Read gen Yɔb 26 Bible Online

Yɔb 26 - gen bible

Yɔb 26

¹Eye Yɔb ɖo e ŋuti na Bildàd be:

²Wò nya àlekè wo dona àlɔ̀ àmè kè gbɔjɔa ŋutɔ, àmè kè si ŋusɛ̃ ɖekpe mu gbà lè òa!

³Wò nya àlekè wo ɖona àɖàŋù na àmè kè mu ɖo ènunya òa, eye wò kãkãnà ènunya wòa ɖo àfi sia àfi.

⁴Vɔ̀ àmè kɛ ye wò le gblɔ̃ ènyà ŋuawo na ò? Àmè kɛ ye ɖè yebe èkpa na wò ò?

⁵Àmè kuku kèwo lè àpù gɔ̃mè kudo àpù mèawo kpata hũhũna ku vɔ̃vɔ̃.

⁶Nyàwo, ènu ɖe mu lè wawla mè lè èkuwode do Mawu ò, eye ŋùmèxenu ɖe mu wla ɛ̀ do è ò.

⁷Mawu ŋutɔ ye vlũ xixea be èvègo ɖo àya mè, na ànyigbã nɔ̀ ànyi ɖo ènu puplu ji.

⁸E wla èjisi ɖo lilikpowo mè, eye liliawo mu zɛ̃nà ɖo yebe kpɛ̃kpɛ̃ ŋuti ò.

⁹E cɔ̃ yebe fìɔzìkpea be ŋùmè, eye e dɔ̃ lilikpowo cɔ̃ ɛ̀.

¹⁰E zɛ̃ hùɛ̃ màhuã-màhuã ɖo àpù be ŋùmè, funu ye kɔ̀kɔ̀ɛ nana èmɔ̃ èzã lè.

¹¹Ne Mawu le do vɔ̃vɔ̃a, xixea be sɔtiwo hũhũna, eye vɔ̃vɔ̃ jènà xixea ji.

¹²To yebe ŋusɛ̃ jia, Mawu ɖù àpù ji, to yebe ènunya jia, e ɖiki màmiwàta[1]

¹³Yebe àya gbɔ̃gbɔ̃ kplɔ̀ xixea mè, yebe àlɔ̀ wɔ̀ èdã gã, ànyiɖohùɛɖo.

¹⁴Ekèa kpata nyi ègòta be ènu na yebe wɔ̀nawo, eye ŋɛ̃ŋɛ̃ viɖe kpò ye mi sènà. Vɔ̀ àmè kɛ ye la teŋu sè yebe ènu jɔ̀ àsuwo be gbèɖèɖe gɔ̃mè ò?