Read gen Toto jo 7 Bible Online

Toto jo 7 - gen bible

Toto jo 7

¹Vɔ̀a, Tɔhonɔ̀ ɖo e ŋuti na Mosè be: “Kpɔɖa, mù la na wò la nɔ̀ sìgbè Mawu nène a, na Faraɔ̀n, eye fòfo wò Arɔ̀n la nyi àpo ènyànuɖètɔ.

²Èwò ye la gblɔ̃ ègbè kèwo keŋu mù la ɖè na wòa, eye fòfo wò Arɔ̀n la pò nupo na Faraɔ̀n, ne bèa ɖè àsi lè Izràɛlviwo ŋuti, ne woa jo, lè Ejiptè be ànyigbã ji.

³Nyè yaa, mù la na Faraɔ̀n be èji la trì, eye mù la wɔ̀ jèsìdo ku ŋùdãnu sùgbɔ lè Ejiptè be ànyigbã ji.

⁴Gãkea, Faraɔ̀n mu la ɖo èto mì ò. Mù la do àlɔ̀ ɖoɖa Ejiptè be èdùa gbɔ, eye mù la sɔ ŋusɛ̃ ɖè àhùakɔ̃ nyèwo to, mù la ɖè dùkɔ̃ nyè, mù la ɖè Izràɛlviwo to so Ejiptè be ànyigbã ji.

⁵Wàlɛbɛ ŋua ye Ejiptèviwo la nya be ènyè ye nyi Tɔhonɔ̀, gà kè mè, mù la do àlɔ̀ ɖoɖa Ejiptè gbɔa, wàlɛbɛ ŋua ye mù la ɖè Izràɛlviwo to.”

⁶Mosè ku Arɔ̀n wɔ̀ nènea. Wo zɔ̃ ɖo ènu kè tututu Tɔhonɔ̀ ɖo na woa ji.

⁷Mosè ɖo èpè èkà èvè (80) eye Arɔ̀n ɖo èpè èkà èvè ci ètɔ̃ (83), wàlɛbɛ kè Faraɔ̀n pònupo ku woa.

⁸Tɔhonɔ̀ gblɔ̃ na Mosè ku Arɔ̀n be:

⁹“Ne Faraɔ̀n gblɔ̃ na mì be: 'Mì wɔ̀ ŋùdãnu ɖe a, wò la gblɔ̃ na Arɔ̀n be: Sɔ àtikplɔ wòa, ɖà ɖoɖa Faraɔ̀n be ŋùkɔ̀, ne bèa trɔ zũ èdã gã ɖe!'”

¹⁰Mosè ku Arɔ̀n va Faraɔ̀n gbɔ, eye wo zɔ̃ ɖo ègbè kè Tɔhonɔ̀ sɔ do àsi na woa ji. Arɔ̀n dà yebe àtikplɔa ɖoɖa Faraɔ̀n ku yebe sumɔ̃viwo be ŋùkɔ̀. Àtikplɔa trɔ zũ èdã gã ɖe.

¹¹Faraɔ̀n cã yɔ ènunyatɔwo ku àfãkãtɔwo, eye Ejiptè be ŋùdãnuwɔ̀tɔ kèawo sɔ woabe àyèmènu wɔ̀wɔwo wɔ̀ nènea ke.

¹²Woa dòmètɔ ɖe sia ɖe dà yebe àtikplɔa ɖo ànyi, eye wo trɔ zũ èdã gãwo. Vɔ̀a, Arɔ̀n be àtikplɔa le woabe àtikplɔwo mì.

¹³Gãkea, Faraɔ̀n be èjìmè gbà sɛ̃ŋu. Sìgbè leke Tɔhonɔ̀ gblɔ̃ ɛ̀a nènea, mu ɖoto Mosè ku Arɔ̀n ò.

¹⁴Ekèa yomè a, Tɔhonɔ̀ gbà gblɔ̃ na Mosè be: “Faraɔ̀n le sɛ̃ ètamè. E gbe be yè mu la ɖè àsi lè dùkɔ̃a ŋuti, ne bèa jo ò.

¹⁵Yì Faraɔ̀n gbɔ ŋùdekɛ̃nyɛ mè, wàlɛbɛ kè be ɖìnàsà lè ètɔ̀a toa. Wò la nɔ̀tè kpɔ ɛ̀, lè ètɔ̀a to, eye wò la le àtikplɔ kè trɔ zũ èdã gã sãa ɖo àsi.

