Read gen Yɔb 31 Bible Online

Yɔb 31 - gen bible

Yɔb 31

¹Mù do èse na ŋùkuvi nyèwo be wo mu gbà kpɔ tùgbɛ̀jɛvi ɖe ne bèa jro wo ò.

²Jɔ̀gbènyuɛ̃tɔ̀! Mu nyi nène òa, leke Mawu la wɔ̀ kudo mù ò? Nukɛ Ŋusɛ̃kpatatɔa la sɔ mù wɔ̀ so kaka jiŋùkusi ò?

³Nyàwo, jɔ̀gbèvuɛ̃ vana àmè bàɖà ji, eye màsɔ̀ màsɔ nɔ̀nà àmè kè le wɔ̀ ènu bàɖà be àgbè mè.

⁴Vɔ̀ Mawu le kpɔ àpe wɔ̀nà nyuɛ̃ ɖe eye e le hlɛ̃ àpe àfɔ̀ɖèɖewo cã.

⁵Mù ɖànà àjèa? Mù blènà àmè fàfaɖea?

⁶Mawu ŋutɔ ne ɖokòjo na mù jɔ̀jɔɛɖe. Nène a, e la kpɔ be mù nyi ɖemànyatɔ.

⁷Àfɔ̀ nyèwo trã lè yebe èmɔ̃a ji kpɔa? Èjì nyè kplɔ̀ ŋùku nyèwo be jro ɖe do kpɔa? Àpe wɔ̀wɔ ɖe na àpe àlɔ̀wo pòɖia?

⁸Ne e lè nènea, àmè bu teŋu ɖù ènu kè mù do a fàa, wo ne hɔ̃ àgblèmènuku kèwo mù do a!

⁹Èjì nyè jè nyɔ̃nù ɖe be èmɔ̃ mè kpɔa? Mù va yì sò è lè bèbemè kpɔa?

¹⁰Ne e lè nènea, eŋuã èsrɔ̃ nyè ne yì tùnu na ŋusù bu, eye àmèjrowo ne dɔ̃ kudo è fàa!

¹¹Ɖo àpe ègbèji mà-nɔ la nyi ènu drã ɖe, ènu kpòtoe kè la na ètodɔ̃a.

¹²Àgɔ̀ nyèa la nɔ̀ sìgbè èzò kè la bì mù kaka la fiɔ̃ mù, eye àdɔ̀kùnɔ̀ nyèawo kpata la crɔ̃.

¹³Wàlɛbɛ kè sumɔ̃vi nyè ŋusùwo kudo nyɔ̃nùwo ɖo ènyà kudo mù a, nyè mu zĩ woabe ènu ɖekpe ji ò. Mù le ŋùku ɖo ènu kè wo ɖo la xɔ̀a ŋuti na wo.

¹⁴Mu nyi nène òa, nukɛ mù la gblɔ̃ ne Mawu va le ɖokòjo na mù so e ŋuti ò? Leke mù la wɔ̀, ne e va le kù ènyà mè ò?

¹⁵Nyàwoa, Mawu ɖèka ŋua kpò ye wɔ̀ mia kpata lè mia nɔ̀wo be àdɔ̀mè.

¹⁶Mù gbe ènu nana wɔ̀amènɔ̀wo kpɔa? Mù ɖèkɔ̀ lè àhòsì ɖe ŋuti kpɔa?

¹⁷Mù hlànà ènu ɖùnà mà-ɖo ŋùku cɔɛviwo jia?

¹⁸Vɔ̀ bòhũ, so kaka àpe ɖèkajɛ mè ye mù le hɛ̃ cɔɛvi sìgbè èvi nyè jìji ke nène. Mù pònà èto ɖo na àhòsìwo tèmàtɔ.

¹⁹Mù kpɔ ènuwɔ̀donɔ̀ ɖe lè àma kpɔ ye nyè mu do àwù na ɛ̀, àlo wɔ̀amènɔ̀ ɖe eye nyè mu na ɛ̀ nɔ̀pe òa?

²⁰Bòhũa, mù nana wo àwù kèwo la le àvìvɔ eye wo wɔ̀ ku àlɛ̃ be èfua, eye wo dona àkpe na mù.

²¹Mù tɛ̃ ŋùku do cɔɛvi ɖe kpɔ lè kòjoɖope, wàlɛbɛ kè mù nya nyuɛ̃ ɖe be kòjoɖotɔwo kpata la sò jɔ̀jɔɛ na mù a?

