Read gen Yɔb 11 Bible Online

Yɔb 11 - gen bible

Yɔb 11

¹Nène a ye Sofàr so Naamà xɔ̀ ènyà gblɔ̃ na Yɔb be:

²Ènyà kèawo kpata mu la xɔ̀ ɖoŋutia? Nupo nya pòpo sù la xɔ̀ kunùɖèɖea?

³Àpo ènumè vivia la na àmèwo la bɔ̀nua? Kè wò le kò wo ea, wo la xɔ̀ ɖo àpo ènyàwo jia?

⁴Wò gblɔ̃ ŋutɔ cã be: “Àpe nufiɔfiɔ sɔ̀gbè, Mawu mu ɖo ènuɖe la gbe na mù ò.”

⁵Mù jro be Mawu ne kè ènu, ne pò nupo ne bèa na wò ɖoŋuti.

⁶E la na wò la nya yebe ènunya wawlawo. Ɛ̃ɛ, e sònà nunya do lè àvòmè. Wò la sè e mè kpòeɖe be Mawu ŋlɔ̀ àpo àgɔ̀jèjewo be àkpa ɖe be.

⁷Wò la teŋu yì kè ɖo Mawu be ègũ wɔ̀wɔ ŋutia? Wò la teŋu nya Ŋusɛ̃kpatatɔa be ègãnyinyia?

⁸Yebe nunya to jiŋùkusi ŋuti boo. Nukɛ wò la teŋu wɔ̀ ò? E wɔ̀ ègũ wu èkuwode. Nukɛ wò la teŋu nya ò?

⁹E dìdì wu ànyigbã a, e kèkè wu àpù.

¹⁰Ne Mawu jro be yèa do àgɔ̀jètɔ èkpa mè, ne e kplɔ̀ ɛ̀ yì kòjoɖopea, àmè kɛ ye la xe èmɔ̃ na ɛ̀ ò?

¹¹Nyàwo, e nya àmè kè mu lè èbò ɖe nu òa. E nya fikè èvuɛ̃a lèa, mu hiã be bèa le ŋùku ɖo ènu ɖe ŋuti ò.

¹²Vɔ̀ sùkunɔ̀ mu la teŋu trɔ zũ ènunyatɔ gbèɖe ò, ne e gbea, gbè kè gbè ye ègbemè be èsɔàkɛtɛ la xɔ̀ àxomè be kpakpla nyuɛ̃a kpò ye.

¹³Wò ya, wò ɖo la trɔ àpo èjì ɖo Mawu gbɔ, ne wòa kɔ àsiwo yì ji, fãkue.

¹⁴Ne wò wɔ̀ èvuɛ̃a, mù gbà wɔ̀ ɛ̀ ɖe ke ò, mù gbà na màjɔ̀ màjɔ ne sò àxue ɖo gbɔ wò ò.

¹⁵Nène a, wò la teŋu kɔ èta yì ji ɖo èɖi ɖe mu la nɔ̀ ŋuti wò ò. Wò la likè goŋu eye wò mu la vɔ̃ ènu ɖekpe ò.

¹⁶Wò mu la gbà nɔ bù àpo gbledoa ŋuti kpɔ ò, wò la ŋlɔ̀be è sìgbè àlekè èsì srànàa nène.

¹⁷Àpo àgbèa mè la kɔ̀ peŋu-peŋu sìgbè dɔ̃ŋùkusu jàse nène. Èzã la kɔ̀ sìgbè ŋùdekɛ̃nyɛ be kɛ̃klɛ̃ nène.

¹⁸Wò la ɖɔ kudo kãkãɖoji, ɖo ŋùɖo lè na wò. Wò la dɔ̃alɔ̃ lè fàfa mè ne wò kpɔ be ènuwo kpata le zɔ̃ nyuɛ̃ ɖe a.

¹⁹Ne wò le gbɔ̃jɛ̃a, àmè ɖe mu la va do nupo na wò ò. Vɔ̀, àmè fuu ye la kafu wò.

²⁰Vɔ̀, àmè bàɖàwo drɛ̃nàvũ sɔ jina àlɔ̀do. Wo mu kpɔna jèpe ɖekpe ò. Woabe ŋùɖo ye nyi èku.