Read gen Toto jo 8 Bible Online

Toto jo 8 - gen bible

Toto jo 8

¹Tɔhonɔ̀ gblɔ̃ na Mosè be: “To na Arɔ̀n be: 'Sɔ àtikplɔ wòa, ne wòa vlũ àlɔ̀ ɖo ètɔ̀wo ji, ɖo ètɔ̀ kùkuwo ji, ɖo ètãwo ji, eye wòa na àbìtowo, woa va kɔ̀ ɖo Ejiptè be ànyigbã a ji!'”

²Arɔ̀n vlũ àlɔ̀ ɖo Ejiptè be ètɔ̀wo ji, eye àbìtowo to va, ɖɔ èdùa mè keŋu.

³Vɔ̀a, Faraɔ̀n be kpajije wɔ̀tɔwo cã sɔ woabe àyèmènu wɔ̀wɔwo wɔ̀ nènea ke; wo na àbìtowo va ɖɔ Ejiptè be ànyigbã ji.

⁴Faraɔ̀n yɔ Mosè ku Arɔ̀n, eye be gblɔ̃ na wo be: “Mì ɖèkuku na Tɔhonɔ̀, ne bèa na ne nyè ku dùkɔ̃ nyèa, mia kpɔ gbɔ̃jɛ̃, so àbìtoawo si mè, ne ma ɖè àsi lè Izràɛlviwo ŋuti, ne woa yì savɔ na Tɔhonɔ̀.”

⁵Mosè ɖo e ŋuti na Faraɔ̀n be: “Èfìɔ bùbùtɔ ne gblɔ̃ wàlɛbɛ kè mù la fãkue ɖo ye ku yebe sumɔ̃viwo kudo yebe dùkɔ̃a ta, àleke be àbìtoawo ne jo lè yebe àxuewo ku yebe èfìɔsawo mè, ne woa kpɔ̀tɔ̀ kpò lè ètɔ̀ gãa mè.

⁶Èfìɔa ɖo e ŋuti be: “Èsɔ̀!” Mosè to na ɛ̀ be: “Ne bèa va e mè, sìgbè lekè wò gblɔ̃ ɛ̀a nène, ne wòa nya be àmè ɖekpe mu sɔ̀ ku Tɔhonɔ̀, miabe Mawu a ò.

⁷Àbìtoawo la jo, lè gbɔ wò, lè àxue wòwo mè, wo la jo lè sumɔ̃vi wòwo ku dùkɔ̃ wòa gbɔ, eye ètɔ̀ gãa mè kpò wo la kpɔ̀tɔ̀ lè.”

⁸Kè Mosè ku Arɔ̀n to lè Faraɔ̀n be àxuea mèa, Mosè fãkue na Tɔhonɔ̀ ɖo àbìto kèwo be sɔ le dɔ̃ èto na Fraraɔ̀n, èfìɔa ta.

⁹Tɔhonɔ̀ wɔ̀ ɖo ènyà kè Mosè gblɔ̃a ji. Àbìtoawo ku; wo bu lè àxueawo mè, àxuewo be xixenu ku àgblèwo mè.

¹⁰Wo lɔ wo bɔ̀ ɖodu gbãŋu-gbãŋu, eye wo le hũɛ̃ lè èdùa mè keŋu.

¹¹Kè Faraɔ̀n kpɔ be yèwo kpɔ gbɔ̃jɛ̃ vi ɖe a, e gbà sɛ̃ ètamè ke. Mu gbà sè Mosè ku Arɔ̀n be ègbè, sìgbè àlekè Tɔhonɔ̀ gblɔ̃ ɛ̀a nène ò.

¹²Eye Tɔhonɔ̀ gblɔ̃ na Mosè be: “To na Arɔ̀n be: 'Kɔ àtikplɔ wòa yì èji, eye wòa pò èkɔ lè ànyigbã ji; e la trɔ zũ èmuwo lè Ejiptè be èdùa keŋu mè.'”

¹³Wo wɔ̀ ɖo e ji; Arɔ̀n kɔ yebe àtikplɔa yì èji, eye be pò èkɔa, lè ànyigbã ji. Eye èmuwo hũ ɖo àmèwo ku èlãwo ji. Ànyigbã be èkɔa kpata trɔ zũ èmuwo lè Ejiptè be èdùa mè.

¹⁴Faraɔ̀n be kpajije wɔ̀tɔwo cã jè àgbàgba be yèwoa sɔ àyèmènu wɔ̀wɔwo wɔ̀ èmuwo, vɔ̀a, wo mu teŋu ì ò. Eye èmuwo hũ ɖo àgbètɔwo ku èlãwo ŋuti.