²²Ne mù wɔ̀ ekèa, àbɔta nyè ne fo lè ètù mè na mù eye àbɔ nyèa ne ŋɛ̃ lè àbɔglìgo nu!

²³Ɖo mù le vɔ̃ Mawu be àdɔ̀mèze be àdã, ne nyè mu gbà teŋu va nɔ̀tè lè ŋùkɔ̀ na ɛ̀ ò.

²⁴Mù kã ɖo sìka ji à? Àlo mù gblɔ̃ na sìka be: “Èwò ye nyi àpe ŋùɖo à?” Gbèɖe!

²⁵Àdɔ̀kùnɔ̀ nyèawo be gbɔsùsu mu do jìjɔɛ na mù ò, kèwo ŋutɔ cã mù gbà va kpɔ kpe èawo mu do jìjɔ̀ɛ na mù ò.

²⁶Kè mù kpɔ dɔ̃ŋùkusua zɛ̃ kudo yebe kɔ̀kɔ̀ɛ, eye wètria to lè yebe nyiɖìɖia mèa,

²⁷nyè mu tàsi èjì nyèa gbã lè àyè mè ò. Nyè mu sɔ wo sìgbè vòduwo nène, kaka ne ma va sɛ̃ wo ò.

²⁸E cã la nyi èhlɔ̃dãdã kè jè na ètodɔ̃a. Nyàwo mèa, mù la nyi èvi mà-wɔ̀ ànùkua lè Mawu kè lè èji hũia gbɔ.

²⁹Mù kpɔ jìjɔɛ wàlɛbɛ kè kɛ̃tɔ nyè lè àfɔ̀ku mèa? Mù tìkpo, ɖuwè kè bàɖà zɛ̃ àxue na ɛ̀a?

³⁰Mu jro mù ŋutɔ cã be ma wɔ̀ èvuɛ̃ nɔ ji yebe èku to jɔ̀gbèvuɛ̃ mè ò.

³¹Àmè kèwo va zɛ̃nà gbɔ nyèawo gblɔ̃nà be: “Àmè sia àmè ɖùnà èhũlã lè Yɔb be àxomè lekè e jro è ɖoa.”

³²Àmèjro ɖe mu ci àgbo ji dɔ̃ kpɔ ò, àxue nyèa lè nùvò gbàa na èmɔ̃zɔ̃tɔwo kpata.

³³Àmè sùgbɔ cɔ̃na ènu woabe àgɔ̀jèjewo ji eye wo wlana wo ɖo woabe èjìwo mè. Mù wɔ̀ sìgbè woawo ke nènea?

³⁴Nyè mu vɔ̃ àmèwo be kòjoɖoɖo ò. Wo teŋu ɖù fɛwu lè ŋuti nyè fàa, ekèa mu na mù gbe ènu pòpo àlo gbe tòto ò.

³⁵Aà! Ne àmè ɖe la teŋu ɖoto mù a, e la nyɔ. Ènyà nyè kpɔ̀tɛa ye nyi be fifìa, Ŋusɛ̃kpatatɔa ɖèka kpò ye la na mù ɖoŋutia. Eye kɛ̃tɔ nyè be hùɛdodoa,

³⁶mù dro è ɖo àbɔta ku jìjɔɛ, mù dro è ɖo èta sìgbè fìɔkuku nène.

³⁷Mù la ɖo àzɔ̃lì nyèwo be àkɔ̃ŋùta na Mawu pɛpɛpɛ, mù la zɔ̃ yì ŋùkɔ̀ na ɛ̀ sìgbè èfìɔvi nène.

³⁸Àgblèwo le jè àpe hùɛa? Àgblètɔwo ɖo ènu ɖe ɖo ŋuti nyèa?

³⁹Mù ɖù woabe àgblèmènuku ɖe màtu èfɛ̃a? Mù wɔ̀ màjɔ̀ màjɔ ɖe kudo woa?

⁴⁰Ne e lè nènea, eŋuã ànyigbã ne sɛ̃ àŋùja na mù ɖo èlì tèpe, ne na kɔsu ne mìɔ̃ na mù ɖo èbli tèpe! Fikèa ye Yɔb nɔ̀tè ènu pòpo lè.