Read gen Yɔb 21 Bible Online

Yɔb 21 - gen bible

Yɔb 21

¹Yɔb ɖo e ŋuti na èxlɔ̃awo be:

²“Mì ɖoto ènyà kè mù le ji la gblɔ̃a nyuɛ̃ ɖe, nène ye mì la do bàbà na mù.

³Mì na ne nyè cã ma pò nupo jro. Sofà, ne mù bɔ̀nu vɔ̀a, wò teŋu kò mù fàa.

⁴Àmè ɖe ye mù le jèhùɛ na a? Mù le ciji gbalo ye à?

⁵Mì kpɔ mù nyuɛ̃ ɖe: e la wɔ̀ ŋùdã na mì, eye mì la do àlɔ̀vi ènu mè, la bɔ̀nu kpoo.

⁶Vɔ̃vɔ̃ ye le ɖo mù kè mù le bù ènu kè le wɔ̀ mù a ŋuti kpɔa eye mù le hũhũ tìtìtì.

⁷Nukɛ ŋuti ŋutɔ ye àmè bàɖà kpò ye nɔ̀nà àgbè dìdi ò? Nukɛ ŋuti ŋusɛ̃ gbà kpɔ̀tɔ̀ nɔ̀nà e ŋuti ne e le sĩ cã ò?

⁸Èviawo cã kãna ɖo e ji, tɔgbe-yɔviawo sĩnà lè yebe àkɔ mè.

⁹Ènu sia ènu zɔ̃nà sùu na ɛ̀, vɔ̃vɔ̃ ɖe mu lè ò eye Mawu mu pònà ɛ̀ gbèɖe ò.

¹⁰Yebe ènyì-suwo dona-àsu sɔ nana àgbè godoo, yebe ènyìnɔwo jìnà èvi ɖo gàmè eye ɖekpe mu kuna ò;

¹¹E nana yebe ɖèkajɛviwo puna èdù, tìnàkpo sìgbè ègbɔviwo nène, eye yebe tɔgbeyɔviwo gblena lè vòvo fɛ̀ɖɛ̀ mè.

¹²Wo jìnà èhà, pònà àsihũvi kudo kàsãŋùgu, wo ɖunawè ɖo èkpɛ̃ be ɖìɖi ji,

¹³Woabe àgbèa nyina nyɔna ɖèɖe, wo yìnà èkuwode lè ŋuti fàfa mè.

¹⁴Co wo gblɔ̃nà na Mawu be: “Tàsi mi ne mia vò, mu hiã be mia nya ènu kè wò le ji ò!

¹⁵Èwò kè wo yɔna be Ŋusɛ̃kpatatɔa, nukɛ ye wò nyi ne mia trɔ zũ àpo kluviwo ò? Àlè kɛ ye mi la kpɔ xɔ̀ ne mi le fãkue na wò ò?

¹⁶Nyàwo, àmè ŋuawo mu ɖo ŋusɛ̃ ɖekpe ɖo woabe nyɔna ji ò. Mawu mu gbà jro ne ma do àfɔ̀ woabe àfɔ̀dowo mè ò!

¹⁷Vɔ̀, woabe àgbè kãligbɛ̃ a cã cina kplò ha ɖèkaa? Vlàvò ye gbledo vana woa ji eye Mawu be àdɔ̀mèzea cã gblena woabe ènuwo.

¹⁸Woa cã wo nɔ̀nà sìgbè èbèyɔɛ kè àya le kplɔ̀ le yìa nène, sìgbè àmàkpa pupu kè àya sɛ̃sɛ̃ lɔ ɖo ènu le yìa nènea?

¹⁹Vɔ̀, mì le gblɔ̃ be: “Mawu dɔ̃nàto na àmè ŋuawo to woabe èviwo ji.” Woa ŋutɔwo ye be ɖo la dɔ̃to na eye wo la sè e mè!

²⁰E jè be àmè bàɖà ŋutɔ ne kpɔ yebe gbledo, ne ɖɔ Ŋusɛ̃kpatatɔa be àdɔ̀mèzea kpɔ!

²¹Nyàwo, ne e kua, ne yebe èpèwo nu va yìa, èviawo be àgbè mu la gbà wɔ̀ ènu ɖe na ɛ̀ ò.

²²Vɔ̀ àmè ɖe la teŋu yì fiɔ ènu kè jèa Mawu a? Mawu mu ɖona kòjo kudo yebe àtikplɔtɔwo ŋutɔ cã a?

²³Ŋusɛ̃ gbà nɔ̀nà àmè ɖewo ŋuti gbɔ̀xue wo kuna. Nyɔna mè ye wo nɔ̀ eye ènu ɖe mu jɔ̀ ɖo woa ji va yì ò.

²⁴Wo lòlò, do àmì, àgbè gbà lè woa mè.

²⁵Àmè ɖewo kuna kudo vevesèse, kè wo mu ɖɔ nyɔna ɖe kpɔ òa.

²⁶Woa kpata wo yì ànyigbã mè eye èŋɔviwo la ɖù wo.

²⁷Ɛ̃ɛ, mù nya ènu kè mì le susua kudo ènu kè lè ètago mè na mì ɖo ŋuti nyèa.

²⁸Mì le gblɔ̃ be: “Fikɛ ènudrãwɔ̀tɔa be nɔ̀pea lè ò? Eye àmè bàɖà be àxuea ɖe? Ɖekpe mu lè ò!”

²⁹Vɔ̀, mì mu biɔ ènyà èmɔ̃zɔ̃tɔwoa? Mì mu la xɔ̀ woabe ènyà ŋuti ɖoɖo a ji sèa?

³⁰Ne gbledo vaa, mu jènà àmè bàɖà ji ò, Mawu be àdɔ̀mèze mu kɔ̀nà ɖo e ji cã ò.

³¹Àmè kɛ ye la teŋu yì nɔ̀tè lè ŋùkɔ̀ na ɛ̀, la hɛ̃nyà kudo è ò? Àmè kɛ ye teŋu tu ènu kè be wɔ̀a be èfɛ̃ na ɛ̀ ò?

³²Ne àmè kèa kua, wo la yì dà ɛ̀ ɖo àmèɖìbɔmè. Wo ɖiana yebe èyɔ̀doa,

³³eye ànyigbã bɔ̀bɔ̀nà na ɛ̀. Àmè buwo la gbà jè e yomè. Àmè kèwo jè ŋùkɔ̀ na ɛ̀a, wo sùgbɔ fuu;

³⁴Àsìxɔ̀xɔ kɛ ye lè mìabe bàbà do na àmèawo si ò? Mìabe ènyà ɖoŋutiwo nyi àjè sɔ̃ŋu!”