.”

²⁷Woawo ye pò nupo na Faraɔ̀n, Ejiptè be èfìɔa, ne woa kplɔ̀ Izràɛlviwo jo lè Ejiptè-nyigbã ji.

²⁸Eye, gbè kè gbè Tɔhonɔ̀ pò nupo na Mosè lè Ejiptè-nyigbã jia,

²⁹gbè kè gbè be gblɔ̃ na Mosè be: “Ènyè ye nyi Tɔhonɔ̀; gbìgbɔ̀ gblɔ̃ ènu kèwo keŋu mù gblɔ̃ na wòa, na Faraɔ̀n, Ejiptè be èfìɔa.”

³⁰Mosè ɖo e ŋuti na Tɔhonɔ̀ be: “Ènyè kè nupo mu nyana pòpo na ò a, àleke Faraɔ̀n la teŋu ɖo èto mù ɖo ò?”