¹⁵Kpajije wɔ̀tɔawo gblɔ̃ na Faraɔ̀n be: “Ekèa nyi Mawu be àlɔ̀vi.” Vɔ̀a Faraɔ̀n be èjìmè gbà sɛ̃ŋu. Mu ɖo èto Mosè ku Arɔ̀n, sìgbè lekè Tɔhonɔ̀ gblɔ̃ ɛ̀a nène ò.

¹⁶Tɔhonɔ̀ gblɔ̃ na Mosè be: “Yì Faraɔ̀n gbɔ, ŋùdekɛ̃nyɛ fùtù, wàlɛbɛ kè be la to, la yì ètɔ̀ toa. Gblɔ̃ na ɛ̀ be: 'Ɖè àsi lè dùkɔ̃ nyèa ŋuti, ne bèa yì sumɔ mù.

¹⁷Ne wò mu ɖè àsi lè dùkɔ̃ nyèa ŋuti, ne bèa yì sumɔ mù ò a, mù la na eyeviwo la va kɔ̀ ɖo ji wò; la va sumɔvi wòwo ji; la va kɔ̀ ɖo dùkɔ̃ wòa ji, wo la va àpo àxuewo ji. Ejiptèviwo be àxuewo la ɖɔ ku eyeviwo, kaka jè ànyigbã ke ji wo lèa ji.

¹⁸Gbè ŋua gbèa, mù la ɖè Gocɛ̀n kè nyi èdù kè mè dùkɔ̃ nyèa lèa, to lè e mè. Funua, eyevi mu la nɔ̀ ànyi ò, àleke be wòa nya be ènyè, Tɔhonɔ̀, mù lè èdùa mè.

¹⁹Mù la wɔ̀ jojo be jèsìdo, la sɔ do vòvòtoto dùkɔ̃ nyèa ku dùkɔ̃ wò dòmè; jèsìdo kèa la va e mè èsɔ̀.'”

²⁰Tɔhonɔ̀ wɔ̀ nènea. Eyeviwo va ɖɔ Faraɔ̀n be àxue, yebe sumɔ̃viwo be àxue, èdùa keŋu, lè gbɔsùsu mè. Ejiptè be ànyigbã a keŋu ɖɔ ku eyeviwo fuu.

²¹Faraɔ̀n yɔ Mosè ku Arɔ̀n, eye be to na wo be: “Enyɔ! Mì yì savɔ na mìabe Mawu a, vɔ̀a, lè èdù kèa mè!”

²²Mosè ɖo e ŋuti na Faraɔ̀n be: “Mu jè be mia yì savɔ nènea ò. Ɖoa, vɔsa kè mi la wɔ̀ na Tɔhonɔ̀, miabe Mawu a, la nyɔŋu na Ejiptèviwo. Mi la teŋu wɔ̀ vɔsa kè la nyɔŋu na Ejiptèviwo, lè woabe ŋùmè, kè ye wo mu la pò èkpe mi ò a?

²³Mi la wɔ̀ ŋùkèkè ètɔ̃ be èmɔzɔ̃zɔ̃, yì zògbè a ji, eye mi la savɔ na Tɔhonɔ̀, ɖo àlekè be la gblɔ̃ na mia ji.”

²⁴Faraɔ̀n gblɔ̃ na Mosè be: “Mù la ɖè àsi lè mìa ŋuti, eye mì la yì savɔ na Tɔhonɔ̀, mìabe Mawu a, lè zògbè a ji. Vɔ̀a, mì mu gbà yì dìdìpe wu nu ò! Mì fãkue ɖo èta nyè.”

²⁵Mosè gblɔ̃ be: “E nyɔ; ne mù gbe jo lè gbɔ wò kpòa, mù la fãkue na Tɔhonɔ̀ be kaka na èsɔ̀a, eyeviawo la jo lè Faraɔ̀n gbɔ; wo la jo lè Faraɔ̀n be sumɔ̃viwo ku dùkɔ̃a gbɔ. Vɔ̀a, mù le ɖèkuku na Faraɔ̀n be mu gbà blè mù ke ò, ne bèa gbe be dùkɔ̃a mu gbà yì savɔ na Tɔhonɔ̀ ò!”

²⁶Mosè jo lè Faraɔ̀n gbɔ, eye be fãkue na Tɔhonɔ̀,

²⁷Tɔhonɔ̀ zɔ̃ ɖo ènyà kè Mosè gblɔ̃a ji. Eyeviawo jo lè Faraɔ̀n gbɔ. Wo jo lè yebe sumɔ̃viawo gbɔ; wo jo lè yebe dùkɔ̃a gbɔ, kui ɖèka tètè mu gbà kpɔ̀tɔ̀ ò.

²⁸Gãke fifìa cã, Faraɔ̀n gbà sɛ̃ yebe èjìmè, eye mu ɖè àsi lè dùkɔ̃a ŋuti, ne bèa jo ò.