Read gen Yɔb 3 Bible Online

Yɔb 3 - gen bible

Yɔb 3

¹Lè ekèa kpata yomè a, Yɔb kè ènu, sɔ pò nupo. E sɛ̃kpɛ̃ na yebe jìgbè zã.

²E gblɔ̃ be:

³“Aà! E la kè nyɔ be ŋùkèkè kè ji wo jì mù lèa, mu gbà nɔ̀ ànyi ò! Eye èzã kè gblɔ̃ be: “wo fɔ ɖèvi ɖe be èfua!” Cã mu gbà nɔ̀ ànyi ò!

⁴Ŋùkèkè ŋua ne nyi ŋùkèkè do vìvìti klìkò ɖe na mi! Ne Mawu kè lè èjihũia mu gbà kpɔ e gbɔ ò! Ne kɔ̀kɔ̀ɛ mu gbà klɛ̃ na ɛ̀ ò!

⁵Ne vìvìti cicri ne pòxla do è, ne lilikpo ne zĩ e ji, ne èzã ne do lè dɔ̃ŋùkusu jàse!

⁶Èzã ŋua ne nyi vìvìti ɖèɖe, wo mu gbà hlɛ̃ ɛ̀ ɖo ŋùkèkèwo dòmè lè èpè bliboa mè ò, mu gbà ɖo wètriwo be hɛ̃hlɛ̃ mè ò!

⁷Ɛ̃ɛ, ne èzã ŋua àdɔ̀ ɖekpe mu gbà jì ò eye jìjɔɛwo keŋu nu ne ci!

⁸Ne àmè kèwo ɖènà gbledo be ŋùkèkèwo fiɔna jè ŋùkɔ̀, eye wo la teŋu fɔ̃ èhɔ̃ drìbà 'Levìatàn', wo ne dɔ̃ gbledo va èzã ŋua ji!

⁹Ne ŋùdekɛ̃nyɛ be wètriviwo ne ci! Ne èzã kè mè wo jì mù a ne kpɔ̀tɔ̀ nɔ kpɔ ŋùkèkè be kɛ̃klɛ̃ sinu! Ne mu gbà kpɔ èwè be toto mè gbèɖe ò!

¹⁰Nyàwo, èzã ŋua tàsi mù ye mù va xixea mè, e na mù kè ɖo gbledo ŋuti egbè.

¹¹Nukɛ ŋuti ye nyè mu ku lè ènɔ̀ nyè be àdɔ̀ mè ke ò? Nukɛ ŋuti ye nyè mu jo gbɔ̃gbɔ̃a ɖɛ kaka kè wo le kɔ̀ mù ɖo ànyi a ò?

¹²Nukɛ ŋuti àlɔ̀ èvèwo teŋu xɔ̀ mù ɖo àta ji ò? Nukɛ ŋuti ye ènɔ̀ nyè teŋu na mù ànɔ ò?

¹³E la kè nyɔ, ɖo egbè yàwoa, mù la kè nɔ gbɔ̃jɛ̃ lè èyɔ̀ mè. Mù la nɔ dɔ̃ àlɔ̃ gbà nɔ gbɔ̃jɛ̃

¹⁴kudo ànyigbã ji be èfìɔwo ku ŋùkɔ̀nɔ̀tɔwo, àmè kèwo tù ŋùkuɖoji be èxɔ̀ kèwo trɔ èglìkpowoa.

¹⁵Àlo mù la nɔ̀ kudo hùɛ̃yi kèwo ɖo sìka eye wo ɖɔ woabe àxuewo kudo klòsalò be àcɔɖonuwo.

¹⁶Àlo gbà kpea, nyè mu la jɔ̀ ŋutɔ cã, sìgbè èfu gɛ̃gɛ̃ kèwo mu kpɔ kɛ̃klɛ̃ tètè ò.

¹⁷Lè èyɔ̀ mèa, àmè drãwo mu hùãnà tètè ò. Àmè kèwo mu gbà ɖo ŋusɛ̃ òa, gbɔ̃nàjɛ̃.

¹⁸Funua, ègàmènɔ̀tɔwo cã kpɔna vòvo, ɖo wo mu gbà sènà ègàkpa jikpɔtɔa be àpa dodowo ò.

¹⁹Vòvòtoto ɖe mu gbà nɔ̀nà vifɛ̃ kudo àmègãxo dòmè ò: fikèa ye kluvi vò lè àpetɔa si lè.

²⁰Nukɛ ŋuti ye wo sɔ ŋùkèkè be kɛ̃klɛ̃ na ŋuzĩzĩme ɖo ò? Nukɛ ŋuti ye wo la na àgbè àmè kè gbɔjɔ eye ŋùɖo bu na ò?

²¹E le nɔ̀tè kpɔ èku sinu, vɔ̀ mu la kè ɖo e ŋuti ò. E le ji èkua sìgbè sìka nène

²²E la kpɔ jìjɔɛ ŋutɔ, eye e la ɖuwè ne be kè ɖo yebe èyɔ̀ ŋutia!

²³Mù nyi àmè kè mu gbà nya fikè be le yìa ò, eye Mawu do mù ègà sìgbè àlekè wo dona àmè èkpaa nène.

²⁴Sìgbè ènuɖùɖu nènea, àpe ŋɛ̃ŋɛ̃wo kudo vevesèse be àpawo kpò ye le to màjìjɔ.

²⁵Ènu kè mù le vɔ̃ na a, kpò ye jɔ̀nà ɖo ji nyè. Ènu kè mù le si na a, ye va kpe na mù.

²⁶Àpe èjì mu gbà jè e mè kaka ne ma va nɔ̀ kpoo ò. Nyè mu la gbà teŋu gbɔ̃jɛ̃ ò: mù ci siayi ŋutɔ.”