Read gen Yɔb 30 Bible Online

Yɔb 30 - gen bible

Yɔb 30

¹Vɔ̀ fifìa, ɖèkajɛ kèwo mu ɖo àpe èpè cã òa, le kò mù. Co sã xoxoa, mù kpɔ be woa tɔwo cã mu jè la kplɔ̀ àvũ kèwo kplɔ̀nà èlãha nyèwo do ò.

²Ŋusɛ̃ cã mu lè woa si tètè ò, wo mu ɖo ènu ɖe la jràɖo lè àpe àgbè mè ò.

³Àdɔ̀ kudo èhiã na wo gbɔjɔ eye wo le ji ènu ɖe ne woa ɖù lè ŋuzĩzĩ be tèpe puplu kèa

⁴wo sũna ègbe vevewo lè àvewo gbɔ, wo ɖùnà àti be èkèwo.

⁵Àmè sia àmè ye nyà wo, wo le do àpa ɖo woa ta sìgbè fìãfìwo nène.

⁶Eye wo yì sò kɔpe ɖo bàlì do vìvìti cicriwo mè, àkpãdo kudo tèpe klìkowo mè.

⁷Wo yì tɛna ɖo àvewo gɔ̃mè, wo dona àpa sìgbè èsɔàkɛtɛwo nène lè àŋùjawo dòmè.

⁸Wo lè sìgbè àmèkpòwo nène. Wo mu ɖo tèpe ɖe lè ànyigbã ji ò.

⁹Eye fifìa, wo le kpà èhà ɖo ŋuti nyè, wo kpànà ènyà gbogbowo ɖo ènu nyè.

¹⁰Àpe ènu wɔ̀ àtãŋu na wo, eye wo trɔ lè ŋuti nyè. Wo tuna ètã kɔ̀ ɖo ŋùmè na mù èjì ɖèɖe tɔ̀.

¹¹Kè e nyi be Mawu xɔ̀ ŋusɛ̃ lè àsi nyè, dà mù ɖo ànyigbã a, wo le wɔ̀ ènu kè jro woa kudo mù.

¹²Gbɔ nyè gble lo, àmè màɖì ènuwo ye dohùɛ do mù. Wo le ji be ma jè ànyi, wo le ji ènyà lè ŋuti nyè ne ma gɛ̃.

¹³Wo tu woabe èhɔ̃wo keŋu, wo le ji la crɔ̃ mù kòkòkò, àmè ɖekpe mu hiã àlɔ̀do lè woa dòmè ò.

¹⁴Wo ɖè èdo gã ɖe ɖo èglì kè wla mù a ŋuti, eye wo ɖè èmɔ̃ to funu va gbɔ nyè.

¹⁵Vɔ̃vɔ̃ jè èji nyè, eye e na bùbu nyèa bu keŋu-keŋu zè ɖèka. Àpe nyɔna klo sìgbè lili nène.

¹⁶Eye fifìa, àgbè nyèa le yì, ŋùkèkè nyèawo lè gbledo mè.

¹⁷Lè èzã mèa, mù sènà vève kaka yìnà èpu mè ke, e nana be nyè mu teŋu dɔ̃na àlɔ̃ ò.

¹⁸Mawu jè e ji nyè kudo àdã, e miɔ̃ èhlò na mù sìgbè àwù èkɔ̀mè miɔ̃-miɔ̃ nène.

¹⁹E sɔ mù dãŋùgbe ɖo bàba mè, mù trɔ sìgbè hũhũ ku àfi nène.

²⁰Mawu nyè, mù do àpa le yɔ wò, tɔ̀ na mù jro. Mù lè ŋùkɔ̀ na wò, vɔ̀ wò mu le kè ènu do mè na mù ò.

²¹Wò jo le sɛ̃tamè ɖo ŋuti nyè, wò le wɔ̀ àvũ kudo mù ku àpo ŋusɛ̃a kpata.

²²Wò na mù fò toɖo-toɖo eye mù lè àya ji le yì. Eye wò ci mù lè àya sɛ̃sɛ̃ pòpo mè;

²³Ɛ̃ɛ mù nya, wò kplɔ̀ mù le yì na èku, fikè ye ènu àgbèagbèwo kpata la yì dogò lè.

²⁴Vɔ̀ ne àmè ɖe ŋɛ̃a, mu biɔna àlɔ̀doa? Lè gbledo mèa, wo mu jina xɔ̀namètɔa?

²⁵Nyè mu fã ɖo àmè kèwo àgbè le ɖèfũ na a taa? Àmè kè jèhiã mèa be ènu wɔ̀nà ŋuzĩzĩ na mù.

²⁶Mù kã ɖo nyɔna ji sãa, gbledo ye va ɖɔ̀lì ì bòhũ. Mù le nɔ̀tè kpɔ kɔ̀kɔ̀ɛ, vɔ̀ vìvìti ŋuti ye mù kè ɖo.

²⁷Mù kpɔ̀tɔ̀ titɔ ɖo àpe àyàɖùɖu be àgbè kèa ŋuti.

²⁸Mù le zɔ̃, ci kpɔ̃: ɖo kɔ̀kɔ̀ɛ ɖe mu lè na mù ò. Mù gbà le ji àlòdo lè àmèwo be ŋùkɔ̀.

²⁹Àpadodo nyèwo na be mù trɔ wɛ̀tɛ̀klɛ̀wo be èxlɔ̃ eye mù le doha kudo èglòwo.

³⁰Àgbàze nyè pu lè ŋuti na mù, le ɖù eye èpu nyèwo le fiɔ̃.

³¹Èkàsãŋùgu nyè mu teŋu gbà le jì èhà bu sɔ wu ècɔ be èhàwo ò, èkpɛ̃ nyèa le jì àvihawo.