Read gen Yɔb 29 Bible Online

Yɔb 29 - gen bible

Yɔb 29

¹Yɔb yì yebe ènyà ji gblɔ̃ be:

²“Àmè kɛ ye la trɔ wètri kèwo va yìawo va na mù, ŋùkèkè kèwo mè Mawu kpɔ èji nyè lèa ò?

³Yebe kãligbɛ̃ a le kɔ̀ sã lè ŋùkɔ̀ na mù, eye yebe kɔ̀kɔ̀ɛa le klɛ̃ na mù lè èzã mè.

⁴Àmè kɛ ye la trɔ àpe ɖèkajɛ mè be ŋùkèkèwo va na mù, wàlɛbɛ kè Mawu le kpɔ àxuedo nyèa ji sìgbè èxlɔ̃ nène ò?

⁵Lè hùe ŋua nua, Ŋusɛ̃kpatatɔa kpɔ̀tɔ̀ lè kudo mù, eye èvi nyèwo trɔdo mù gòdò.

⁶Àdɔ̀kùnɔ̀ nyèwo gbãgo sìgbè ètɔ̀ sàsra nène, sìgbè àlekè àmì srànà lè àmìɖànu mèa nène.

⁷Ne mù le yì èdùa be àgbonu sãa, ne ma yì nɔ̀ ànyi a,

⁸ne ɖèkajɛviwo kpɔ mù gbãnàa, wo sina. Àmè sĩsĩwo dona bùbu ŋuti nyè.

⁹Àmè ɖìnyiwo tɔnatè ènu pòpo eye wo lena woabe ènuwo ɖo àku mè.

¹⁰Ègawo be ègbè ɖiɖina kaka va ɖonaɖa keŋu.

¹¹Àmè kèwo ye ɖoto mù a, wo kanafu mù, eye àmè kèwo kpɔ mù a, gblɔ̃nà àpe ènyà nyuɛ̃:

¹²Mù kpena ɖo wɔ̀amènɔ̀ kèwo le ji àlɔ̀doa ŋuti, kudo cɔɛvi kèwo mu ɖo àlɔ̀do ɖekpe òa.

¹³Àmè kèwo lè èkudonua, tuna èsì na mù, eye mù dona jìjɔɛ nana àsukusiwo.

¹⁴Jɔ̀jɔɛ sòso lè na mù sìgbè àwù nène, èse ji wɔ̀wɔ nyi àpe ètablanu.

¹⁵Mù trɔ zũ ŋùkuvi na ŋùkugbãgbãnɔ̀wo, èkpò na àmè kèwo kplibɔa.

¹⁶Mù lè ètɔ tèpe na ènuwɔ̀donɔ̀wo, mù lena ŋùku ɖo àmèjro be ènyàwo ŋuti nyuɛ̃ ɖe.

¹⁷Vɔ̀, mù ŋɛ̃na àzò na ènudrãwɔ̀tɔwo, eye mù xɔ̀nà àmèwo lè woa si.

¹⁸Mù gblɔ̃nà be: “mù la ku ɖo àpe àtɔ̃ mè sìgbè xèvi àdɔ̃ sɛ̃ŋu nène, àpe àgbèzãwo la dìdì ɖo e ji.

¹⁹Mù lè sìgbè àti kè be èkèwo lè èsì mèa nène. Eye àhũjàjawo kɔ̀nà ɖo àpe àmàkpawo ji.

²⁰Mù la kpɔ̀tɔ̀ nɔ xɔ̀ bùbu so àmèwo gbɔ, ŋusɛ̃ nyèa la kpɔ̀tɔ̀ nɔ̀ yeye sìgbè àŋùdàti kè mè hɛ̃ dãdãa nène.”

²¹Lè hùe ŋua nua, àmèwo ɖona èto mù, wo kpɔna àsi nyè nu, wo bɔ̀nànu sènà àpe sùsu ɖèɖe.

²²Ne mù ɖoàsitèa, àmè ɖekpe mu gbà kènà fĩ ò, ènyà nyèwo fana àkɔ na wo.

²³Wo kpɔna àsi nyè nu sìgbè lekè wo nɔ̀nàtè kpɔ èjijàja nène; Wo kènà ènu sìgbè èjisi cucugbãwo ye wo le ji la xɔ̀ nène.

²⁴Wo jina àdɔ̀mè nyuɛ̃ be jèsìwo lè gbɔ nyè. Mù dona jìjɔɛ na wo ne ŋùɖo bu na woa.

²⁵Mù nyi woabe èga, mù fiɔna wo èmɔ̃ kè wo la toa. Mù lè woa dòmè sìgbè èfìɔ nène na yebe gbãdãgbãwo, sìgbè ènuwɔ̀donɔ̀wo be àsiɖo àkɔ na àmètɔ nène.”