Read gen Yɔb 22 Bible Online

Yɔb 22 - gen bible

Yɔb 22

¹Eye Elifaz so Temà sɔ ènyà gblɔ̃ na Yɔb be:

²Àgbètɔ ɖe teŋu ɖo àsìxɔ̀xɔ na Mawu a? Ye ŋutɔ kpò be ɖo àsìxɔ̀xɔ na ne e nyi be e le zɔ̃ lè ènunya mèa.

³Vɔ̀ àlè kɛ ye lè àpo ètonu sèse mè na Ŋusɛ̃kpatatɔa ò?

⁴Lè gbɔ wɔ̀a ɖe, ne e dɔ̃to na wò, ne e ɖo kòjo na wòa, eŋuã wò le ègbèji na ɛ̀ ye à?

⁵Kpao, ènu bàɖà gbogbo kèwo wò wɔ̀a ŋuti bòhũ ye. Èvuɛ̃ kèwo wo mu la teŋu hlɛ̃ òa.

⁶Lè kpɔwɛ mèa, wò biɔ nyɔna na nɔ̀vi wòwo mà-ɖo gɔ̃mè sèse sìgbè àwòba na woabe èfɛ̃wo, eye wò zĩ àwù ɖèka kè lè woa sia ji.

⁷Wò mu na èsì àmè kè èsìkɔ le tìa ò, wò mu na ènu ɖùɖu àmè kè àdɔ̀ le wùa ò.

⁸Vɔ̀ wò tàsi ŋusɛ̃tɔwo hlà àmèwo be ànyigbãwo, eye ègòyitɔwo yì sò àxue ɖo funu.

⁹Wò ɖo àhòsìwo ɖoɖa àgba eye wò tɛ cɔɛviwo ɖoto.

¹⁰Ènu kèawo ŋuti ye sukpa be èmɔ̃wo trɔdo wò ɖo, eye wò le vɔ̃, ci jojojoe.

¹¹Èzã do do wò, wò mu gbà le kpɔ ènu ɖe ò, wò nyrɔ̃ ɖo gbledo mè.

¹²Mawu lè èji boo lè jiŋùkusi. Kpɔ wètriviwo boo ɖa!

¹³Nène wò gblɔ̃ be: “Nukɛ Mawu la teŋu nya ò? E la teŋu ɖo kòjo na mi to lilikpowo mèa?

¹⁴Wo lè na ɛ̀ sìgbè ŋùmèxenu tìtri ɖe nène. Mawu mu kpɔna ènu ɖe ne e le ɖìsà trɔdo jiŋùkusi ò.”

¹⁵Wò kpɔ̀tɔ̀ le ji la nɔ̀ èmɔ̃ xoxo wòa ji, èmɔ̃ kèwo ji àmè bàɖàwo le toa?

¹⁶Wo crɔ̃ jè ŋùkɔ̀ na àzãa, sìgbè èglìkpo kè ye èsì sàsra kplɔ̀ le yìa nène.

¹⁷Àmè kèawo gblɔ̃nà be: “Mawu ne tàsi mi ne mia vò! E nyi Ŋusɛ̃kpatatɔ, vɔ̀ mu la teŋu wɔ̀ ènu ɖekpe na mi ò!”

¹⁸Co vɔ̀a, e ye na woabe àxuewo ɖɔ kudo àdɔ̀kùnuwo. Vɔ̀, mu jro mù be ma srɔ̃ wo ò.

¹⁹Ne wo le kpɔ ènu kè le jɔ̀ ɖo àmè bàɖàwo jia, àmè kèwo le wɔ̀ ɖo Mawu be èse jia, kpɔna jìjɔɛ, eye ɖemànyatɔwo kònà wo.

²⁰Wo gblɔ̃nà be: “Miabe kɛ̃tɔwo ye le crɔ̃, èzò le fiɔ̃ woabe ènuwo!”

²¹Eŋuã, wɔ̀ ŋuti fàfa kudo Mawu, eye ènu sia ènu la zɔ̃ sùu. Wò la gbà kè ɖo nyɔna ŋuti.

²²Lɔ̃ xɔ̀ ènu kè Mawu le fiɔ wòa, eye nlɔ̀ yebe ènyàwo ɖo àpo èjì mè.

²³Ne wò trɔ va Ŋusɛ̃kpatatɔa gbɔa, e la trɔ àpo nyɔna na wò. Si jo lè ènu bàɖà wɔ̀wɔ gbɔ.

²⁴Ɖɔ̀lì sìka wòa kɔ̀ ɖo ànyigbã àlo gble àdɔ̀kùnu wòa ɖo ètɔ̀ be èkpewo mè

²⁵Ŋusɛ̃kpatatɔa la nyi sìka ku klòsalò be ètowo na wò.

²⁶Nène a, wò la trɔ kpɔ jìjɔɛ lè Mawu Ŋusɛ̃kpatatɔa gbɔ eye wò la nɔ kpɔ ɛ̀ ku kãkãɖoji.

²⁷Ne wò fã yɔ ɛ̀a, e la sè àpo ègbè, eye wò la teŋu wɔ̀ ènu kè be ègbè wò ɖo na ɛ̀a fàa.

²⁸Ènu kèwo kpata la jro wò be yèa wɔ̀awo la zɔ̃ sùu, eye èmɔ̃ wòa ji la zìɔ̃ ploplo.

²⁹Ɛ̃ɛ, Mawu crɔ̃na ègòyitɔwo be susuwo, vɔ̀ e nana àmè gbɔjɔwo be susuwo zɔ̃nà sùu.

³⁰E ɖènà èvuɛ̃ lè ɖemànyatɔwo be ŋùkɔ̀. Eŋuã, zã èdɛ̃ nyuɛ̃ ne wòa vò.