Read gen Yɔb 13 Bible Online

Yɔb 13 - gen bible

Yɔb 13

¹Ènu kèa kpata ye àpe ŋùkuwo ŋutɔ kpɔ, èto nyèwo sè eye mù sè e mè.

²Mù cã mù nya ènu kè mì nyaa kpata, nyè mu jɔ̀ èlã wu mì ò.

³Vɔ̀, mù jro la pò nupo na Mawu ŋusɛ̃kpatatɔa, mù jro la hlùɛ̃ ɖokoe nyè ta.

⁴Mìa ya, ènukãtɔwo ye kpò mì nyi, àjè be àmàdàtɔwo mì nyi.

⁵Ne mì la teŋu bɔ̀nu tètèa! E la nyi ènunya be jèsì!

⁶Mì ɖoto àpe ŋùmèkãnyawo, mì le kònu ɖo ènyà kè mù la sɔ hlùɛ̃ ɖokoe nyèa ŋuti.

⁷Mì la teŋu xɔ̀ ènyà ɖo Mawu ta, to àjè-nyà gbɔ̃gblɔ̃ mèa? Nyàwo mì le wɔ̀ yebe jro kudo àjèɖà-nyàwoa?

⁸Mì lè yebe ènyà ji nyàwoa? Mì nyi Mawu be lɔyàa àlo àmètahlùɛ̃tɔa?

⁹Eye ne e trɔ kpɔ mìabe jìjigbèa, e la nyɔ na mìa? Wo mu blènà Mawu sìgbè lekè wo blènà àgbètɔ nène ò!

¹⁰Ne mì mu lè jɔ̀jɔɛ òa, lè wawla mè ŋutɔ cã a, e la ɖè è fiɔ mì àkòŋùka.

¹¹Yebe ègã nyinyia mu le sò àdìka na mìa? Vɔ̃vɔ̃ kè lè e ŋutia mu la va gɛ̃ jè mìa jia?

¹²Nukpakpla kèwo mè mì tonawo cã mu xɔ̀ àsì ɖe wu àfi ò, eye mìabe susuwo cã flà sìgbè ànyikɔ nène.

¹³Mì bɔ̀nu! Mì tàsi mù ɖɛ! Ènyè ye ɖo la pò nupo fifì. Mi la kpɔ ènu kè la jɔ̀ a.

¹⁴Mù sɔ̀gbè na ɖe sia ɖe, ne e hiã be ma ku ŋutɔ cã.

¹⁵Mawu teŋu wù mù fàa, ènu ɖe mu gbà lè ye mù la hlùɛ̃do na ò. Vɔ̀ mù jro la hlùɛ̃ ɖokoe nyè ta lè Mawu be ŋùkɔ̀.

¹⁶E teŋu va jɔ̀ be wɔ̀nà kèa teŋu hlùɛ̃ mù. Nyàwo, Mawu mu xɔ̀nà àjèɖàtɔ ɖe ɖo e gbɔ ò.

¹⁷Mì ɖoto nyuɛ̃ ɖe sè ènyà kè mù la gblɔ̃a, mì hũ èto ɖo ènyà gɔ̃mè ɖèɖe nyèwo ŋuti.

¹⁸Mì kpɔa, mù jrà ɖokoe nyè be hùɛ̃hlùɛ̃ ɖo, mù nya be mù nyi ɖemànyatɔ.

¹⁹Eŋuã, àmè kɛ ji la dohùɛ do mù ò? Ne àpe ènyà mu jɔ̀ òa, mù sɔ̀gbè la bɔ̀nu kpoo eye ma ku.

²⁰Mawu nyè, na mù ènu èvè pɛɛ, eye nyè mu la wla lè gbɔ wò boo ò:

²¹Jè ŋùkɔ̀a, ɖè àpo àbɔ sɛ̃sɛ̃ kè le kpɛ̃ mù a jo, eye nɔ̀tè vɔ̃vɔ̃ dodo na mù!

²²E yomè a, pò nupo eye mù la ɖo e ŋuti, àlo mù la pò nupo eye wò la ɖo e ŋuti.

²³Àgɔ̀ nène ye mù jè ò, èvuɛ̃ nène ye mù wɔ̀ ò? Ɖè àglajèje kudo èvuɛ̃ nyèwo fiɔ mù.

²⁴Wò le wla àpo ŋùkumè do mù eye wò sɔ mù wɔ̀ àpo kɛ̃tɔ. Nukɛ ŋuti ye ò?

²⁵Àmè kɛ do ye wò pu dù kplɔ̀ ò? Wò kplɔ̀ àmàkpa kè àya nyà le yìa do a? Àmè kɛ ye do wò kplɔ̀ ò? Èbèyɔɛ pupua?

²⁶Wò le ŋlɔ̀ ènyà sɛ̃sɛ̃wo ɖo ŋuti nyè, wò le dà mù ɖo ɖèkajɛmè be àgɔ̀jèje nyèwo be ŋùkɔ̀.

²⁷Wò le do kɔ̀sɔ̀ kɔsɔ àpe àfɔ̀wo, wò le ɖia àpe wɔ̀nawo kpata, wò le le ŋùku ɖo àfɔ̀tope nyèwo ŋuti!

²⁸Eye co, àgbètɔ xòmèa le ɖù sìgbè àti kè nyìnyɔ̀a nène, àlo sìgbè àwù kè le bea nène.