Read gen Yɔb 27 Bible Online

Yɔb 27 - gen bible

Yɔb 27

¹Yɔb yì yebe ènyà ji gblɔ̃ be:

²Mù le tànu lè Mawu àgbè-àgbè kè mu le ji la sò jɔ̀jɔɛ na mù ò, lè Ŋusɛ̃kpatatɔ kè na àpe èjì le sè vevea be nyikɔ mè be:

³Kaka kè mù kpɔ̀tɔ̀ le gbɔ̃a, kaka kè Mawu be gbɔ̃gbɔ̃ gbà lè ètù mè na mù a,

⁴nyè mu la gblɔ̃ àjè-nya ɖekpe ò, ènu nyè mu la ɖà àjè ò.

⁵Nyè mu la lɔ̃ gbèɖe be mìabe ènyà jɔ̀ ò! Mù la kpɔ̀tɔ̀ nɔ gblɔ̃ be mù nyi ɖemànyatɔ kaka sɔ èta yì èyɔ̀ mè.

⁶Mù le tɛgbè ɖo e ji ku ŋusɛ̃ be wɔ̀na nyèa sɔ̀gbè, eye nyè mu la gbà gblɔ̃ èbu gbèɖe ò. Àgbè nyè mu le wɔ̀ ŋùkpɛ̃ na mù ò, jìjigbè nyè mu le dohùɛ ɖe do mù ò.

⁷Kɛ̃tɔ nyè ye wo ɖo la wɔ̀ kudo sìgbè àmè bàɖà nène! Àmè kè sitè ɖo ŋuti nyèa ye ɖo la vɔ̃ sìgbè ènu bàɖàwɔ̀tɔ nène!

⁸Nyàwo, ŋùɖo kɛ ye gbà lè àmè bàɖà si wàlɛbɛ kè Mawu sò, àlo ɖè yebe àgbè kaa jo ò?

⁹Mawu sènà yebe àpa dodo ne gbledo cɔ̃ ɛ̀ vĩ ìa?

¹⁰E kpɔna jìjɔɛ lè Ŋusɛ̃kpatatɔ mèa? E dona àpa yɔ ɛ̀ gà sia gàmèa? Nyè mu xɔ̀ ɛ̀ sè ò!

¹¹Nyè ya mù la fiɔ mì lekè Mawu wɔ̀nà ɖoa, nyè mu le wla ènu kè be bùnà kpɔ lè ye ɖokoe mè kèa, do mì ò.

¹²Mìa ŋutɔ mì kpɔ ɛ̀ ku ŋùkuwo. Nène a, nukɛ be ènyà ye gbà nyi gbogbo ŋua ò?

¹³Ènu kè Mawu jràɖo dàɖɛ na àmè bàɖàwo, àkpa kè ye ènudrãwɔ̀tɔwo la xɔ̀ so Ŋusɛ̃kpatatɔa gbɔa, ye nyi èku.

¹⁴Ne wo jì èvi sùgbɔa, wo la ku ci àhùa, eye woabe èviwo mu la kpɔ ènu ɖekpe la ɖù ò.

¹⁵Àmè kèwo la kpɔ̀tɔ̀ ci àgbèa, èdɔ̀ vuɛ̃ la kplɔ̀ wo yì èyɔ̀ mè. Eye woabe àhòsìwo mu la teŋu fã woabe àvi ò.

¹⁶Ne e bɔ̀ ègà ɖɛ sìgbè ɖiɖɔɛ nène, eye be bɔ̀ àwùwo ɖɛ sìgbè bàba nène cã a;

¹⁷ne yì e ji kpò! Ànùkuamè ɖe ye la va do àwùawo, ɖemànyatɔ ye la va zã ègàa.

¹⁸Àmè bàɖàwo be àxue mu linakè ò, e nɔ̀nà sìgbè èzãɖiatɔ be àgbàdo nène.

¹⁹Wo mlɔ̃na ècitɔ be ànyi na memlɛ̃a, ɖo ne wo va fɔ̃a, ènu ɖekpe mu gbà nɔ̀nà ànyi ò.

²⁰Vɔ̃vɔ̃ sònà wo do sìgbè èsì kè gbãgoa nène. Lè èzã mèa, èsì ɖɔɖɔ kplɔ̀nà wo yìnà.

²¹Àya sɛ̃ŋu ɖe sɔna wo ɖonu kplɔ̀nà wo yì boo, e ɖènà wo jo lè woabe àxuewo mè.

²²Mawu dànà yebe àŋùti àmè bàɖàwo ŋùgbe màkpɔ. Wo ɖo la si lè yebe àlɔ̀ sɛ̃ŋua be ŋùkɔ̀.

²³Àsikpe wo la pò ɖo woabe cɔ̃crɔ̃a ŋuti. Àkui lìɔliɔ ye kplɔ̀nà wo do lè fikè wo toa.