¹⁶Gblɔ̃ na Faraɔ̀n be: 'Tɔhonɔ̀, Hebrùviwo be Mawu a, dɔ̃ mù ɖoɖa gbɔ wò, be ma gblɔ̃ na wò be: Ɖè àsi lè dùkɔ̃ nyè a ŋuti, ne bè a yì sumɔ mù, lè zògbè ji!' Vɔ̀a, wò mu ɖo èto, kaka va na fifì ò.

¹⁷Tɔhonɔ̀ be: Ekèa la na be wò la nya be ènyè ye nyi Tɔhonɔ̀. Mù la sɔ àtikplɔ kè lè àlɔ̀ mè na mù a pò ètɔ̀a be èsìa, eye èsìa la trɔ zũ èhũ.

¹⁸Èlã kèwo lè ètɔ̀a mèawo la ku, ètɔ̀a la nɔ hũɛ̃, eye Ejiptèviwo mu la gbà teŋu nù ètɔ̀a be èsìa ò.”

¹⁹Tɔhonɔ̀ gblɔ̃ na Mosè be: “To na Arɔ̀n be: 'Sɔ àtikplɔ wò, eye wòa vlũ àlɔ̀ ɖo Ejiptèviwo be èsìwo ji, ɖo woabe ètɔ̀ sàsrawo, ètɔ̀ kùkuwo ku ètãwo ji, ne àfi sia àfi kè èsì lèa, ne trɔ zũ èhũ! Èhũ ne nɔ̀ Ejiptè be èdùa keŋu mè; ne nɔ̀ ègòwo ku èzewo mè.'”

²⁰Mosè ku Arɔ̀n zɔ̃ ɖo Tɔhonɔ̀ be ɖoɖo a ji. Arɔ̀n kɔ àtikplɔa yì èji, eye be pò ètɔ̀a be èsìa, lè Faraɔ̀n ku yebe ŋutimeawo be ŋùmè. Ètɔ̀a be èsìa keŋu-keŋu trɔ zũ èhũ.

²¹Èlã kèwo lè ètɔ̀a mèawo ku; ètɔ̀a tɔ hɔ̃hɔ̃ɛ eye Ejiptètɔwo mu gbà teŋu le nù yebe èsì ò. Eye èhũ lè Ejiptè be èdùa keŋu mè.

²²Vɔ̀a, Ejiptè be ŋùdãnuwɔ̀tɔwo cã wɔ̀ ènu kèa ke, ku woabe àyèmènu wɔ̀wɔwo. Sìgbè lekè Tɔhonɔ̀ gblɔ̃a nènea, Faraɔ̀n be èji gbà sɛ̃ŋu kpe è, eye mu ɖo èto Mosè ku Arɔ̀n ò.

²³Faraɔ̀n trɔ jo yì àxomè, eye mu sɔ ènu kè jɔ̀ a, veve ɖe ò.

²⁴Ejiptèviwo keŋu kù èdowo ɖo ètɔ̀a to, ne woa kpɔ èsì, ne woa nù, ɖoa, wo mu teŋu le nù ètɔ̀a be èsìa ò.

²⁵Kè Tɔhonɔ̀ gble ètɔ̀a, èsìa nɔ̀ nènea ŋùkèkè adrɛ̃ sɔ̃ŋu.

²⁶Tɔhonɔ̀ gbà gblɔ̃ na Mosè be: “Yì Faraɔ̀n gbɔ, eye wòa gblɔ̃ na ɛ̀ be: 'Tɔhonɔ̀ be: Ɖè àsi lè dùkɔ̃ nyè ŋuti, ne bèa yì sumɔ mù.

²⁷Ne wò gbe kpò be yè mu la ɖè àsi lè e ŋuti ò a, mù la sɔ àbìtowo dɔ̃ èto na Ejiptè be ànyigbã a kpata.

²⁸Àbìtowo la ɖɔ ètɔ̀a; wo la to va àpo àxomè: wo la ɖo àpo èxɔ̀dɔ̃me mè, wo la lia àpo àbàti ji, wo la ɖo àpo sumɔ̃viwo be èxɔ̀mè; wo la yì àpo dùkɔ̃a gbɔ, wo la ɖo àpo àblo-kpowo mè, ku àpo mawɛzewo mè.

²⁹Àbìtoawo la lia ji wò; wo la lia dùkɔ̃mèvi wòwo ji; wo la lia sumɔ̃vi wòwo ji.'”