Read gen Yɔb 12 Bible Online

Yɔb 12 - gen bible

Yɔb 12

¹Nène a Yɔb ɖo e ŋuti be:

²Nyàwo ye, mì nya ènuwo keŋu! Eye ènunyaa, la ku kudo mì!

³Vɔ̀ nyè ya, mù ɖo ènunya sìgbè mìawo ke nène, nyè mu jɔ̀ èlã cã, wu mì ò!

⁴Mù do àpa yɔ Mawu ne ma xɔ̀ ɖoŋuti ye, nukɛ jɔ̀ ò? Mù trɔ ènu kòkoe na èxlɔ̃ nyèwo Wo le kò àmè kè le sè ègbè na Mawu eye be le wɔ̀ ɖo yebe ɖoɖowo jia.

⁵Àmè kè ènu nyɔ na a, ɖènà sùsu be: “Ma crì àmè kè ènu gble do a!” E wɔ̀nà ekèa kudo àmè kè jèanyia.

⁶Eye gbevũwo vònà lè woabe àxuewo mè. Àmè kè jina ège lè Mawu ŋutia, nɔ̀nà ètomè fàfa mè. Mu nya Mawu bu tovò lè yebe ŋusɛ̃ kpò ŋuti ò.

⁷Vɔ̀, biɔ ènyà èlã kèwo lè èkpa wò mèa, wo la fiɔ wò ènu. Yɔ àyamè xèviwo ne woa gblɔ̃ ènyà yeye na wò.

⁸Pònu na ànyigbã a, e la na wò kpakplawo, àpùmèlãwo la kã àseŋu sùgbɔ na wò.

⁹Tɔhonɔ̀ ye wɔ̀ ekèa kpata. Èlã kɛ ye mu nya ɛ̀ lè woa kpata dòmè ò?

¹⁰E ye le ènu ɖoɖowo kpata be àgbè ɖo yebe ŋusɛ̃ gɔ̃mè, àgbètɔ xòmèa kpata be àgbè.

¹¹Wo gblɔ̃nà be: “èto lɔ̃nà ènyà sèse sìgbè àlekè ènu dona vivi nuɖùɖu ŋutia nène.

¹²Àmè sĩsĩwo be ènyà ye nyina ènunya, Àmè kèwo kpɔ ènuwo tèpe kpɔa tɔ̀ ye nyi ènunya!”

¹³Lè nyàwo mèa, ŋusɛ̃ kudo ènunyawo nyi Mawu tɔ̀. E ɖèka pɛɛ ye ɖo àɖàŋù kudo ènunya.

¹⁴Ne Mawu crɔ̃ ènua, àmè ɖekpe mu la teŋu trɔ wɔ̀ ɛ̀ ò, ne e do àmè ɖe ègàkpa mèa, àmè bu ɖe mu la teŋu yì ɖè è to ò.

¹⁵Ne e le èjia, ènuwo kpata puna kpakpla. Ne e gbà tàsi èjia be le ɖùɖùa, e crɔ̃na ànyigbã a.

¹⁶Mawu ɖo ŋusɛ̃ gbà bi ŋutɔ. Nusianu nyi e tɔ̀: Àmè kè le flù kudo àmè kè le flù àmèa.

¹⁷E nana èdùkplɔ̀tɔwo zɔ̃nà àfɔ̀ gbalo, eye e dona kplɔ̀tɔwo àɖàhùa.

¹⁸E ɖènà èfìɔwo lè woabe fìɔzìkpe ji eye e dona gàmènɔ̀tɔ be àwù na wo.

¹⁹E nana hũbonɔwo zɔ̃nà àfɔ̀ gbalo eye e ɖiɖina ekèwo ɖo ŋusɛ̃a.

²⁰E xɔ̀nà ègbè lè àmè kèwo pònà nupo nyuɛ̃ ɖeawo si, e nana àmè sĩsĩwo be susu titɔna.

²¹E nana wo crìnà xixea be àmè gãgãwo, E ɖènà àsi lè àmè sɛ̃ŋuwo ŋuti.

²²E nana vìvìtimènu wawlawo kpata tona va gàglà gbè, e hɛ̃nà ènu kè lè vìvìti mèa va kɛ̃klɛ̃ mè.

²³E nana dùkɔ̃wo sĩnà, e yomè a, e crɔ̃na wo. E nana wo jìnà fuu, e yomè a, e kplɔ̀nà wo yì gàtɔnugbe.

²⁴E ɖènà jɔ̀jɔɛ lè èdùmègawo si, e nana wo sãnà lè zògbè ji, mà nya fikè wo le yìa ò.

²⁵Wo klɛ̃nànu lè èzã klìko mè, eye wo ɖiɖina sìgbè àhànùmunɔ̀wo nène.