Read gen Yɔb 19 Bible Online

Yɔb 19 - gen bible

Yɔb 19

¹Eye Yɔb ɖo e ŋuti na yebe èxlɔ̃wo be:

²“Mì la nɔ do àyà na mù kaka va na gà kɛ mè ò? Kaka va na gà kɛ mè ye mìabe ènyàwo la crɔ̃ mù sù ò?

³Mì zũ mù dokpò. Èŋù mu le kpɛ̃ mì be mì le do vevesèse na mù a?

⁴Mì gblɔ̃ be mù blè ɖokoe nyè. Ne e gbà nyi nyàwo cã a, e kã mù.

⁵E lè e mè na mì be nyè ŋutɔ ye ji ènu kè le jɔ̀ ɖo ji nyèa eye nènea mìabe ènyà la jɔ̀.

⁶Co, mì ɖo la nya be Mawu ye wɔ̀ màjɔ̀ màjɔ kudo mù, eye e na mù jè yebe èmɔ̃ mè.

⁷Mù teŋu do àpa ɖo ènu kè le wɔ̀ mù a ŋuti, vɔ̀ ɖoŋuti ɖekpe mu lè ò. Mù biɔ àlɔ̀do, vɔ̀ àmè ɖe mu lè la sò jɔ̀jɔɛ na mù ò.

⁸Mawu xe èmɔ̃ na mù ne nyè mu gbà va yì ò, e gble mù ɖo vìvìti mè.

⁹E ɖè bùbu nyèa jo, e xɔ̀ ènu kè dona jìjɔɛ na mù a.

¹⁰E gbã mù gudu-gudu, àfɔ̀ nyè lè èyɔ̀ mè vɔ̀. E ɖè àpe ŋùɖo sìgbè lekè wo hɔ̃nà àti be èkè nène;

¹¹E le bijì veku-veku ɖo ŋuti nyè, e sɔ mù sɔ wɔ̀ yebe kɛ̃tɔ.

¹²Yebe ènu gbletɔwo to èmɔ̃ vòvòvòwo va jòo, wo va sò àsàɖa ɖo àxàda mè na mù ne woa teŋu va xa mù.

¹³Mawu na xòmè nyèa tè yì ŋùgbe lè ŋuti nyè. Àmè kè jèsi mù a cã, zɛ̃ na mù.

¹⁴Àxuekɔ̀tɔ nyèwo kãhlɛ̃, eye èxlɔ̃ nyèwo ŋlɔ̀be mù.

¹⁵Àmè kèwo mù kpea kudo sumɔ̃vi nyèwo le kpɔ mù ɖo àmèjro bònu. Mù trɔ zũ èfũɖènamètɔ na wo.

¹⁶Ne mù yɔ sumɔ̃vi nyèa, mu tɔ̀nà ò, ne mù gbà ɖè kuku na ɛ̀ cã.

¹⁷Àpe hɔ̃xuɛ̃ mu gbà le jè e ji na èsrɔ̃ nyè ò, eye àpe ènu to lè ŋùku mè na nɔ̀vi nyèwo ŋutɔ cã.

¹⁸Ɖèvi vifɛ̃wo cã crì mù. Ne mù le pò nupoa, wo kònà mù.

¹⁹Èxlɔ̃ nyè àdodoewo crì mù, àmè kèwo mù lɔ̃nàa, wo cã trɔ ɖo ŋuti nyè.

²⁰Mù ɖìkù glãyò, kpɔ̀tɔ̀ èpu ɖèɖe eye gbɔ̃gbɔ̃ kpò ye le mù ɖotè.

²¹Mì ku ŋuzĩzĩ na mù jro mìa èxlɔ̃ nyèwo. Ɛ̃ɛ, Mawu be àlɔ̀ ye pò mù!

²²Mì le do àyà na mù sìgbè Mawu ke nène. Nukɛ ŋuti ò? Ènu mu tìkɔ̀ na mì ɖo ŋuti nyèa?

²³Mù jro be woa ŋlɔ̀ ènyà nyèwo ɖɛ, ɖo xoma mè dà ɖɛ.

²⁴Ne wo la teŋu ta wo ɖo àkpã mè ɖɛa, e la kè nyɔ; wo la wɔ̀ wo kudo èpɛ kudo suŋubui be plɛ̃gò.

²⁵Mù nya nyuɛ̃ ɖe be ènyàxɔ̀namètɔ nyèa lè àgbè, eye lè vɔ̀vɔnua, e la sitè lè ànyigbã ji.

²⁶Wàlɛbɛ kè àgbàze nyè la crɔ̃ vɔ̀a, nyè ŋutɔ, mù la kpɔ Mawu àgbãŋùgbà.

²⁷Ɛ̃ɛ mù la kpɔ ɛ̀ kudo àpe ŋùkuviwo, nyè ŋutɔ ye la kpɔ ɛ̀ mu nyi àmè bu ò. Hùe ŋua nu ne va kaba! Nyè mu teŋu le dojì ò.

²⁸Mì la teŋu biɔ be: “Nukɛ mè ye wo teŋu le Yɔb lè ò? Ènyà kɛ mi la teŋu sɔ ɖo e ŋuti ò?”

²⁹Ɛ̃ɛ! Vɔ̃vɔ̃ ne jè mìa ji, mì la ku lè èwui nu. Nyàwo, èku ye jè na mì àmè kèwo ye le tĩ yo nyè mè lekea. Mì ɖo la nya be Mawu ye la ɖokòjo kudo mì.