Read gen Yɔb 15 Bible Online

Yɔb 15 - gen bible

Yɔb 15

¹Eye Elifaz so Temà, xɔ̀ ènyà gblɔ̃ na Yɔb be:

²Ènunyatɔ sìgbè èwò nènea, mu nana ɖoŋuti kè mu sɔ̀gbè ò, mu pònà nupo ɖo àya mè kpò ò!

³Wò le hlùɛ̃ ɖokoe wò kudo ènyà kèwo mu ɖo ètù òa, wò le pò nupo vɔ̀, wò mu le gblɔ̃ ènyà ɖekpe ŋutɔ ò.

⁴Gbà wua, wò le crɔ̃ bùbu ɖoɖo na Mawu, wò le gũ kuefã.

⁵Wò le pò nupo nène ɖo wò jè àgɔ̀, eye àpo ènyàwo nyi àjè sɔ̃ŋu.

⁶Wò ŋutɔ àpo ènu ye le gblehùɛ do wò. Ènu kè wò le gblɔ̃a, le sitè ɖo ŋuti wò.

⁷Èwò ye nyi àmè cucugbã kè wo jì lè ànyigbã jia? Wò jɔ̀ jè ŋùkɔ̀ na ètokɔ̃ɛwoa?

⁸Wò nya Mawu be ènu wawlawoa, wò ɖèka kpò ye ɖo ènunyaa?

⁹Ènu kèwo kpata wò nyaa, mia cã mi nya wo, mia cã mi sè, ènu kè gɔ̃mè wò sèa, gɔ̃mè.

¹⁰Àmè sĩsĩ ŋutɔ cã lè mia dòmè, àmè kè sĩ wu ètɔ wòa!

¹¹Wò xɔ̀sè be yè mu hiã Mawu be àsiɖoàkɔ ò, miabe àkɔfa-nyawo òa?

¹²Nukɛ be àdɔ̀mèze ye ò? Nukɛ be ŋùku ye wò le tɛ̃ nène ò?

¹³Nukɛ ŋuti ye wò le pò nupo ɖo Mawu ŋuti ɖo ò? Nukɛ ŋuti ye ènyà kpòtoewo le to so ènumè na wò ò?

¹⁴Nukɛ àgbètɔ nyi, ne bèa susu be yè kɔ̀ peŋu-peŋu ò? Àmè kè nyɔ̃nù jìa la teŋu gblɔ̃ be yè mu ɖo xàxa ɖekpe òa?

¹⁵Mawu mu kãna ɖo yebe àtikplɔtɔwo ŋutɔ cã ji ò, eye lè e gbɔa, jiŋùkusi ŋutɔ cã mu kɔ̀ ò.

¹⁶Nène a, leke mi la gblɔ̃ so àgbètɔ ŋuti ò, e ye kè wo crì eye be gbà ɖùnà èzãnua? E wɔ̀nà èvuɛ̃ bɔ̀bɔɛɖe sìgbè lekè wo nùnà èsìa nène

¹⁷Ɖoto mù, mù jro la fiɔ wò ènu ɖe, mù ji la gblɔ̃ ènu kè mù kpɔa na wò;

¹⁸Mù jro la ma ènunyatɔ be ènukpakpla kudo wò. Wo gblɔ̃nà ènu kè wo xɔ̀ lè woa tɔgbewo gbɔa keŋu.

¹⁹Mawu sɔ ànyigbã na àmè kèawo kpò eye àmèjro ɖe mu va to woa gbɔ ò. Ènufiɔfiɔa ye kè:

²⁰“Àmè bàɖà ɖùnà àyà lè yebe àgbè mè, eye àmènyrãku be àgbè-zã kpòkpòenà.

²¹Ègbè klìkowo ɖìnà lè woabe ètowo mè. Gbevũviwo zrònà jè woa ji, lè ŋuti fàfa blibo be gàmè.

²²Wo mu gbà xɔ̀nàsè be yèwo teŋu to lè èzã mè ò. Àmènyrãkuwo nya nyuɛ̃ ɖe be yèwo la ku èku bàɖà,

²³eye àklàsuwo la va vovo yèwo be ŋutilãwo. Àmènyrãkuwo kãɖo ènu ɖe ji be:

²⁴Ŋùkèkè vuɛ̃wo lè ŋùkɔ̀ gbãnà na yèwo. Gbledo kudo jojoe-cici nana vɔ̃vɔ̃ jènà woa ji sìgbè lekè gbãdãgbãwo xana kɛ̃tɔwo nène eye wo hũhũna tìtìtì.”

²⁵Ènu kè jɔ̀nà ɖo àmè kè ŋlɔ̃kɔ̃ ɖo Mawu jia yeŋu, àmè kè sitè ɖo Ŋusɛ̃kpatatɔa ŋutia yeŋu.

²⁶Àmè kèa do èta gũ le pu dù be yèa yì xa Mawu, kudo àkɔtakpoxɔ̀nu gã kè lè e sia.

²⁷Yebe ŋùmè lè mɔmlɔ̃, e kpɔ lãmè gbà doàmì.

²⁸E xɔ̀ èdùgã kèwo gbãawo, àxue kèwo ci puplu, eye wo le trɔ zũ èglìkpoawo.

²⁹Vɔ̀ mu la teŋu trɔ zũ ècitɔ gbèɖe ò, àlo yebe àdɔ̀kùnɔ̀ mu la teŋu dɔ̃ kaka yì ò, mu la xɔ̀ nyikɔ cã lè èdùa mè ò.

³⁰Mu la teŋu to lè vìvìtia mè ò. E la nɔ̀ sìgbè àti kè be àlɔ̀zɛ̃wo ye èzò fiɔ̃a, eye Mawu be gbɔ̃gbɔ̃ kplɔ̀ ɛ̀ yì booa nène.

³¹Mu la dojì ɖo ànùkua mà-wɔ̀ ŋuti ò. Nyàwo èmɔ̃ bàɖà be nyi, eye e la xɔ̀ yebe fɛ̃tu zɔ̃ ɖo yebe wɔ̀na ji.

³²Ekèa la jɔ̀ gbɔ̀xue be la ku, eye mu la gbà ɖo àlɔ̀zɛ̃ yeye buwo ò.

³³Sìgbè vɛ̃ka nènea, e la hlɛ̃ yebe vɛ̃kpo kèwo mu kpɔ ɖì òa, sìgbè àmìti nènea, e la hlɛ̃ yebe sepòpowo.

³⁴Ɛ̃ɛ, àmè bàɖà trɔna zũ èkònɔ̀. Èzò ye crɔ̃na woabe àxue kèwo mè ènu jro àmèwo keŋu sɔ̀gbè lèa.

³⁵Àmè kè mè èvuɛ̃ lèa, jìnà gbledo. Ènu kè be le bù lè yebe èjì mèa, trɔ flùnà ye ŋutɔ.