Read gen Yɔb 23 Bible Online

Yɔb 23 - gen bible

Yɔb 23

¹Nène a, Yɔb ɖo e ŋuti be:

²Mù kpɔ̀tɔ̀ le bijì do Mawu ŋutɔ eye mù lè hùɛdodo nyèa ji. Co gbledo kè Mawu dà ɖo èji nyèa lòlò wu hùɛdodo nyèa.

³Mù jro la nya Mawu be nɔ̀pe! Mù la yì kaka fikè be nɔ̀nàa!

⁴Mù la yì hlùɛ̃ ɖokoe nyè lè ŋùkɔ̀ na ɛ̀, mù ɖo ènyà sùgbɔ la biɔ ɛ̀.

⁵Mù la sè yebe ɖoŋutiawo mù la sè yebe ènyàwo mè.

⁶E la tìkpo jè èji nyè zè ɖèkaa? Ào, e la ɖoto sè ènyà nyèa kudo àdòdò.

⁷Mawu la do jèsi ènu ɖèka be: Àmè kè le hɛ̃ ènyà kudo yèa, lè jɔ̀jɔɛ. Eye e ye kè nyi kòjoɖotɔ nyèa, la sò jɔ̀jɔɛ na mù zè ɖèka.

⁸Vɔ̀, ne mù yì èwèzɛ̃pea, Mawu mu lè funu ò. Ne mù yì èwèɖoxɔ̀pea, nyè mu le kpɔ ɛ̀ ò.

⁹E le wɔ̀ ènu veve ɖe lè èvègo ye à? Nyè mu le kpɔ ɛ̀ ò. Ne mù trɔ va àpùgoa, nyè mu kènà ɖo e ŋuti cã ò.

¹⁰Co, e nya èmɔ̃ kè mù le sɔa nyuɛ̃ ɖe. Ne e na mù le to àyàɖùɖu be èzò mèa, mù la to e mè la kɔ̀ peŋu-peŋu sìgbè sìka nène.

¹¹Mù zɔ̃ lè yebe èmɔ̃a ji nyuɛ̃ ɖe, mù nɔ̀ e yomè kpò mà trã èmɔ̃.

¹²Nyè mu dà lè yebe ègbè do àsiwo ji ò, mù le yebe ɖoɖowo kpata ɖo èjì mè.

¹³Vɔ̀ e ye la ɖè ègbè. Àmè kɛ la teŋu na be la trɔ ènu kè be ɖoa ò? Ènu kè e jro a ye be wɔ̀nà.

¹⁴E la wɔ̀ ènu kè be ɖo ɖo ŋuti nyèa kaka yì vɔ̀vɔnu, eye susu buwo gbà lè e si sìgbè ekèawo ke nène.

¹⁵Ekèa ŋuti vɔ̃vɔ̃ gã ɖe jè e ji nyè lè ŋùkɔ̀ na ɛ̀. Mù kpɔ̀tɔ̀ le vɔ̃ ne mù le bù e ŋutia.

¹⁶Mawu le gbɔjɔ mù, Ŋusɛ̃kpatatɔa na mù le hũhũ ku vɔ̃vɔ̃.

¹⁷Co, èzã do do mù, vìvìti trɔdo mù co, nyè mu bɔ̀nu ò.