Read gen Yɔb 16 Bible Online

Yɔb 16 - gen bible

Yɔb 16

¹Eye Yɔb ɖo e ŋuti be:

²Mù sè ènyà kèawo hati fuu va yì. Sìgbè àsiɖoàkɔnamètɔwo nènea, mì mu sù na ènu ɖe ò,

³mìa àmè kèwo le gblɔ̃ na mù be: “Àpo ènyàwo mu ɖo ètù òa, woa nu la ɖoɖa see zãɖe kèa?” Gbà wua: “Nukɛ ye na wò le ɖù àyà kaka ye wò le ɖo ènyà ŋuti nène ò?”

⁴Ne mì lè tèpe nyèa, nyè cã, mù la teŋu pò nupo sìgbè mìawo ke nène. Mù la hũhũ èta nɔ kò mì.

⁵Mù la pò nupo, do mì ŋusɛ̃ eye mù la pò nupo ètèmàtɔ sɔ ɖiɖi mìabe vève sèse kpɔ̀tɔ̀.

⁶Vɔ̀ ne mù le pò nupoa, vève sèse nyèa mu vɔ̀nà ò, ne mù nɔ̀tèa, mu buna ò.

⁷Eye fifìa, Mawu na ènutìkɔ̀ na mù, e crɔ̃ àmè kèwo kpata trɔdo mù va yìa.

⁸E na àgbàze nyè keŋu dɛ̃ eye mù ɖìkù. Ekèa dohùɛ do mù eye e na mù nyi àmè kè le hɛ̃ ènu kè le jɔ̀ a va.

⁹Mawu trɛ̃ mù lè yebe àdɔ̀mèze mè, e nyà mù ɖo ènu, le ɖù àɖuklui. E le tɛ̃ ŋùku do mù ɖo e nyi àpe kɛ̃tɔ.

¹⁰Àmèwo le pò nupo so ŋuti nyè, wo le gbã ŋùkumè na mù gbà le zũ mù. Wo sitè ɖo ŋuti nyè.

¹¹Ɛ̃ɛ, Mawu do mù àsi na ɖèkajɛ kèwo mu nya ènu ɖekpe òa, e do mù àsi na àmè bàɖàwo.

¹²Mù lè ŋuti fàfa mè sãa, eye Mawu va ŋɛ̃ mù. E le èkɔ̀ na mù eye be crɔ̃ mù. E dà mù yebe àŋùtiwo,

¹³so àgowo kpata ji. E ŋɔ àpe àlì, mà kpɔ ɖo e mè na mù, e na àgò nyè be èsìa ɖùɖù kɔ̀ ɖo ànyigbã

¹⁴E jè e ji nyè sìgbè àhùawɔ̀tɔ nène, e pò mù gbà do àbì ŋuti nyè.

¹⁵Mù lè èfũlòlo mè gà sia gàmè, mù blìbɔ̀nà àfi mè.

¹⁶Mù fã àvi kaka àpe ŋùkuwo bìa, eye ŋùkumè tɛ̃, ci kpɔ̃ na mù.

¹⁷Co, nyè mu jèagla kpɔ ò, mù kpɔ̀tɔ̀ le fãkue kudo èjìmè kɔ̀kɔ̀ɛ.

¹⁸Ànyigbã! Mù gbà nù àpe èhũ kè wo kɔ̀ ɖɛa ò, ne woa kpɔ̀tɔ̀ nɔ sè àpe àpa lelele.

¹⁹So fifìa, mù ɖo ɖàsèfo lè jiŋùkusi, ɛ̃ɛ, mù ɖo àmè kè le ɖù ɖase so ŋuti nyèa lè èji hũi.

²⁰Èxlɔ̃ nyèwo le kò mù, vɔ̀, mù kɔ ŋùku nyè ɖɔ kudo àɖàsìwo yì ji.

²¹Ɖàsèfo nyèa ne nyi ènyàmèsòtɔ lè nyè gbàkudo Mawu dòmè, sìgbè xɔ̀namètɔ nène!

²²Ɛ̃ɛ, e kpɔ̀tɔ̀ gàmè viɖe na mù ne ma sɔ nɔ̀agbè, eye mù jè èmɔ̃ ɖe ji, fikè nyè mu la gbà trɔ va ŋùgbe lè ò.