Read gen Yɔb 24 Bible Online

Yɔb 24 - gen bible

Yɔb 24

¹Nukɛ ŋuti Ŋusɛ̃kpatatɔa mu ɖo kòjo ɖoɖo zã ò? Nène a, yebe ànùkuamèwo la kpɔ ɛ̀ lè yebe dɔwɔ̀wɔ mè.

²Vɔ̀a ɖe, àmè bàɖàwo dɔ̃nà woabe lipòwo yì ŋùkɔ̀, wo fĩnà àmèwo be èlãha, eye wo trɔna zũ àlɛ̃kplɔ̀tɔwo.

³Wo gbĩnà cɔɛviwo be èsɔàkɛtɛ, wo xɔ̀nà àhòsìwo be ènyì na àwòba ɖo èfɛ̃ be tèpe.

⁴Wo nyànà ènuwɔ̀donɔ̀wo do ègbe. Wɔ̀amènɔ̀wo mu kpɔna nɔ̀pe lè woa gbɔ ò.

⁵Wɔ̀amènɔ̀wo fɔ̃na èzã sìgbè zògbè be èsɔàkɛtɛwo nène yìnà woabe èdɔwo gbe. Wo yì sãnà lè àgblèwo ji sɔ jina ènuɖùɖu na woabe èviwo.

⁶Wo ɖo la yì ji ègbe lè àgblè mè, eye wo ɖo la yì yà àmè bàɖà be vɛ̃kusɛ̃sɛ̃wo.

⁷Wo lè àma, àwù mà do lè èzã gã mè, kùŋùtu tètè mu lè na wo lè àvìvɔ hùenu ò.

⁸Ètowo be èjisi pònà wo fana tɔtɔtɔ. Nɔ̀pe mu lè woa si ò eye wo yì tɛna ɖo àkpãdowo mè.

⁹Àmè bàɖàwo xɔ̀nà tɔcɔɛvi lè ènɔa be ànɔ nu. Wo lɔ̃nà wɔ̀amènɔ̀wo be àwòbanuwo xɔ̀xɔ.

¹⁰Wo ɖè wo ɖo àma lè àgũ dòmè, àwù mà do. Wo dona àgbã na wo, co ènu ɖe màɖù.

¹¹Woawo ye fiɔ̃na àmì ku sɛ̃sɛ̃. Wo ɖànà vɛ̃, vɔ̀ wo mu kpɔ èmɔ̃ la nù ì ò.

¹²Àmèwo le dohùɛ lè èdùa mè, àmè kèwo xɔ̀ àbìawo le ŋɛ̃ eye wo le biɔ àlɔ̀do. Eye Mawu mu le sè ènu jiŋɔ kèawo ò.

¹³Ènudrãwɔ̀tɔwo mu jina kɔ̀kɔ̀ɛ ò, wo mu nya yebe èmɔ̃ kaka la va tètè gogo ò.

¹⁴Èzã èzã ye àmèwùtɔ zɔ̃nà, e wùnà wɔ̀amènɔ̀, ènuwɔ̀donɔ̀, eye e fĩnà àmèwo lè èzã gã dòmè.

¹⁵Ŋusù kè le blè èsrɔ̃a, le nɔ̀tè kpɔ fìɛ̃si mè. E gblɔ̃nà be: 'Àmè ɖe mu le kpɔ mù ò'. Eye e sɔna ènu cɔ̃ ŋùmè be yè le wla yè ɖokoe.

¹⁶Èzã gã dòmè ye fìãfĩ yì jina àmè kpɔ. Dɔ̃ŋùkusu mèa, e tuna ye ɖokoe ɖo xɔ̀mè eye mu kpɔna kɔ̀kɔ̀ɛ ò.

¹⁷Èzã be ènu jiŋɔ kèawo kpata ma do àmè kèawo. Nène a, ŋùdekɛ̃nyɛ nyina gàmè kè mè cɔ̃a na wo.

¹⁸Vɔ̀ mìa ya mì le gblɔ̃ be: “Èsì kplɔ̀nà wo kaba ɖo ènu yìnà. Àmèwo sɛ̃nakpɛ̃ na woabe àdɔ̀kùnuwo, eye wo mu gbà yì wɔ̀nà èdɔ lè woabe àgblè mè ò.

¹⁹Àmè kèwo wɔ̀ ènu bàɖàwo buna ɖo èkuwode sìgbè lekè èsìkpe srènà lè dɔ̃ŋùkusu gbèa nène.

²⁰Woa nɔ̀wo cã ŋlɔ̀nàbe wo, eye èŋɔvi ɖùnà wo ku jìjɔɛ. Àmè ɖe mu gbà ɖona ŋùku woa ji gbèɖe ò, eye woabe ènu bàɖà la ŋɛ̃ sìgbè àti pupu kè ŋɛ̃a nène.

²¹Wo do àyà na nyɔ̃nù kèwo mu la teŋu jì èvi òa, àlo wo sɛ̃ ètamè do àhòsìwo.

²²Vɔ̀ Mawu ɖo ŋusɛ̃ ŋutɔ ne bèa nyà àmè nyrãkuwo. Ne Mawu bijìa, wo nya be yèwo mu la teŋu gbà nɔ̀ àgbè ò.

²³Co, e na wo èmɔ̃ ne woa teŋu xɔ̀sè be yèwo lè tomè fàfa mè, vɔ̀, e le le ŋùku ɖo woabe àgbènɔ̀nɔ ŋuti.

²⁴Àmè bàɖàwo klɛ̃na na gàmè kpòeɖe, e yomè a wo buna gbidi. Wo jènà ànyi sìgbè àti kè wo sòa nène, wo puna sìgbè èbli kè wo yàa nène.”

²⁵Àjè ye à? Àmè kɛ ye la teŋu do mù àjèɖàtɔ ò? Àmè kɛ ye la teŋu tutu ènu kè mù gblɔ̃a ò?