Read gen Yɔb 14 Bible Online

Yɔb 14 - gen bible

Yɔb 14

¹Àgbètɔ kè jɔ̀ lè nyɔ̃nù be àdɔ̀mèa, nɔ̀nà àgbè na gàmè viɖe eye e ɖùnà àyà sùgbɔ.

²E tona sìgbè flawà nène, e yomè a, e yrɔ̀nà. E sina sìgbè vɔ̃vɔ̃lì nène, eye mu nɔ̀nà ànyi kaka yì ò.

³Mawu nyè, e ye wò le ɖiaa! Ènyè ye wò kplɔ̀ le yì kòjo mèa!

⁴Àmè kɛ la teŋu ɖè ènu kɔ̀kɔ̀ɛ ɖe to lè ènu mà-kɔ̀ mà-kɔ mè ò? Àmè ɖekpe mu lè ò.

⁵Wò ɖo lipò na àgbètɔ, wò na hɛ̃hlɛ̃mè yebe wètriwo, eye mu la wu nène ò.

⁶Ɖèkɔ̀ kpɔ àfi bu cã! Na ɛ̀ vòvo, ne bèa vɔ̀ yebe àgbèa lè fàfa mè, sìgbè lekè èdɔwɔ̀tɔ vɔ̀nà yebe ŋùkèkè-dɔa nène.

⁷Ŋùɖo ɖe lè àti ŋuti kòkò: ne wo sò èa, e la gbà teŋu jè eye be la gbà sɛ̃ku fuu.

⁸Ne èkè do xoxo lè ànyigbã mè, eye yebe sòpea wɔ̀ sìgbè ènu kè ku nènea;

⁹e la gbà teŋu jè, ne èsì viɖe kɔ̀ ɖo e jia. E la na àlɔ̀zɛ̃wo sìgbè àti yeye bu nène.

¹⁰Vɔ̀ ne àgbètɔ ɖe kua, àgbè mu gbà va nɔ̀nà e ŋuti ò. Nukɛ ŋùkumè be trɔna ne e jo gbɔ̃gbɔ̃a ɖɛ ò?

¹¹Àpùsi la teŋu pu kpakpla, ètɔ̀ sàsrawo la teŋu mìɔ̃, èsì ɖe mà-ɖo:

¹²Àmè kèwo kua, mu gbà trɔ fɔ̃na ò. Wo mu la fɔ̃ lè woabe àlɔ̃wo mè kaka kè xixea kpɔ̀tɔ̀ lè ò.

¹³Mù ji be wòa wla mù ɖo èkuwode, wla mù ɖo tèpe ɖe kaka àpo àdɔ̀mèzea nu ne va yì. Nène a, wò la gblɔ̃ wàlɛbɛ kè ye wò la va ɖoŋùku ji nyèa.

¹⁴Vɔ̀ àmè kè kua, la gbà teŋu gbɔ̀agbèa? Ne e lè nènea, mù la ɖo ŋùɖo lè èdɔ sɛ̃sɛ̃ nyèa mè, kaka na gà kè mè wo la ɖɔ̀lì mù a.

¹⁵Wò la yɔ mù eye mù la tɔ̀, wò la ji la kpɔ ènyè kè wò ɖoa!

¹⁶Wò mu la gbà le ŋùku ɖo àpe àgɔ̀jèjewo ŋuti ò. Vɔ̀ fifìa, wò le hlɛ̃ àpe àfɔ̀ ɖèɖewo ŋutɔ cã.

¹⁷Wò wla àpe àglajèje ɖo kòtòku mè eye wò tu ì, eye wò sɔ àgɔ̀jèje nyèwo kè.

¹⁸Gãke, èto ɖekpekpe va mùnà, àkpã ɖe cã va ɖɔ̀lìnà tèpe.

¹⁹Èsì teŋu va lìnà èkpewo, èji-si kplɔ̀nà ànyigbã-kɔ yìnà. Nène a ke ye wò crɔ̃na àgbètɔ be ŋùɖo.

²⁰Wò dànà ɛ̀ ɖo ànyigbã eye be buna. Wò trɔna yebe ŋùmè glãsã eye wò ɖona ɛ̀ ɖoɖa.

²¹Ne yebe viwo va xɔ̀ bùbu cã a, mu nyana ɖekpe lè e ŋuti ò. Ne wo ɖì wo ègbɔ cã a, mu nyana ɛ̀ ò.

²²Àgbètɔ la ɖù àyà na ye ŋutɔ ɖokoe kpò, ye ŋutɔ be gbledo kpò be èhùɛ be la jè.