Read gen Yɔb 17 Bible Online

Yɔb 17 - gen bible

Yɔb 17

¹“Gbɔ̃gbɔ̃ le cipò na mù, eye àgbè nyèa le yì vɔ̀vɔnu. Èyɔ̀do ye le nɔ̀tè kpɔ mù.

²Àmèkòtɔwo trɔ do mù, woabe ègejijiwo na be nyè mu le dɔ̃ àlɔ̃ ò.

³Oò Mawu lɔ̃ jro! Tufɛ̃a ne ma kpɔ vòvo. Àmè kɛ la gbà teŋu lɔ̃, xɔ̀ ŋùkɔ̀ na mù ò?

⁴Nyàwo, wò wù susu na èxlɔ̃ nyèwo, ekèa ŋuti ye wò mu sò ènyà jɔ̀jɔɛ na wo ò.

⁵Wo ɖì àmè kèwo kpe woa xlɔ̃wo na ènuɖùɖu wàlɛbɛ kè woa ŋutɔ be viwo mu kpɔ ɖù òa.

⁶Mù zũ ènu kòkoe na àmèwo eye wo tuna ètã kɔ̀ ɖo ŋùkumè na mù.

⁷Ènuhàha gbã ŋùku na mù eye àmèti nyèa trɔ sìgbè vɔ̃vɔ̃lì nène.

⁸E wɔ̀nà ŋùdã na ànùkuamèwo ne wo kpɔ mùa. Ɖemànyatɔwo dona àdɔ̀mèze ɖo àmè bàɖàwo ŋuti.

⁹Wo gblɔ̃nà be: “Àmè kè le wɔ̀ ɖo Mawu be èjro jia, ne nɔ wɔ̀ ɛ̀! Àmè jɔ̀jɔɛ ne nɔ̀ jɔ̀jɔɛ wɔ̀wɔa ji kpò!”

¹⁰Mìa èxlɔ̃ nyèwo, mì va mìa kpata! Vɔ̀, nyè mu kpɔ ènunyatɔ ɖekpe lè mìa dòmè ò!

¹¹Àgbè nyèa vɔ̀. Àpe tamèsusu kudo ŋùɖowo bu keŋu-keŋu.

¹²Èxlɔ̃ nyèwo na àmèwo xɔ̀nàsè be èzã nyi ŋùkèkè, eye fɔ̃fɔ̃mè be kɔ̀kɔ̀ɛa gogo. Co vìvìti cicria mè wo kpɔ̀tɔ̀ lè.

¹³Nukɛ mù la teŋu nɔ̀tè kpɔ ò? Tèpe lè èkuwode, àba kè ji mù la mlɔ̃ lè yebe vìvìtia mè.

¹⁴Mù le do àpa na èyɔ̀do be: “Wò nyi ètɔ nyè!” Na ɖiɖɔɛa, mù gblɔ̃ be: “Wò nyi ènɔ̀ nyè gbà nyi dàda nyè!”

¹⁵Fikɛ ŋùɖo nyèa lè ò? Àmè kɛ ye kè ɖo nyɔna nyèa ŋuti ò?

¹⁶E le yì èkuwode kudo mù, mi kudo è ye le yì èyɔ̀ mè lè ɖiɖɔɛ mè.”