Read gen Yɔb 28 Bible Online

Yɔb 28 - gen bible

Yɔb 28

¹Nyàwo ye, klòsalò be èkɔ̃wo lè, eye sìka klɔpewo cã lè.

²Ànyigbã mè ye wo ɖènà gàkpo lè eye, èkpewo ye wo srènà sɔ wɔ̀nà gàjɛ̃.

³Ànyigbã mè be ènujitɔwo hɛ̃nà kɔ̀kɔ̀ɛ yìnà ànyigbã gɔ̃mè. Wo yì jina ànyigbã mè be àdɔ̀kùnuwo kito-kito, lè gòglòpe cicriwo.

⁴Wo kùnà ànyigbã lè tèpe kèwo mu gogo àxue gbɔ òa. Lè fikè àmè be àfɔ̀ sònà lèa, ànyigbã mè be ènujitɔwo nɔ̀nà èkàwo ŋuti yìnà gbɔ̀nà.

⁵Ènuɖùɖu sona ànyigbã mè, vɔ̀, sìgbè pòdomè nènea, e titɔ kudo èzò bìnuwo.

⁶Sàfirò-kpe lè yebe èkpewo mè, yebe ɖiɖɔɛ mè ye wo ɖènà sìka lè.

⁷Èhɔ̃ mu nyana èmɔ̃ ŋua lè ànyigbã gɔ̃mè ò, xèvi gãgãwo cã mu kpɔ wo kpɔ ò.

⁸Ègbemèlãwo mu kè ɖo e ŋuti kpɔ gbèɖe ò, jãŋùta mu yì ɖìsà to funu kpɔ ò.

⁹Vɔ̀, àgbètɔwo yì kpena àkɔ kudo àkpã sɛ̃sɛ̃, eye wo kùnà ètowo kaka yì kɔ̀nà ɖo woabe èkè ŋuti.

¹⁰Wo ɖènà àfĩdowo ɖo àkpãwo mè, eye wo jina ènu kèwo ɖo àsìxɔ̀xɔa.

¹¹Wo puna èsìdowo, eye wo yì ɖènà ànyigbã be àdɔ̀kùnɔ̀ wawlawo to.

¹²Vɔ̀, fikɛ ye wo la kè ɖo ènunya ŋuti lè ò? Eye ènunya be jɔ̀sope ɖe?

¹³Àgbètɔ mu nya yebe xòmè ò, eye wo mu kpɔna ɛ̀ lè àgbètɔwo de ò.

¹⁴Àpù gã gblɔ̃ be: “Mu nɔ̀nà fikèa ò.” Eye àpù tɛgbè ɖo e ji be: “Mu lè gbɔ nyè ò!”

¹⁵Wo mu la teŋu ɖɔ̀lì ì kudo sìka kɔ̃ kè kɔ̀ ò, wo mu la teŋu plè è kudo ègà sùgbɔ ò.

¹⁶Sìka kè kɔ̀ ŋutɔa, Kɔ̀rnàlinà-kpe xɔ̀ci àlo Sàfirò-kpe cã mu xɔ̀ yebe àsì ò.

¹⁷Sìka àlo klisì cã mu teŋu sɔ̀ kudo ènunya ò. Wo mu la teŋu sɔ sìka kɔpò ɖèka cã sɔ plè è ò.

¹⁸Mi mu la gbà gblɔ̃ Kristalò ku Kòrayì tɔ̀ ò. Ènunya be àsìxɔ̀xɔ to jònuwo tɔ̀ ŋuti.

¹⁹Ètiopìa be Tòpazò cã mu sɔ̀ kudo è ò, Sìka kè kɔ̀a cã mu sù ì ò.

²⁰Vɔ̀, fikɛ ye ènunya so ò? Eye ènunya be jɔ̀sope ɖe?

²¹E wla do àmè àgbèagbèwo kpata, àyamè xèviwo mu le kpɔ ɛ̀ ò.

²²Èku kudo èkuwode gblɔ̃ be: “Ɛ̃ɛ mi sè wo gblɔ̃ yebe ènyà.”

²³Vɔ̀ Mawu ye nya yebe èmɔ̃, e nya fikè be nɔ̀nàa.

²⁴E ye le kpɔ kaka ànyigbã be vɔ̀vɔnu ke, eye e le kpɔ ènu kèwo lè xixea mèa kpata.

²⁵Nyàwo, e ye na ŋusɛ̃ àya pòpo, e ɖo jije ɖo èsì ŋuti,

²⁶e ɖo lipò na èji jàja, eye e ta èmɔ̃ na èji be ègbè ɖèɖe.

²⁷Wàlɛbɛ ŋua, Mawu kpɔ ènunya eye e kafu ì. E do è jèsi eye e jro la kpɔ yebe àsìxɔ̀xɔ.

²⁸E yomè a, e gblɔ̃ na àgbètɔ be: “Bù Tɔhonɔ̀, ekèa ye nyi ènunya! Si lè èvuɛ̃ gbɔ, e ye nyi ènunyaa!”